ფრიც ცერნიკე

ფრიც ცერნიკე (ნიდერლ. Frits Zernike; დ. 16 კვირკვე, 1888, ამსტერდამი, ნიდერლანდეფი — ღ. 10 მელახი, 1966, ამერსფორტი, ნიდერლანდეფი) — ნიდერლანდარი ფიზიკოსი, ფაზურ-კონტრასტული მიკროსკოპიშ გიმოგონებაშ გეშა გინოჩეს ნობელიშ პრემია ფიზიკაშ დარგის 1953 წანას.

ფრიც ცერნიკე
ნიდერლ. Frits Zernike
დაბადებაშ თარიღი:	16 კვირკვე, 1888
დაბადებაშ აბანი:	ამსტერდამი, ნიდერლანდეფი
ღურაშ თარიღი:	მელახი 10, 1966 (77 წანერი)
ღურაშ აბანი:	ამერსფორტი, ნიდერლანდეფი
მენოღალობა:	ნიდერლანდეფი
ომენცარე სფერო:	ფიზიკა
სამუშაშ აბანი :	გრონინგენიშ უნივერსიტეტი
ალმა-მატერი:	ამსტერდამიშ უნივერსიტეტი
ჯილდოეფი დო პრემიეფი:	რუმფორდიშ მენდალი (1952) ნობელიშ პრემია ფიზიკას (1953)

ბიოგრაფია

ფრიც ცერნიკექ დებადჷ 1888 წანაშ 16 კვირკვეს, ამსტერდამს. გურაფულენდჷ ქიმიას, მათემატიკას დო ფიზიკას ამსტერდამიშ უნივერსიტეტის. გურაფაშ თებაშ უკულ, 1913 წანაშე მუშენდჷ გრონინგენიშ უნივერსიტეტიშ ასტრონომიულ ლაბორატორიას, გიშარჩქინელი ნიდერლანდარი ასტრონომიშ იაკობუს კორნელიუს კაპტეინიშ ასისტენტო. 1920 წანაშე ცერნიკე რდჷ გრონინგენიშ უნივერსიტეტიშ თეორიული ფიზიკაშ პროფესორი. ცერნიკექ მიკროსკოპიაშ ინოვაციურ ფაზურ-კონტრასტული მეთოდი გჷმაბჟინუ 1933 წანას, ვაგენინგენიშ ფიზიკაშ დო მედიცინაშ კონგრესის. ჸათე მეთოდიშ გოვითარაფაშ გეშა მიაჩჷ ნობელიშ პრემიაქ. ცერნიკე რდჷ ნიდერლანდეფიშ ხელუანობაშ დო მენცარობაშ ომაფე აკადემიაშ, ოპტიკური საზოგადოებაშ დო ლონდონიშ ომაფე საზოგადოებაშ მაკათური. ღურუ 1966 წანაშ 10 მელახის, 77 წანერქ. ფრიც ცერნიკეშ ჯოხონობაშ რე ართ-ართი კრატერი თუთას.

ქოძირით თაშნეშე

• ფაზურ-კონტრასტული მიკროსკოპია

ლიტერატურა

• ფრიც ცერნიკეშ ბიოგრაფია Biographical Memoirs of Fellows of the Royal Society-ის

რესურსეფი ინტერნეტის

• ფრიც ცერნიკე Nobelprize.org-ის
• Frits Zernike Photo
• H. Brinkman, Zernike, Frits (1888–1966), in Biografisch Woordenboek van Nederland.
• Frits Zernike (1888–1966) biography at the National library of the Netherlands.