დილჰან ერიურთი

დილჰან ერიურთი (თურქ. Dilhan Eryurt; დ. 29 გერგობათუთა, 1926, იზმირი, თურქეთი — ღ. 13 ეკენია, 2012, ანკარა, თურქეთი) — თურქი ასტროფიზიკოსი. უმოსო გურაფულენდჷ ბჟას, თიშ ფორმაციაშ პროცესეფს დო ევოლუციურ გოვითარაფას.

დილჰან ერიურთი
თურქ. Dilhan Eryurt
დილჰან ერიურთიშ ბიუსტი ბოდრუმს
დაბადებაშ თარიღი:	29 გერგობათუთა, 1926
დაბადებაშ აბანი:	იზმირი, თურქეთი
ღურაშ თარიღი:	ეკენია 13, 2012 (85 წანერი)
ღურაშ აბანი:	ანკარა, თურქეთი
მენოღალობა:	თურქეთი
ომენცარე სფერო:	ასტროფიზიკა
სამუშაშ აბანი :	ინდიანაშ უნივერსიტეტი გოეთე ლინკიშ ობსერვატორია კოსმოსური რკვიებეფიშ გოდარდიშ ინსტიტუტი შქა ბჟაეიოლიშ ტექნიკური უნივერსიტეტი ნასა
ალმა-მატერი:	სტამბოლიშ უნივერსიტეტი მიჩიგანიშ უნივერსიტეტი ანკარაშ უნივერსიტეტი
ჯილდოეფი დო პრემიეფი:	Apollo Achievement Award (1969) TÜBİTAK-იშ ომენცარე პრემია (1977)

ბიოგრაფია დო მენცარული რკვიებეფი

დილჰან ერიურთი გურაფულენდჷ ასტრონომიას სტამბოლიშ უნივერსიტეტის, ნამუთ გათუ 1946 წანას. უკულ გურაფა გაგინძორჷ მიჩიგანიშ უნივერსიტეტის. ოდოქტორე დისერტაცია თხილუ ანკარაშ უნივერსიტეტის 1953 წანას. 1959 წანას ერიურთიქ საირქიანო ატომური ენერგიაშ სააგენტოშ სტიპენდიათ კანადაშა მიდართჷ, სოდეთ გიშარჩქინელი ამერიკალი-კანადარი ასტროფიზიკოსი ალასტერ კამერონიწკჷმა მუშენდჷ. ერიურთიქ კანადას ჟირ წანას ქუდოსკიდჷ დო უკულ ოცხოვრებშა დო ომუშებუშა ამერიკაშა გეგნორთჷ. ამერიკას ერიურთიქ მუშობა ქიდიჭყჷ ინდიანაშ უნივერსიტეტის. ჸათე პერიოდის იმუშუ გოეთე ლინკიშ ობსერვატორიას ხოლო. ობსერვატორიაშ მუშობაშ ბორჯის ერიურთიქ გიმირკვიუ მურიცხული მოდელეფი დო აკეთჷ თინეფიშ იდენტიფიკაცია. მალას ერიურთიქ ომუშებუშა გეგნორთჷ ნასაშ კოსმოსური რკვიებეფიშ გოდარდიშ ინსტიტუტიშა, სოდეთ ერიურთი გურაფულენდჷ ბჟაშ ფორმაციას დო ევოლუციას. ჸათე პერიოდის ერიურთი რდჷ ხვალე ართი ოსური, ნამუთ მუშენდჷ გოდარდიშ ინსტიტუტის. დილჰან ერიურთი, 1960-იან წანეფიშ დაჭყაფუს, ოკათუდჷ ნასაშ მისიეფიშ მენცარულ რკვიებეფს. ერიურთიქ მიშეღჷ დიდი მენცარული კონტრიბუცია ნასაშ აპოლო 11-იშ მისიაშა. დილჰან ერიურთიქ ართ პერიოდის იმუშუ კალიფორნიაშ უნივერსიტეტის ხოლო. 1968 წანას დილჰან ერიურთიქ თურქეთშა დირთჷ დო დარსხუ თურქეთიშ ერუანული ასტრონომიული კონგრესი, თურქეთიშ მენცარული დო ტექნოლოგიური რკვიებეფიშ სხუნუშ ხეშენწყუალათ. 1969-1973 წანეფს ერიურთი კინ ნასას მუშენდჷ. 1973 წანას ერიურთიქ ომუშებუშა გეგნორთჷ ანკარაშ შქა ბჟაეიოლიშ ტექნიკური უნივერსიტეტიშა, სოდეთ დარსხუ ასტროფიზიკაშ დეპარტამენტი. 1977 წანას თურქეთიშ მენცარული დო ტექნოლოგიური რკვიებეფიშ სხუნუქ (TÜBİTAK) ერიურთის გინოჩჷ ომენცარე პრემია. 1988-1993 წანეფს ერიურთი რდჷ შქა ბჟაეიოლიშ ტექნიკური უნივერსიტეტიშ მენცარობაშ დო ლიტერატურაშ ფაკულტეტიშ დეკანი. 1993 წანას ერიურთიქ პენსიაშა მიდართჷ. დილჰან ერიურთიქ ღური 2012 წანაშ 13 ეკენიას, გურიშ ლახარათ.

რესურსეფი ინტერნეტის

• ბიოგრაფიული ფაქტეფი
• დილჰან ერიურთი (1926–2012) Rubinero-ს (პორტუგალიურო)