არიელ შარონი

არიელ შარონი (ურ. אריאל שרון, დ. 26 ფურთუთა, 1928 — ღ. 11 ღურთუთა, 2014) — ისრაელარი ოურდუმე მოღალე დო პოლიტიკოსი, ისრაელიშ მა-11 პრემიერ-მინისტრი 2001-2006 წანეფს.

არიელ შარონი אריאל שרון
შარონი 2001 წანას
ისრაელიშ მა-11 პრემიერ-მინისტრი
პოსტის გერინაშ ბორჯი
7 მელახი, 2001 – 14 პირელი, 2006
პრეზიდენტი	მოშე კაცავი
წიმოხონი	ეჰუდ ბარაკი
მონძე	ეჰუდ ოლმერტი
გალენური საქვარეფიშ მინისტრი
პოსტის გერინაშ ბორჯი
13 გჷმათუთა, 1998 – 6 მანგი, 1999
წიმოხონი	დავიდ ლევი
მონძე	დავიდ ლევი
დუდთხილუაშ მინისტრი
პოსტის გერინაშ ბორჯი
26 მელახი, 1981 – 6 გჷმათუთა, 1983
წიმოხონი	მენახემ ბეგინი
მონძე	მოშე არენსი
დუნაბადი	26 ფურთუთა, 1928 კფარ-მალალი, პალესტინა
ნაღურა	11 ღურთუთა, 2014 (85 წანერი) რამათ-განი, ისრაელი
მენოღალობა	ისრაელი
პოლიტიკური პარტია	ლიბერალური პარტია (1973-1974) შლომციონი (1977) ლიკუდი (1977-2005) კადიმა (2005 წანაშე)
ალმასქუ	1. მარგალიტ ციმერმანი 2. ლილი ციმერმანი
სქუალეფი	3
გონათაფა	იერუსალიმიშ ურიული უნივერსიტეტი თელ-ავივიშ უნივერსიტეტი
პროფესია	ოფიცერი
რელიგია	იუდაიზმი
ხეშმოჭარუა

დებადჷ კფარ-მალალის, რუსი-ურიეფიშ ფანიას. ისრაელიშ არმიაშ გოჭყაფაშ უკულ, ნინალენდჷ ისრაელიშ აკოანჯარაფილი ნძალეფს დო მონაწილენდჷ პალესტინაშ ლჷმას (1947-1949), სუეციშ ლჷმას (1956), ამშვდღამი ლჷმას (1967), იომ-ქიფურიშ ლჷმას (1973). შარონიქ დუდი გიმირჩქინჷ მუჭოთ ნიჭიერი ოურდუმე მოღალექ. ოურდუმე კარიერაშ მეტებაშ უკულ, პოლიტიკას ქაკათჷ დო გინირთჷ ლიკუდიშ პარტიაშ მაკათურო. 1970-იან წანეფიშე შარონს უკინებუდჷ შხვადოშხვა შანულამი პოსტეფი ისრაელიშ თარობას. რდჷ ოფუტეშ მეურნობაშ მინისტრი (1977-1981), დუდთხილუაშ მინისტრი (1981-1983), ინდუსტრიაშ მინისტრი (1984-1990), გალენური საქვარეფიშ მინისტრი (1998-1999).

შარონიშ დუდთხილუაშ მინისტრობაშ ბორჯის, მოხვადჷ ლიბანიშა მიშაჭკირუაქ. ლიბანიშ ლჷმაშ მიმალობას, 1982 წანაშ 16-18 ეკენიას, ქირსიანი ლიბანარეფქ, ისრაელიშ არმიაშ ალარინათ, მანწყუეს პალესტინარეფიშ დო შიიტი ლიბანარეფიშ მასობური ზღოდუა ბეირუთის. ოფიციალური გჷმორკვიებეფით შარონს ოხვილური ზომეფი ვემუღებუ ტრაგედიაშ ეიოჩილითაფარო. ართი წანაშ უკულ, შარონქ მინისტრიშ პოსტიშე გეგნოდირთჷ მარა თინა იშენ სქიდუდჷ ბეგინიშ თარობას, მუჭოთ მინისტრი პორტფელიშ უმუშო.

1999 წანას შარონქ ლიკუდიშ ლიდერო გინირთჷ. 2001 წანას თინა მონაწილენდჷ პრემიერ-მინისტრობაშ გიშაგორუეფს. შარონქ ავოდაშ კანდიდატი ეჰუდ ბარაკი დამარცხჷ დო პრემიერ-მინისტრო გინირთჷ. ლიკუდიშ პარტიაშ დინახალე შარონიშ პოლიტიკური პოზიციეფს სერიოზული ოპოზიციური მიმალობაქ შეხვადუ. ჸათეშ გეშათ, 2005 წანას თიქ ლიკუდი ქიდიტუ დო ქუდარსხუ მუში პარტია კადიმა. 2006 წანაშ 4 ღურთუთას, შარონქ მიღუ ინსულტი დო კომას ქინანთხუ. კომას თინა რდჷ ბრუო წანაშ გოძვენას. არიელ შარონქ ღურუ 2014 წანაშ 11 ღურთუთას, 85 წანერქ.

არიელ შარონი ოდებელი ფიგურა არხო ბჟაეიოლს. ურიეფი თის პატრიოტო დო უდიდაში ოურდუმე მოღალეთ მითმირჩქინანა. მუჟამსჷთ პალესტინარეფი დო საირქიანო ორგანიზაციეფი (მაგალთო Human Rights Watch) აკრიტიკენა ლჷმაშ დანაშურეფიშ გეშა.

ქოძირით თაშნეშე

• ისრაელიშ პრემიერ-მინისტრეფიშ ერკებული

ლიტერატურა

• ენციკლოპედია ბრიტანიკა