უტუ მიქა

უტუ ჯოტოშ სქი მიქა (დ. 1812, ოფ. ფუკი, ასეიანი წალენჯიხაშ რაიონი ― ღ. დოხოლაფირო 1878), სამარგალოშ ყაზახეფიშ არყებაშ (1856-1857) მადუდე.

15 წანერი რდჷნ თეშ ხე ქიმეთხჷ ზენკალიშ დო ჭკადჷშ ხელუას. დოხოლაფირო 50-ამ წანეფს საჩიჩუეშა (წალენჯიხაშ რაიონი) გჷნიხორჷ, სოდეთ კჷნე ჭკადჷობას მეთხოზჷდჷ. ყაზახეფიშ არყებაშ დოჭყაფაშვანშენო ხუჯი ქიმეჩჷ არყებულეფს. მესის ყაზახეფქ მიქა საართო ხემანჯღვერო გეგშეგორეს. 12 მესის არყებულეფქ ზუგდიდი გეჭოფეს. სამარგალოშ დიაფალ ეკატერინე დადიანქ მოხვარა რუსეთიშ ხეშუულობას ქოთხუ. 20 მესის გენერალ ნ. კოლიუბაკინქ არყებულეფს აკოხვადჷ. მიქაქ გენერალს ყაზახეფიშ მონკა დგომარობა დო არყებაშ თახმი ბაძაძი ქომაშინჷ. თეწკჷმა 8 ბირგულშე აკოდგინელი მოთხუალა გეგნოჩჷ. კოლიუბაკინიშ მოთხუალათ ყაზახეფქ აკიფაჩეს, მარა ანჯარი ვა დარღვეს. არყებაშ მარცხებაშ უკული, 1857 გერგობათუთას მიქა რუსეთიშ ხეშუულობაქ არხანგელსკიშ გუბერნიაშა გეგნახორუ. 1867 წანაშ ღურთუთას სარჯელგაფილი ქართიშა ქიმიჸონეს, მუჟამცჷთ პატჷნჭკორალაქ გეუქვჷნ, მუში ოფუტეშა დორთაშ ნება ქიმეჩეს. მუში ოფუტარეფქ მიქა ოფუტეშ უნჩაშო ქჷდარინეს. უკულნეშის კჷნე ჭკადჷობას დო ოფუტეშ საქვარეფს მეთხოზჷდჷ.

ლიტერატურა

ლემონჯავა დ., გლეხთა აჯანყება სამეგრელოში 1856-1857, თბ., 1957;
საქართველოს ისტორიის ნარკვევები, ტ. 5, თბ., 1970;
ნარსია გ., ქსე, ტ. 6, გვ. 25, თბ., 1984