სუჰარტო
სუჰარტო (დ. 8 მანგი, 1921 — ღ. 27 ღურთუთა, 2008) — ინდონეზიარი პოლიტიკოსი დო ოურდუმე მოღალე, ინდონეზიაშ პრეზიდენტი დო ოურდუმე დიქტატორი 1967-1998 წანეფს.
| სუჰარტო | ||
 ოფიციალური პორტრეტი, 1993 წ. | ||
| ინდონეზიაშ 2-ა პრეზიდენტი | ||
|---|---|---|
| პოსტის გერინაშ ბორჯი | ||
| 27 მელახი, 1968 – 21 მესი, 1998 | ||
| წიმოხონი | სუკარნო | |
| მონძე | ბაჰარუდინ იუსუფ ჰაბიბი | |
პრეზიდიუმიშ კაბინეტიშ დუდმახვენჯი | ||
| პოსტის გერინაშ ბორჯი | ||
| 25 კვირკვე, 1966 – 17 გჷმათუთა, 1967 | ||
| წიმოხონი | სუკარნო (მუჭოთ პრემიერ-მინისტრი) | |
| მონძე | პოსტიქ გეუქვჷ | |
უგინობირაფუობაშ ყარაფიშ 16-ა გენერალური მელამოსე | ||
| პოსტის გერინაშ ბორჯი | ||
| 7 ეკენია, 1992 – 20 გჷმათუთა, 1995 | ||
| წიმოხონი | დობრიცა ჩოსიჩი | |
| მონძე | ერნესტო სამპერი | |
| დუნაბადი | 8 მანგი, 1921 ბანტული, ჰოლანდიაშ ოსტინდოეთი | |
| ნაღურა | ღურთუთა 27, 2008 (86 წანერი) ჯაკარტა, ინდონეზია | |
| მენოღალობა |  ინდონეზია | |
| პოლიტიკური პარტია | გოლკარი | |
| მუმა | კერტოსუდირო | |
| ნანა | სუკირა | |
| ალმასქუ | სიტი ჰარტინა | |
| სქუალეფი | 6 | |
| საქვარუა | პოლიტიკოსი, ოურდუმე მოღალე | |
| ხეშმოჭარუა |  | |
ინდონეზიაშ იაპონარეფიშით ოკუპაციაშ ბორჯის, სუჰარტო ნინალენდჷ იაპონარეფიშ ორგანიზაფილი ინდონეზიაშ უშქურანჯობაშ ნძალეფს. ინდონეზიარეფიშ დუდიშულობაშო ლჷმაშ ბორჯის, სუჰარტოქ ქაკათჷ ახალდუნარსხუა ინდონეზიაშ არმიას. სუჰარტოქ დუდი გიმირჩქინჷ მუჭოთ ნიჭიერი ოურდუმე მოღალექ დო მიოჭირინუ გენერალ-მაიორობას. 1965 წანაშ 30 ეკენია - 1 გჷმათუთას, ინდონეზიას არდგილი უღუდჷ ოურდუმე გინორთაშ ცადებას (30 ეკენიაშ ჸარაფი). გინორთაშ ცადებას ნძალიერო ქაწუდირთჷ ინდონეზიაშ აკოანჯარაფილი ნძალეფქ, სუჰარტოშ მანჯღვერალათ. თარობაშ ოფიციალური ინფორმაციათ, გინორთას ალურდეს ინდონეზიაშ კომუნისტური პარტიაშ მაკათურეფი. ჸათეშ გეშათ არმიაქ კომუნისტეფს ქუდუჭყუ თხოზინი. ჸათე პროცესეფიშ მიმალობას სუჰარტოქ სერიოზული გოლინა მიპალუ დო ხეშულობა მუქ ქაშეჸოთჷ ხეშა. ინდონეზიაშ დუმარსხუაფალი პრეზიდენტი სუკარნოქ პოლიტიკური პროცესეფიშე დათხინაფილქ იჸუ. 1967 წანას სუჰარტო გეგმაცხადეს ობორჯე პრეზიდენტო დო ართი წანაშ უკულ თინაქ გიშაგორილქ იჸუ ინდონეზიაშ პრეზიდენტო. ხეშულობაშა მულაშ უკულ, სუჰარტოქ წიმიჭყჷ დესუკარნოზაციაშ სოციალური კამპანია, ნამუშ ღანკი რდჷ სუკარნოშ გოლინაშ დო პოლიტიკური იდეოლოგიაშ დოდაღარაფა. 1975 წანას, სუჰარტოშ ზოჯალათ ინდონეზიაშ აკოანჯარაფილი ნძალეფქ გემშეჭკირეს ბჟაეიოლი ტიმორიშა, ანტი-იმპერიალიზმიშ დო ანტი-კომუნიზმიშ სამანჯელით. კონფლიქტიქ 23 წანაშ გოძვენას გეგინძორჷ.
სუჰარტოშ მართუალა შინელი რე "ახალი წესრიგი"-შ ჯოხოდვალათ. სუჰარტოქ გაჭყჷ ნძალიერი, ცენტრალიზაფილი, ოურდუმე თარობა, ნამუქჷთ ჭიეჭიეთ გინირთჷ ავტოკრატიული რეჟიმო. რგილი ლჷმაშ პერიოდის, სუჰარტოს, მუჭოთ ანტი-კომუნისტის, ხუჯი დუკინეს ბჟადალიშ ქიანეფქ, გიშაკერზაფილო ააშ-ქ. სუჰარტოშ რეპრესიეფიშ შედეგო მიჯალაგჷ მილიონობათ ადამიერქ, უმოსო კომუნისტეფქ, მეკვარჩხანე იდეოლოგიაშ პოლიტიკოსეფქ, ათეისტეფქ, პროფესიული რსხუეფიშ მაკათურეფქ, ინდონეზიას მახორუ ჩინარეფქ, აბანგანეფქ დო შხვეფქ. სუჰარტოშ მართუალა იხასიათებუდჷ ავტორიტარიზმით დო კორუფციათ. მარა თიში მართუალაშ ბორჯის, ინდონეზიაქ მიოჭირინუ სტაბილურობას, ეკონომიკური წჷმოძინეფს, შანულამი ინდუსტრიალიზაციას, გონათაფაშ ხარისხიშ გაუჯგუშებას. ჸათე მეჭირინაფეფიშ გეშა სუჰარტოს "გოვითარაფაშ მუმა"-ს უძახჷდეს.
1998 წანას, ინდონეზიას, არდგილი უღუდჷ მასობური გიშულეფს დო დემონსტრაციეფს სუჰარტოშ თარობაშ მეხჷ. კაბეტი რევოლუციური პროტესტეფქ იმანჯჷ ნოღეფს: მედანს, ჯაკარტას დო სურაკარტას. შედეგო, 1998 წანაშ მესის, სუჰარტოქ გეგნოდირთჷ.
თეხანური ინდონეზიას სუჰარტო ოდებელი ფუგურა რე. ბრელი ინდონეზიარიშო თინა რე ერუანული გერგეზი, ნამუქჷთ ინდონეზიას მუღჷ გოვითარაფა დო ეკონომიკური წჷმოძინა. შხვა ინდონეზიარეფი თის თვალუნა უბადო ავტორიტარო დო კონწარი დიქტატორო.