გარდა (ტობა)

გარდა (იტალ. Lago di Garda ვარა Benaco) — იტალიაშ უდიდაში ტობა. იდვალუაფუ ქიანაშ ოორუე ნორთის, ბრეშას დო ვერონას, თაშნეშე ვენეციას დო მილანს შქას. თე რეგიონს ჯიშთეფქ ეკონია აკოჸინალუაშ დალიერს იფორმირჷ. ტობა დო მუში წყარპიჯი ვერონაშ, ბრეშაშ დო ტრენტოშ პროვინციეფს შქას ირთუ. ტობაშა ეფას მიჭირინდე ოორუეშე, ბრენერიშ ჸალაიბონიშ გოულათ, მუშ გეშათ თინა ძალამი შანულამი ტურისტული აბანი რე დო მუშ წყარპიჯეფს იდვალუაფუ მიარე მაართახარისხამი სასუმარო დო კურორტი.

გარდა Lago di Garda
ნაგო-ტორბოლეს კომუნა დო ტობაშ ოორუე ნორთი
დოხასიათაფა
კოორდინატეფი	45°38′00″ ო. გ. 10°40′00″ ელ. გ.
ქიანა	იტალია
სიგინძა	51,9 კმ
სიგანა	16,7 კმ
ფართობი	369,98 კმ²
მაქსიმალური სიტომბა	346 მ
ოშქაშე სიტომბა	136 მ
ინმალი წყარმალუ	სარკა
გუშმალი წყარმალუ	მინჩო

გეოგრაფია

ტობაშ ოორუე ნორთი არძაშე ონჭირე რე დო გოხურგილი რე გვალეფით, ნამუეფიშ უმეტაშობა გრუპო-დელ-ბალდოშ მასივს ორხველჷ. ტობაშ მოღოზილუა ტიპიური რე მორენული ლეხერშო დო ოეგებიეთ იფორმირჷ ჯიშთეფიშ გოლინათ პალეოლითიშ ხანას. თიშ უმკუჯინუო, ნამდა ჯიშთეფიშ ძირაფა ამდღა ხოლო შილებე, ეკონია წანეფს წჷმარინუანა ჰიპოთეზას, ნამუშ მეჯინათ ჯიშთეფს უმოს წოხლე არსებული დეპრესია უკინებუდეს, ნამუთ მალობაშ ეროზიაქ აკოქიმინჷ 5-6 მილიონი წანაშ წოხოლე.

ტობას მილარე მიარე ჭიჭე კოკი, თენეფშე არძაშე თარეფ შქას რე ხუთი, ნამუეფ შქას უდიდაში რე იზოლა-დელ-გარდა. თეწკჷმა ხოლოს, ობჟათეშე იდვალუაფუ იზოლა-სან-ბიაჯო, მაჟირანერო იზოლა-დეე-კონიგლი (ყურდგელეფიშ კოკი). ჟირხოლო კოკიშ გოხოლუას, ბჟადალშე იდვალუაფუ კოკი სან-ფელიჩე-დელ-ბენაკო. ტობაშა ინმალი თარი წყარმალუ რე სარკა, გუშულათ ხვალე ართუ გუშმურს — მინჩო.

კურორტეფი დო ძეგლეფი

ტობაშ ობჟათეშე იდვალუაფუ უჯვეშაში დუდიშოთხილუ ნოღა სირმიონე, ნამუთ ამდღა გჷშაკერძაფილო პოპულარულ ძეგლის წჷმარინუანს. თაქ რე მიარე სასუმარო, რესტორანი, ბარი, მოდაშ სალონი დო მაღაზია. ქვერსემი სკალიგერიშ ჯიხაზურგა XIII ოშწანურათ ითარიღებუ. თაქ ვილა უღუდჷ რომალ პოეტ კატულს. მაძირაფუეფს შეულებუნა რომაული აბანოშ აკნაციმეფიშ დოთოლორაფა, ნამუსჷთ გროტე-დი-კატულო ჯოხო, თიშ უმკუჯინუო, ნამდა ვა რე ჩინებული მუთუნნერი ტკიცალუა, ნამდა თე ნოდგჷმს პოეტიწკჷმა მოირსხუანს. ტობაშა მიშაჭკირილი ჩქონიშ წვანდის გუშმურს წურწუფაშ წყარეფი, ნამუეფსჷთ ოკურნალებერო გჷმირინუანა. თიშ გოხოლუას იდვალუაფუ გარდალენდი — ართ-ართი არძაშე ჩინებული თემატური პარკი იტალიას.

გალერეა

View of south lake near Peschiera del Garda (Verona, Italy) (probably with Lake Frassino or River Mincio), at the top off the painting are the mountains of Brescia (Italy). Painted after 1533 by Girolamo dai Libri.