გალეფიშ იმპერია
გალეფიშ იმპერია (ლათ. Imperium Galliarum) — თეხანური ჯოხოდვალა სეპარატისტული ზოხორინელი სახენწჷფოშ, ნამუთ არსებენდჷ რომიშ იმპერიაშ მასუმა ოშწანურაშ კრიზისიშ მიმალობას, 260-274 წანეფს. ტერიტორიული ექსპანსიაშ პიკის იმპერიაშ აკოდგინალუაშა მიშმეშჷ გალია, გერმანია, ბრიტანეთი დო ესპანეთი.
|
გალეფიშ იმპერია | ||||
| ||||
|---|---|---|---|---|
 გალეფიშ იმპერია (ლენი ფერით) 262 წანას, პოსტუმუსიშ მართუალაშ ბორჯის | ||||
| ნანანოღა | კოლონია-აგრიპინა (260-271) ავგუსტა ტრევერორუმი (271-274) | |||
| ნინა | ლათინური (ოფიციალური) | |||
| დუდალაშ ფორმა | ავტოკრატია | |||
| იმპერატორი | ||||
| - 260-269 | პოსტუმუსი | |||
| - 269 | მარიუსი | |||
| - 269-270 | ვიქტორინუსი | |||
| - 270-274 | ტეტრიკუს I | |||
ისტორია
რედაქტირაფა260 წანას, ედესაშ ლჷმას სასანიანეფიშ იმპერიაშ შაჰინშაჰიქ შაპურ I-ქ კონწარო დამარცხჷ რომიშ არმია დო იმპერატორი ვალერიანე ტყვეთ ხეშა ქაშეჸოთჷ. ვალერიანეშ მონძე რდჷ გალიენუსი, ნამუშ პოზიციეფი იმპერიაშ მასშტაბით დაღარი რდჷ. 260-იან წანეფს ძალამს გენძალიერჷ პალმირაშ მამართალქ ოდენატექ, ნამუქჷთ ქიდეკინჷ სირია, ეგვიპტე, იუდეა დო არაბეთი. ფორმალურო თინა რომს ომორჩილჷდჷ, მარა რეალურო რდჷ ზოხორინელი მამართალი.
რომიშ პროვინცია პანონიაშ მამართალეფქ ხოლო ქისარგებლეს რომიშ იმპერიაშ კრიზისით დო ეარყეს. იმპერატორქ რომი ქიდიტუ დო ჯარეფით პანონიაშა მიდართჷ. ჸათე ბორჯის, პოსტუმუსიქ, ნამუთ ხემანჯღვერენდჷ ჟიმოლენი დო თუდოლენი გერმანიაშ პროვინციეფს, მიპალუ სერიოზული გოლინა, კონწარო დამარცხჷ ფრანკეფი დო ხოლო უმოსო განძალიერჷ მუში პოლიტიკური პოზიცია. ჸათე პერიოდის, გალიენუსიშ სქუა სალონინუსი კოლონია-აგრიპინას (თეხანური კელნი) ტყობუდჷ. 260 წანას, პოსტუმუსიქ მუში ჯარეფით კოლონია-აგრიპინა ქართას (ალყა) ქინახუნუ, ოჭოფუ სალონინუსი დო ღურათ დასაჯჷ.
პოსტუმუსიქ გაჭყჷ ინსტიტუციეფი ნამუეფით რომიშ იმპერიაშ ცენტრალური თარობაშ ინსტიტუციეფიშ მოგვენი რდჷ. მაგალთო პრეტორიანალეფიშ გვარდია, სენატი, ირ წანას გიშმაგორუნდეს ჟირი კონსულს. პოსტუმუსიქ მუში იმპერიაშ ნანანოღათ კოლონია-აგრიპინა გეგმაცხადჷ. 263 წანას გალიენუსიქ მინდომუ გალეფიშ იმპერიაშ დოჸუნაფა, მარა თიში ჸათე ცადებას მუთუნნერი შედეგიქ ვამაჸუნჷ. 269 წანას პოსტუმუსიშ მეხჷ ეარყჷ ლელიანექ. მოგონტიაკუმს (თეხანური მაინცი) თინა იმპერატორო გეგმაცხადეს მუში ლეგიონეფქ. საგამათ, პოსტუმუსიქ მანწყუ წჷმოძინელი ოურდუმე კამპანია, გეჭოფუ მოგონტიაკუმი დო დოჸვილჷ ლელიანე. პოსტუმუსიქ ჯარიშკოჩეფს ნოღაშ რჩუალაშ ნება ვემეჩუ. ჸათეშ გეშათ, უკმაყოფილე ჯარიშკოჩეფქ ეარყეს დო პოსტუმუსი დოჸვილეს. პოსტუმუსიშ უკულ, გალეფიშ იმპერიაქ დედაღარჷ დო შანულამი ტერიტორიეფი მიოდინუ. 274 წანას რომიშ იმპერატორქ ავრელიანექ გემშეჭკირჷ დო შალონიშ ლჷმას დამარცხჷ გალეფიშ იმპერიაშ ეკონია მამართალი ტეტრიკუს I. გალეფიშ იმპერიაშ ტერიტორიეფქ კინ რომიშ აკოდგინალუაშა მიშელჷ.