ვალტერ ულბრიხტი
ვალტერ ერნსტ პაულ ულბრიხტი (გერმ. Walter Ernst Paul Ulbricht; დ. 30 მანგი, 1893 — ღ. 1 მარაშინათუთა, 1973) — გერმანალი კომუნისტი პოლიტიკოსი. თიქ მიშეღჷ კაბეტი თია გერმანიაშ კომუნისტური პარტიაშ (გკპ) დორსხუაფაშა დო გერმანიაშ დემოკრატიული რესპუბლიკაშ (გდრ) გოჭყაფაშა.
.jpg)
ვალტერ ულბრიხტიქ პოლიტიკური კარიერა 1910-იან წანეფს დიჭყჷ. 1912 წანას ქაკათჷ გერმანიაშ სოციალ-დემოკრატიული პარტიას (გსდპ). 1917 წანას, გინირთჷ გერმანიაშ დუდიშული სოციალ-დემოკრატიული პარტიაშ (გდსდპ) მაკათურო. ულბრიხტი 1915 წანაშე მონაწილენდჷ მაართა მოსოფელიშ ლჷმას, მარა 1918 წანაშე თიქ გერმანული არმია ქიდიტუ დო ხუჯი დუკინჷ გერგობათუთაშ რევოლუციას. 1920 წანას ულბრიხტიქ გერმანიაშ კომუნისტური პარტიას ქაკათჷ დო პარტიაშ დინახალე ხელათ მიპალუ პოპულარობა. 1923 წანაშე ნინალენდჷ პარტიაშ ცენტრალური კომიტეტის. გერმანიაშ თარობაშა ნაცისტეფიშ მულაშ უკულ, ულბრიხტიქ ქიანა ქიდიტუ დო ოცხოვრებშა ურცხოეთიშა მიდართჷ. ურცხოეთის თინა დიო პარიზის ცხოვრენდჷ, უკულ პრაღას. 1937-1945 წანეფს სხუნუეთის რდჷ.
მაჟირა მოსოფელიშ ლჷმაშ თებაშ უკულ, გერმანიაშა დირთჷ დო კინ გაგინძორჷ პოლიტიკური აქტივობა სხუნუეთიშ საოკუპაციო ზონას. თიში ინიციატივათ, 1946 წანას აკიართიანჷ გკპ-ქ დო გსდპ-ქ. ჸათე პარტიეფიშ გოართოიანაფათ იფორმირჷ გერმანიაშ სოციალისტური ართოიანობაშ პარტიაქ (გსაპ). ულბრიხტიქ გინირთჷ გსაპ-იშ მაართა მელამოსეთ დო 1950 წანაშე — გდრ-შ ეფექტური ლიდერო. 1953 წანაშ 16-17 ივანობას, მუჟამსჷთ არდგილი უღუდჷ ანტი-სხუნუური არყებეფს, ულბრიხტიქ სხუნუეთიშ არმიაშ შტაბ-ორენს, კარლსჰორსტის დიტყობუ. სხუნუეთიშ ტანკეფქ არყება ზისხირს ქინაშკვიდეს. ჟირი წანაშ უკულ, გდრ-ქ გინირთჷ ვარშავაშ პაქტიშ მაკათური ქიანათ.
ულბრიხტი მეთხოზუდჷ ინდუსტრიაშ ნაციონალიზაციაშ პოლიტიკას. ჸათე პოლიტიკაშ შედეგო გეუფრაშჷ ცხოვრებაშ დონექ დო ქიმიძინჷ ემიგრაციაქ. ოში ანთასობათ ადამიერქ გდრ ქიდიტუ დო გფრ-შა ინტუ. ჸათე პრობლემაშ გინაჭყვიდალო 1961 წანას ეიოგეს ბერლინიშ კიდა, ნამუშ ართ-ართი თარი ორგანიზატორი ულბრიხტი რდჷ. ბერლინიშ კიდაქ გიმიჭანუ დიპლომატიური კრიზისი, მარა ემიგრაცია ეფექტურო გაჩერჷ. 1960-1970-იან წანეფს, ულბრიხტიშ წჷმოჭყაფილი ახალი ეკონომიკური სისტემას დო სოციალიზმიშ ეკონომიკური სისტემას გდრ-შო მუთუნნერი წჷმოძინეფი ვამუღალუ. ჸათე ნეგატიური შედეგეფიშ გეშა, თინა მაართა მელამოსეშ პოსტიშე გეგნარინეს, 1971 წანას. სხუნუეთიშ ალარინათ, ულბრიხტი დოთირუ ერიხ ჰონეკერქ.