მარკუს ანტონიუსი
მარკუს ანტონიუსი (ლათ. Marcus Antonius; დ. ჯვ. წ. 14 ღურთუთა, 83 — ღ. ჯვ. წ. 1 მარაშინათუთა, 30) — რომალი პოლიტიკური დო ოურდუმე მოღალე. უკინებუდჷ შხვადოშხვა პოსტეფი, რდჷ ლეგატი (ჯვ.წ. 52-51 წწ.), ტრიბუნი (ჯვ.წ. 49), კავალერიაშ მადუდე (ჯვ.წ. 48), კონსული (ჯვ.წ. 44, 34), პროკონსული (ჯვ.წ. 44-40). ჯვ.წ. 43-33 წანეფს ანტონიუსი რდჷ მაჟირა ტრიუმვირატიშ მაკათური, ოქტავიანე დო ლეპიდუსიწკჷმა ართო. ილაყაფჷ კაბეტი როლი რომიშ რესპუბლიკაშ რომიშ იმპერიათ ტრანსპორმაციაშო.
| მარკუს ანტონიუსი ლათ. Marcus Antonius | ||
.jpg) მარკუს ანტონიუსიშ ბიუსტი ვატიკანიშ მუზეუმს | ||
| რომიშ რესპუბლიკაშ ტრიუმვირი | ||
|---|---|---|
| პოსტის გერინაშ ბორჯი | ||
| ჯვ. წ. 43 წანა – ჯვ. წ. 33 წანა ოქტავიანე დო ლეპიდუსიწკჷმა ართო | ||
| დუნაბადი | ჯვ. წ. 14 ღურთუთა, 83 რომი, იტალია, რომიშ რესპუბლიკა | |
| ნაღურა | ჯვ. წ. 1 მარაშინათუთა, 30 ალექსანდრია, პტოლემეეფიშ ომაფე | |
| ღურაშ ბაძაძი | დუდიშ ჸვილუა | |
| მუმა | მარკუს ანტონიუს კრეტიკუსი | |
| ნანა | იულია ანტონია | |
| ალმასქუ | ფადია (?-?) ანტონია ჰიბრიდა უკულაში (?-ჯვ.წ. 47) ფულვია (ჯვ.წ. 46-40) ოქტავია უკულაში (ჯვ.წ. 40-32) კლეოპატრა (ჯვ.წ. 32-30) | |
| სქუალეფი | ანტონია მარკუს ანტონიუს ანტილუსი იულუს ანტონიუსი ანტონია უნჩაში ანტონია უკულაში ალექსანდრე ჰელიოსი კლეოპატრა სელენა II პტოლემე ფილადელფოსი | |
| რელიგია | ჯვეშრომაული რელიგია | |
მარკუს ანტონიუსი იულიუს კეისარიშ მოჯგირე დო ალმარენჯი რდჷ. მონაწილენდჷ კეისარიშ ოურდუმე კამპანიეფეს გალიას დო ომენოღალე ლჷმას. კეისარქ ორჯგინჷ ოპონენტეფს საბერძნეთის, ოორუე აფრიკას დო ესპანეთის. ჸათე პერიოდიშო, ანტონიუსი ნინალენდჷ იტალიაშ მამართალო. ჯვ. წ. 44 წანას, იულიუს კეისარიშ ჸვილუაშ უკულ, ანტონიუსიქ ნძალეფი აკაართიანჷ ლეპიდუსიწკჷმა დო ოქტავიანეწკჷმა, ნამუთ კეისარიშ სქუალაფირი რდჷ. ჸათაშ იფორმირჷ სუმი გოლინიანი დო შანულამი პოლიტიკური, ოურდუმე მოღალეეფიშ ალიანსიქ, ნამუსჷთ ისტორიკოსეფი მაჟირა ტრიუმვირატის უძახჷნა. ტრიუმვირეფქ, ჯვ. წ. 42 წანას, ფილიპიშ ლჷმას დამარცხეს კეისარიშ მაჸვილარეფი დო უკულ ხეშულობა მუნეფიშ შქას გირთეს. ანტონიუსიშ მართუალაშ თუდო რდჷ რომიშ ბჟაეიოლი პროვინციეფი, მაგალთო პტოლემეეფიშ ომაფე, ნამუსჷთ ჸათე ბორჯიშო კლეოპატრა მართუნდჷ. ანტონიუსი, თაშნეშე ხემანჯღვერენდჷ ოურდუმე კამპანიას პართიაშ მეხჷ.
ტრიუმვირატიშ მაკათურეფს ართიანწკჷმა ვაუღუდეს ჯგირი ურთიართალა დო საქმექ დახე ოურდუმე ლჷმაშახ ქიმერთჷ. მარა ჯვ. წ. 40 წანას, ანტონიუსიქ ოსურო ქიმიჸონჷ ოქტავიანეშ და ოქტავია. ჯვ. წ. 41 წანას, ნოღა ტარსუსის, ანტონიუსიქ ქეშეხვადჷ კლეოპატრას. ჸათე ბორჯიშე თინეფქ ართიანი ქიჸოროფეს. ანტონიუსის კლეოპატრაშე სუმი სქუაქ ქაშუ. ჯვ. წ. 36 წანას ტრიუმვირატიშე გეგშაჸათეს ლეპიდუსი. ანტონიუსიშ დო ოქტავიანეშ შქას დოჭყაფილი ტერალაქ გეგინძორჷ. ჯვ. წ. 34 წანას კლეოპატრაქ დო ანტონიუსიქ რომიშ დო პართიაშ ტერიტორიეფი კლეოპატრაშ სქუალეფს გეგნოჩეს. ანტონიუსიქ, ოქტავიანეშ და ოქტავია ჩეთხინუ დო ოსურო კლეოპატრა ქიმიჸონჷ. ჸათე ამბეეფიშ უკულ, ოქტავიანექ ქიმწიჭყჷ ოურდუმე პროპაგანდა, ანტონიუსიშ ალმარენჯი სენატორეფი რომიშე ონტინუ, კლეოპატრას ლჷმა გეგმუცხადჷ დო ჯვ. წ. 31 წანაშ 2 ეკენიას, აქციუმიშ ოზუღე ლჷმას ორჯგინჷ ანტონიუსიშ დო კლეოპატრაშ გოართოიანაფილი ფლოტის. უკულ ოქტავიანექ გაგინძორჷ ოურდუმე კამპანია, ეგვიპტეშა გემშეჭკირჷ დო დამარცხჷ ანტონიუსიშ ნძალეფი. შედეგო, ანტონიუსიქ დო კლეოპატრაქ დუდი დიჸვილეს.
ანტონიუსიშ ღურაშ უკულ, ოქტავიანექ რომიშ ხვალახე მამართალო გჷნირთჷ. ჯვ. წ. 27 წანას თიქ მიპალუ ავგუსტუსიშ ტიტული. ოქტავიანე მერჩქინელი რე რომიშ იმპერიაშ დუმარსხუაფალო დო თიში მაართა იმპერატორო.
ლიტერატურა რედაქტირაფა
- De Ruggiero, Paolo (2013). Mark Antony: A Plain Blunt Man. Barnsley, South Yorkshire: Pen and Sword.
- Southern, Pat (1998). Mark Antony. Stroud: Tempus Publishing.