ნიკოლაი ეჟოვი
ნიკოლაი ივანეშ სქი ეჟოვი (რუს. Николай Иванович Ежов, დ. 1 მესი, 1895 — ღ. 4 ფურთუთა, 1940) — სხუნუეთიშ სახენწჷფო დო პოლიტიკური მოღალე, დინახალენი საქვარეფიშ ოკათე კომისარი 1936-1938 წანეფს, სტალინური დიდი ტერორიშ მიმალობას.
| ნიკოლაი ეჟოვი Николай Ежов | ||
 ეჟოვი 1938 წანას | ||
| დინახალენი საქვარეფიშ ოკათე კომისარი | ||
|---|---|---|
| პოსტის გერინაშ ბორჯი | ||
| 26 ეკენია, 1936 – 25 გერგობათუთა, 1938 | ||
| წიმოხონი | გენრიხ იაგოდა | |
| მონძე | ლავრენტი ბერია | |
სრკპ ცკ-შ პარტიული ოკონტროლე კომისიაშ დუდმახვენჯი | ||
| პოსტის გერინაშ ბორჯი | ||
| 1935 – 1939 | ||
| წიმოხონი | ლაზარ კაგანოვიჩი | |
| მონძე | ანდრეი ანდრეევი | |
| პოსტის გერინაშ ბორჯი | ||
| 8 პირელი, 1938 – 9 პირელი, 1939 | ||
| წიმოხონი | ნიკოლაი პახომოვი | |
| მონძე | პოსტიქ გეუქვჷ | |
მა-17 ცენტრალური კომიტეტიშ რსული მაკათური | ||
| პოსტის გერინაშ ბორჯი | ||
| 10 ფურთუთა, 1934 – 3 მელახი, 1939 | ||
მა-17 პოლიტბიუროშ კანდიდატი მაკათური | ||
| პოსტის გერინაშ ბორჯი | ||
| 12 გჷმათუთა, 1937 – 3 მელახი, 1939 | ||
მა-17 სეკრეტარიატიშ მაკათური | ||
| პოსტის გერინაშ ბორჯი | ||
| 1 ფურთუთა, 1935 – 3 მელახი, 1939 | ||
| დუნაბადი | 1 მესი, 1895 სანქტ-პეტერბურგი, რუსეთიშ იმპერია | |
| ნაღურა | 4 ფურთუთა, 1940 (44 წანერი) მოსკოვი, რუსეთიშ სფსრ, სსრრ | |
| ღურაშ ბაძაძი | რხუალა | |
| მენოღალობა |  სსრრ | |
| პოლიტიკური პარტია | სრკპ | |
| ალმასქუ | 1. ანტონია ტიტოვა 2. ევგენია ფეიგენბერგი | |
| სქუალეფი | 1 (ენაჭოფა) | |
| რელიგია | ათეიზმი | |
| ჯილდოეფი |  | |
| ხეშმოჭარუა |  | |
ეჟოვი 1915-1917 წანეფს ნინალენდჷ რუსეთიშ იმპერიაშ არმიას. 1917 წანაშ 5 მესის ქაკათჷ ბოლშევიკეფს. 1917-1922 წანეფს მონაწილენდჷ რუსეთიშ ომენოღალე ლჷმას. 1922 წანაშე მუშენდჷ სრკპ-ს დო უკინებუდჷ შხვადოშხვა პოსტეფი. 1929-1930 წანეფს რდჷ ოფუტეშ მეურნობაშ ოკათე კომისარიშ გამაკოჩი. 1930 წანას ეჟოვი ქუდარინეს შხვადოშხვა დეპარტამენტეფიშ (სპეციალური საქვარეფიშ დეპარტამენტი, ინდუსტრიული დეპარტამენტი) მადუდეთ, კომუნისტური პარტიაშ დინახალე. ეჟოვქ, 1934 წანას გინირთჷ სრკპ ცკ-შ მაკათურო დო ართი წანაშ უკულ ცენტრალური კომიტეტიშ მელამოსეთ. 1935-1939 წანეფს მოღალენდჷ სრკპ ცკ-შ პარტიული ოკონტროლე კომისიაშ დუდმახვენჯო.
