ტეჰსილი

ტეჰსილი (ჰინ. तहसील, ურდუ: تحصیل‎‎ არაბ. تحصيل‎‎-შე — დოიანლაფა, აკოშაყარუა), ვარდა ტალუკი, ვარდა მანდალი — ობჟათე აზიაშ კანკალე ქიანაშ ადმინისტრაციული დორთუალაშ ართული.

თარო ტეჰსილი ნოღაშე აკმოდირთუ, ნამუთ ნინალენს თიშ ცენტრო, დო მუსხირენ მუდანობაშ ოფუტეშე. კანკალეშა ტეჰსილიშ აკოდგინალუაშა შილებე გემშართან გეძინაფონ ნოღეფქ. ტეჰსილიშ მართუალას გოთანჯილი ოგინაგაფუე დო ადმინისტრაციული ხეშუულება უღუ მუშ იურისდიქციაშა მიშმალი ოფუტეეფშა დო მუნიციპალიტეტეფშა. ტეჰსილიშ თარი პოსტიშ პიჯი რე ტეჰსილდარი, ვარდა, მერკეთ ოფიციალური — ტალუკდარი ვარდა ტალუკა მუკტიარკარი.

ინდოეთი

ტერმინი „ტალუკი“ ვარდა „ტალუკა“ ხვალე კანკალე შტატის გმირინუაფუ, თიჯგურეფს მუჭოთი რე გუჯარათი, გოა, მაჰარაშტრა, კერალა, ტამილნადუ დო კარნატაკა; ტერმინი „ტეჰსილი“ მუშჸურე გჷმირინუაფუ გეჸვენჯი შტატეფს — პენჯაბი, ჰარიანა, უტარ-პრადეში, უტარაკჰანდი, ჰიმაჩალ-პრადეში, მადჰია-პრადეში დო რაჯასტანი. ანდჰრა-პრადეში წჷმოხ გჷმირინუანდჷ ტერმინ „ტალუკის“, მარა ასე თინა დოთირუ „„მანდალაქ“. ოშანაფალო შხირას გჷმირინუაფუ აბრევიატურა ინგლ. TK.

ირ ტალუკი ვარდა ტეჰსილი დიდი ოლქიშ ნორთი რე, ნამუთ მუშჸურე, შტატიშ ვარდა მორსხუე ტერიტორიაშ აკოდგინალუაშა მიშმურს. კანკალე შვანეფს, გოთანჯილ შტატიშ ტეჰსილეფი მორჩილ ბუნეფით რე ორგანიზაფილი, ნამუეფსჷთ ჯოხო გიმენოლქეფი. ოფუტეეფიშ გოართიანაფას ტეჰსილიშ დინოხოლე „ჰობლი“ ჯოხონა.

მამართალი ორგანოეფი, ნამუეფსჷთ ტეჰსილიშ დონეშა ქიმინჯენა, პანჩაიატ სამიტი ჯოხონა.

პაკისტანი

პაკისტანს თარო გჷმირინუაფუ ტერმინი ტეჰსილი, სინდიშ მოხ, სოდე გჷმირინუაფუ ტერმინი ტალუკი. პაკისტანიშ აბანობურ იერარქიაშ მეჯინათ ტეჰსილი მაჟირა აბანს იდვალუაფუ, ოლქიშ (ზილა) ნორთი რე. ირ ტეჰსილი ირთუ, მუშჸურე, მუსხირენ მუდანობაშ ოფუტეეფიშ სხუნუეფო.