პოლინეზიური მითოლოგია

პოლინეზიური მითოლოგია — პოლინეზიაშ კათეფიშ რელიგიური დო მითოლოგიური წჷმორინეფიშ ართობუა, ნამუთ იხასიათებჷ რანწკი ართობური მუშობურობეფიშ, ართობური გერგეზეფით დო თ. უ. თიშ ხოლოს მარენჯი მელანეზიურ დო მიკრონეზიულ მითოლოგიეფშე გინორთი, პოლინეზიური მითოლოგია მერსხილი რე გოდგუმილ პანთეონწკჷმა. დახე არძა პოლინეზიური კულტურა პანთეონიშ მადუდეთ აღიარენს ღორონთი ტანგაროას (ცა დო ზუღაშ ღორონთ-ბრუოკუჩხა) ვარ-და ატუას (გოღორონთაფილი ჟიცა). წყარიშ სტიქიაშ მაზოჯალი რე იკატერე (ტანგაროაშ მოთა პუნგიშე). პოლინეზიარეფიშ ჩანარობაშ მაზოჯალი — რონგო (ტანგაროაშ ჯიმა), მაფურინჯეეფიშ მაზოჯალი — ტანე, ცაშორტყაფუშ მაზოჯალი — უენუკუ, ვულკანეფიშ მაზოჯალი — რუაუმოკო (პელე), გურგინიშ მაზოჯალი — ტაფირიმატეა, ლჷმაშ მაზოჯალი — ტუმატაუენგა (კუ, ორო). კანკალე ღორონთეფი, სამანგათ, ტანეშ ჯიმა რეჰუა შილებე ორდას მურიცხიშ სახეთ.

პოლინეზიური ღორონთეფი ართიანს მოგენა თიჯგურა ქიმინეფიშ მანჯებას, მუჭოთ რე ცა დო დიხაშ ართიანშე გიშართუალა, თაშნეშე დიხაუჩაშ, ადამიერეფიშ, კულტურეფიშ გოჭყაფა. უმენტაშო გჷმაჭყაფალი (დეიმურგი) — ზუღაშ სტიქიაშ ღორონთი რე.

ღურელეფიშ დიხაშგიმენ ომაფე პო, სოდე მაფენს ღურუშ მუმაჸუდეში (დიაჸუდეში) ჰინე-ნუი-ტე-პო. მარა მანჯღვერეეფიშ დო გერგეზეფიშ შურეფი, ბჟადალი პოლინეზიარეფიშ წჷმორინაფათ, გინმულა ქიანა პულოტუშა (ბოლოტუშა), დო პოლინეზიაშ შხვა ნორთეფიშ წჷმორინაფაშ მეჯინათ, კოკეფშა დითმირთჷნა. შურეფიშ ოქიანუ შხირას ჯოხოიდვალუაფჷ ავაიკით დო წიმოხონეფიშ დიხაშ გეშა გოშინას შანენს.

მაუი — კულტურული გერგეზი, ნამუთ კათას ოგურუანს შხვადოშხვა საქვარს, კათაშა დაჩხირი მოუღუ (დაჩხირი მოუღუ მუში ბები მაჰუიკაშე), მუთმოჯალაგანს ურჩხუეფს, გიშმეგონენს შხვადოშხვა ანჯარს დო ხეონწყუალს, ოკათუ ქოქოსიშ თხირიშ დო ჯოღორეფიშ გოჭყაფას. მაუი ირო მიშმურს კონფლიქტეფშა დო ონირზუ ღორონთეფს, ოცადჷ თინეფს მიდუღას ნძალეფიშ ნორთი დო პრივილეგიეფი კათაშ საწმოხონოთ, თაშნეშე ღორონთეფშა მუში უჯგუშოფეფიშ ძირაფას ოინალჷ. ღორონთეფიშ მოგვენო, მაუის გიშაკერზაფილი ნძალა უღჷ (მანა). თინა ღურჷ ღურუშ ოსურღორონთიშა გერჯგინაშ ცადებაშ ბორჯის დო თეთ კათას აჩუქენს უღურალას. ცენტრალურ პოლინეზიას მაუიშ წანა, მუჭოთ ჯგირ გვერდოღორონთიშ, საქვარს ორთუ ღორონთეფწკჷმა ართო. მაუიშ ალმაშარე შხირას რე ჰინა.

უდაბალაში მითოლოგია წჷმორინაფილი რე აიტუთ — მოძირაფეფით დო ღურელეფიშ შურეფით, ნამუეფით შილებე ორდან უბადოთ, ვარ-და ჯგირით (მუნეფიშ გამნარყიშო). თაშნეშე პოლინეზიარეფიშ მითოლოგიას რე წჷმორინაფა თიქიანური მაფურინჯედუდამ კათეფიშ მანაიაშ გეშა.