პიპინ კუნტა

პიპინ კუნტა (ლათ. Pipinus, ფრანგ. Pépin le Bref; დ. დოხოლაფირო 714 — ღ. 24 ეკენია, 768) — ფრანკეფიშ მაფა 751-768 წანეფს, კაროლინგეფიშ დინასტიაშ მაართა წჷმმარინაფალი.

პიპინ კუნტა ფრანგ. Pépin le Bref
ფრანკეფიშ მაფა
პოსტის გერინაშ ბორჯი
751 წანა – 24 ეკენია, 768 წანა
წიმოხონი	ხილდერიკ III
მონძე	კარლოს დიდი კარლომან I
დუნაბადი	714
ნაღურა	24 ეკენია, 768 (53-54 წანერი) სენ-დენი, ფრანკეფიშ ომაფე
ნთხორუ აბანი	სენ-დენიშ ბაზილიკა
მუმა	კარლოს მარტელი
ნანა	როტრუდა ტრირალი
ალმასქუ	ბერტრადა ლაონარი
სქუალეფი	კარლოს დიდი კარლომან I გიზელა
რელიგია	ქალკედონიური ქირსიანობა

პიპინქ დებადჷ ფრანკეფიშ ოურდუმე-პოლიტიკური ლიდერიშ, მაიორდომიშ კარლოს მარტელიშ დო თიში ალმასქუშ როტრუდაშ ფანიას. ბაღანობას პიპინს მეუღებუ თეოლოგიური გონათაფა ქირსიანი ბერეფიწკჷმა. 741 წანას დოღურჷ კარლოს მარტელიქ. თე წანას, მაიორდომეფო გინირთეს პიპინქ დო თიში უნჩაში ჯიმაქ კარლომანქ. პიპინი მართუნდჷ ნოისტრიას, ბურგუნდიას დო პროვანსის. კარლომანი მართუნდჷ ავსტრაზიას, ალემანიას დო თიურინგიას. ჯიმალეფქ ართო მოჯალაგეს ბავარიალეფიშ, აკვიტანარეფიშ, საქსეფიშ დო ალემანეფიშ არყებეფი.

743 წანას, მაიორდომეფქ, პიპინქ დო კარლომანქ, ფრანკეფიშ ომაფე ხვისტაშა გეშეჸონეს მეროვინგი ხილდერიკ III. ჸათაშ გეთუ ფრანკული ინტერეგნუმიშ პერიოდიქ. (743 წანაშახ, 7 წანაშ გოძვენას, ფრანკეფიშ მაფაშ პოსტი ვაკანტური რდჷ).

პიპინს დო კარლომანს ჯგირი ურთიართალა უღჷდეს რომიშ პაპეფიწკჷმა. ჯიმალეფი ძალამს ალურდეს წიმინდე ბონიფაციუსის, ნამუთ ფრანკეფიშ ოხვამეშ რეფორმირაფას დო საქსეფიშ გაქირსიანებას უცადუდჷ. 747 წანას, კარლომანქ, ნამუთ რელიგიური ადამიერი რდჷ, დათმუ პოლიტიკური ხეშულობა დო ქიდიჭყჷ მონასტრული ცხოვრება. ჸათაშ გინირთჷ პიპინ კუნტაქ ფრანკეფიშ ხვალახე მამართალო. კარლოს მარტელიშ უკანონო სქუა გრიფონიშ არყებაშ მოჯალაგუაშ უკულ, 751 წანას პიპინქ გეგთარაგუ ეკონია მეროვინგი მაფა ხილდერიკ III დო გუტუ მონასტერშა. რომიშ პაპი ზაქარიაშ ელარინათ, პიპინ კუნტაქ დუდი მაფათ გეგმაცხადჷ. მარა პიპინი მაფათ ვეჩინუ კარლომანიშ სქუა დროგოქ დო ეარყჷ. 753 წანას დროგო ოჭოფეს დო მონასტერშა გოუტეს.

ხეშულობაშ კონსოლიდაციაშ უკულ, პიპინ კუნტაქ ატარუ შხვადოშხვა რეფორმეფი, გაუჯგუშჷ ფრანკეფიშ კანონდვალა დო გაგინძორჷ ბონიფაციუსიშ ეკლესიური რეფორმა. პიპინი ალურდჷ რომიშ პაპის სტეფანე II-ქ, ლანგობარდეფიშ მეხჷ. პიპინ კუნტაქ ბრელშა დოლაშქუ ლანგობარდეფი, მიდუღუ ტერიტორიეფი დო პაპის გეგნოჩუ. ჸათაშ გიჭყჷ პაპიშ ოლქიქ. 754 წანაშ ზარხულს, პაპიქ სენ-დენიშ ოხვამეს, აკურთხუ პიპინიშ გირგვინი.

პიპინიშ ბორჯის, ფრანკეფიშ ომაფექ მიოჭირინუ შანულამი ექსპანსიას. თიქ დოლაშქუ სეპტიმანია დო ანდალუსიარი მუსლიმეფი, თაშნეშე ორჯგინჷ აკვიტანიაშ მამართალს ვაიფარს დო თიში გასკონური ჯარეფს. პიპინ კუნტაქ დიჭყჷ ოურდუმე კამპანიეფი საქსეფიშ დო ბავარიალეფიშ მეხჷ.

პიპინ კუნტაქ ღურუ 768 წანას. პიპინიშ ღურაშ უკულ ხვისტაშა ართბორჯულო ეშართეს თიში სქუალეფქ კარლოს დიდიქ დო კარლომან I-ქ.

ლიტერატურა

• Riché, Pierre (1993). The Carolingians: A Family Who Forged Europe. Translated by Allen, Michael Idomir. University of Pennsylvania Press.

პიპინ კუნტა კაროლინგეფიშ დინასტია დებადჷ: 714 ღურჷ: 768
წიმოხონი: ხილდერიკ III	ფრანკეფიშ მაფა    751–768	გეჸვენჯი: კარლოს დიდი კარლომან I