1934 წანას დოჸვილეს ჯვეში ბოლშევიკი სერგეი კიროვი. სტალინქ ჸათე ფაქტი გეგმირინუ პოლიტიკური რეპრესიეფიშ სამანჯელო. სტალინიშ ინიციატივათ რეპრესიეფს ეჟოვი დუდენდჷ. თიქ კიროვიშ ჸვილუა ქეკადვუ სტალინიშ ოპონენტეფს კამენევს, ზინოვიევს დო თინეფიშ მოხუჯეეფს.
1936 წანაშ 26 ეკენიას სტალინქ დინახალენი საქვარეფიშ ოკათე კომისარიატიშ (ნკვდ) ხემანჯღვერო დო ცენტრალური კომიტეტიშ მაკათურო ეჟოვი ქუდარინუ. ეჟოვიშ მანჯღვერალათ იმანჯჷ რეპრესიეფქ, ნამუსთ "ეჟოვშჩინა"-ს უძახუნა. 1937-1938 წანეფს ოჭოფეს დოხოლაფირო 1.3 მილიონი ადამიერი, 681,692 ადამიერი გორხვეს დო 685,201 ადამიერი გულაგეფშა გოუტეს. რეპრესიეფიშ შედეგო მოჯალაგეს ჯვეში ბოლშევიკეფი დო სტალინიშ ხეშულობაშო შხვა "ვალოიალური ელემენტეფი". 1938 წანაშ 22 მარაშინათუთას ეჟოვიშ გამაკოჩო სტალინქ ქუდარინუ ლავრენტი ბერია. ეჟოვიშ რეპრესიეფიშ მიმალობას ეჟოვს ბერიაშ ჭოფუა ხოლო ულამუდჷ. მარა საქორთუოშ ნკვდ-შ მადუდექ სერგო გოგლიძექ ბერია გაფრთხილჷ. ბერიაქ უცფას სტალინშა მიდაფურუნუ დო თიწკჷმა მორაგადაფეფით რეპრესიეფს გინუსკიდუ.
ბერიაქ ნკვდ ეჟოვიშ ალმარენჯეფიშე გოწიმინდუ. მაგალთო, ეჟოვიშ გამაკოჩი დო მოხუჯე მიხაილ ფრინოვსკი ნკვდ-შე გადუდიშულეს დო ფლოტიშა გეგნიჸონეს. ეჟოვქ ქიგინჷ ნამდა ბერია სტალინიშ პატრონაჟით სარგებლენდჷ დო თინა (ბერია) მუში გოლინას ოფართინუანდჷ. ეჟოვქ მალას დეპრესიას ქინანთხჷ დო შუმა ქიდიჭყჷ. 11 გერგობათუთას, სტალინქ დო მოლოტოვქ კონწარო გაკრიტიკეს ეჟოვი დო ნკვდ-შ მუშობაშ მეთოდეფი. 25 გერგობათუთას ეჟოვი ნკვდ-შ ოკათე კომისარიშ პოსტიშე გეგნარინეს. 1939 წანაშ 3 მელახის, ეჟოვს ქუდატებაფეს ცენტრალური კომიტეტი დო ხვალე წყარიშ ტრანსპორტიშ ოკათე კომისარიშ პოსტი ქუდუტეს. 1939 წანაშ პირელს წყარიშ ტრანსპორტიშ ოკათე კომისარიატიქ გეუქვჷ. 10 პირელს ეჟოვი ოჭოფეს დო სუხანოვოშ ჯიხას ქუდახუნეს. 1940 წანაშ 2 ფურთუთას ეჟოვი გასამართეს, სახენწჷფოშ გითოჩამა, კორუფცია, ურცხო ქიანეფიშ აგენტობა ქეკადვეს დო ჟირი დღაშ უკულ გორხვეს. ეჟოვიშ ჯოხო ოფიციალური დოკუმენტეფიშე გეშალასეს.
ეჟოვი ჭიჭე ტანიშ კოჩი რდჷ (151 სმ.). ჸათეშ გეშათ თის "ზისხირამი ჯუჯა"-ს უძახუდეს.