ჰენრი კისინჯერი
ჰენრი ალფრედ კისინჯერი (ინგლ. Henry Alfred Kissinger; დ. 27 მესი, 1923 — ღ. 29 გერგობათუთა, 2023) — ამერიკალი დიპლომატი დო პოლიტოლოგი, ააშ-იშ სახენწჷფო მელამოსე 1973-1977 წანეფს დო ერუანული უშქურანჯობაშ ელმაჩამალი 1969-1975 წანეფს რიჩარდ ნიქსონიშ დო ჯერალდ ფორდიშ ადმინისტრაციეფს.
| ჰენრი კისინჯერი Henry Kissinger | ||
 ოფიციალური პორტრეტი, 1973 წ. | ||
| ააშ-იშ 56-ა სახენწჷფო მელამოსე | ||
|---|---|---|
| პოსტის გერინაშ ბორჯი | ||
| 22 ეკენია, 1973 – 20 ღურთუთა, 1977 | ||
| პრეზიდენტი | რიჩარდ ნიქსონი ჯერალდ ფორდი | |
| წიმოხონი | უილიამ პირს როჯერსი | |
| მონძე | საირუს ვენსი | |
| პოსტის გერინაშ ბორჯი | ||
| 20 ღურთუთა, 1969 – 3 გერგობათუთა, 1975 | ||
| პრეზიდენტი | რიჩარდ ნიქსონი ჯერალდ ფორდი | |
| წიმოხონი | უოლტ უიტმენ როსტოუ | |
| მონძე | ბრენტ სკოუკროფტი | |
| დუნაბადი | 27 მესი, 1923 ფიურთი, ბავარია, გერმანია | |
| ნაღურა | 29 გერგობათუთა, 2023 (100 წანერი) კენტი, კონექტიკუტი, ააშ | |
| ნთხორუ აბანი | არლინგტონიშ ნაციონალური სასაფლა | |
| მენოღალობა |  ააშ (1943 წანაშე) | |
| ერუანობა | ამერიკალი | |
| პოლიტიკური პარტია | რესპუბლიკური პარტია | |
| ალმასქუ | 1. ენ ფლეშერი 2. ნენსი მაგინესი | |
| სქუალეფი | 2 | |
| გონათაფა | სითი-კოლეჯი ჰარვარდიშ უნივერსიტეტი | |
| საქვარუა | დიპლომატი, პოლიტიკოსი, პოლიტოლოგი | |
| ჯილდოეფი | ნობელიშ პრემია თინჩალაშ დარგის (1973) დუდიშალაშ ოპრეზიდენტე მენდალი (1977) ერუანული წინგიშ პრემია (1980) დუდიშალაშ მენდალი (1986) სილვანუს ტეიერიშ პრემია (2000) პრეზიდენტიშ მენდალი (2012) | |
| ხეშმოჭარუა |  | |
დებადჷ ბავარიაშ ნოღა ფიურთის, გერმანალი ურიეფიშ ფანიას. მუჟამსჷთ ნაცისტეფქ ურიეფიშ თხოზინი ქიდიჭყესინჷ, კისინჯერეფქ გერმანია ქიდიტეს დო ოცხოვრებშა ამერიკაშა გეგნორთეს. მაჟირა მოსოფელიშ ლჷმაშ ბორჯის, ახალნორდი კისინჯერი ნინალენდჷ ამერიკაშ აკოანჯარაფილი ნძალეფს. ლჷმაშ თებაშ უკულ გემშართჷ ჰარვარდიშ უნივერსიტეტიშა, სოდეთ დუდი გიმირჩქინუ მუჭოთ ნიჭიერი დო აქტიური სტუდენტიქ. უკულიანი პერიოდეფს კისინჯერქ უნივერსიტეტიშ პროფესორობას ქიმიოჭირინუ დო მიპალუ საირქიანო რეპუტაცია მუჭოთ გვირზილური ანჯარიშ დო გალენური პოლიტიკაშ შანულამი ექსპერტიქ. ჰენრი კისინჯერი რდჷ ამერიკაშ ფედერალური თარობაშ შხვადოშხვა სააგენტოეფიშ დო ანალიტიკური ცენტრეფიშ კონსულტანტი. თიში პოლიტიკური კონსულტაციეფით სარგებლენდეს ნელსონ როკფელერი დო რიჩარდ ნიქსონი. 1969 წანას ნიქსონქ კისინჯერი ქუდარინუ ერუანული უშქურანჯობაშ ელმაჩამალო დო უკულ, 1973 წანას, ააშ-იშ სახენწჷფო მელამოსეთ.
მუჭოთ რეალპოლიტიკიშ ადვოკატიქ, კისინჯერქ მიშეღჷ კაბეტი თია დეტანტიშ პოლიტიკაშ გოვითარაფაშა სხუნუეთიწკჷმა დო ურთიართალაშ გაუჯგუშებაშა ჩინეთიწკჷმა. თაშნეშე, კისინჯერქ მიშეღჷ შანულამი თია იომ-ქიფურიშ ლჷმაშ თებაშა არხო ბჟაეიოლს დო პარიზიშ ოთინჩალე ხეკულუაშ დოდვალაშა. ჸათე ხეკულუაშ ნძალათ ამერიკაქ გეგშართჷ ვიეტნამშე. პარიზიშ ხეკულუაშ დოდვალაშა მიშაღალირი თიაშ გეშა, კისინჯერს 1973 წანას გინოჩეს ნობელიშ პრემია თინჩალაშ დარგის. თაშნეშე, ჰენრი კისინჯერი ასოცირაფილი რე ნამთინე ოდებელი პოლიტიკური გინოჭყვიდირიწკჷმა. მაგალთო ჸათეცალეფიე: ვიეტნამიშ ლჷმაშ მიმალობას კამბოჯაშ ტერიტორიეფიშ ბომბუა, ამერიკაშ ჩარიება ჩილეშ ოურდუმე გინორთას, არგენტინაშ ოურდუმე ხუნტაშა ელარნა, ინდონეზიაშა ხუჯიშ დაკინება ბჟაეიოლი ტიმორიშ ოკუპაციაშ ბორჯის, პაკისტანშა ელარნა ბანგლადეშიშ ლჷმაშ დო ბანგლადეშიშ გენოციდიშ მიმალობას. შხვადოშხვა მარკვიალეფი დო მენცარეფი კისინჯერს ეფექტური სახენწჷფო მელამოსეთ მითმირჩქინანა, მარა თის თაშნეშე ეკმადვანა ლჷმაშ დანაშურეფს.
პოსტიშე ულაშ უკულ, 1982 წანას კისინჯერქ დარსხუ საირქიანო გეოპოლოტიკური საკონსულტაციო კომპანია Kissinger Associates. კისინჯერი რე ავტორი შხვადოშხვა წინგეფიშ, პუბლიკაციეფიშ დო მემუარეფიშ, ნამუეფით ორხველჷ დიპლომატიაშ ისტრიას დო საირქიანო ურთიართობეფს. ჰენრი კისინჯერქ ღურუ 2023 წანაშ 29 გერგობათუთას, 100 წანერქ. დასაფულებური რე არლინგტონიშ ნაციონალური სასაფლას.
რესურსეფი ინტერნეტის
რედაქტირაფა- ოფიციალური ვებსაიტი[ღურელი რსხილი]
- ენციკლოპედია ბრიტანიკა