ვილი ბრანდტი
ვილი ბრანდტი (გერმ. Willy Brandt; დაბადებაშ ჯოხო ჰერბერტ ერნსტ კარლ ფრამი, გერმ. Herbert Ernst Karl Frahm; დ. 18 ქირსეთუთა, 1913 — ღ. 8 გჷმათუთა, 1992) — გერმანალი პოლიტიკოსი, გერმანიაშ სოციალ-დემოკრატიული პარტიაშ ლიდერი 1964-1987 წანეფს დო გფრ-შ კანცლერი 1969-1974 წანეფს, ნობელიშ პრემიაშ ლაურეატი თინჩალაშ დარგის, 1971 წანას.
გერმანიაშ თარობაშა ნაცისტეფიშ მულაშ უკულ, ბრანდტიქ ქიანა ქიდიტუ დო ოცხოვრებშა ნორვეგიაშა მიდართჷ. ჸათაქ თიქ ჯოხოთ ვილი ბრანდტი ქიგიდჷ დო ჟურნალისტური კარიერა ქიდიჭყჷ. მარა მუჟამსჷთ გერმანიაქ ნორვეგიაშ ანექსია აკეთუნჷ, ბრანდტის ნორვეგიაქ ხოლო დატებელქ აჸუ. ბრანდტიქ შვედეთიშა ინტუ დო მაჟირა მოსოფელიშ ლჷმაშ მიმალობას თე ქიანას სკიდუდჷ. ლჷმაშ თებაშ უკულ, ბრანდტიქ გერმანიაშა დირთჷ დო მუშენდჷ პრეს-ატაშეთ ნორვეგიაშ დიპლომატიური მისიას. უკულ ბრანდტიქ გერმანიაშ მენოღალობა მიპალუ დო აქტიურო ქაკათჷ გერმანული პოლიტიკას. 1949 წანას გინირთჷ ფედერალური პარლამენტიშ მაკათურო. ბრუო წანაშ უკულ, 1957 წანას თიქ გიშაგორილქ იჸუ ბჟადალი ბერლინიშ მერო. ჸათე პოსტის გერინაშ ბორჯის, თიქ საირქიანო პოპულარობა მიპალუ. 1964 წანას ბრანდტიქ დოთირუ ერიხ ოლენჰაუერი დო ქიდეკინჷ გერმანიაშ სოციალ-დემოკრატიული პარტიაშ დუდმახვენჯიშ პოსტი.
1966 წანას, მუჟამსჷთ იფორმირჷ გერმანიაშ ქირსიან-დემოკრატიული რსხუშ (გქდრ) დო გერმანიაშ სოციალ-დემოკრატიული პარტიაშ (გსდპ) კაბეტი კოალიციაქინჷ, ბრანდტიქ გინირთჷ გალენური საქვარეფიშ მინისტრო დო ვიცე-კანცლერო. 1969 წანაშ ფედერალური გიშაგორუეფს, ბრანდტიშ პარტიაქ სერიოზული წჷმოძინეფს მიოჭირინუ დო პოზიციეფი გეუჯგუშჷ. ბრანდტიშ პარტიაქ უკულ გაჭყჷ ოთარობე კოალიცია მორჩილი დუდიშული დემოკრატიული პარტიაწკჷმა. შედეგო გქდრ-ქ მუში არსებობაშ გოძვენას მაართათ, ოპოზიციაშა გინილჷ.
კანცლერობაშ ბორჯის, ბრანდტი ოცადუდჷ ურთიართალაშ გაუჯგუშებას გდრწკჷმა, სხუნუეთიწკჷმა დო შხვა კომუნისტური სახენწჷფოეფიწკჷმა. ბრანდტიშ ჸათე პოლიტიკა შინელი რე მუჭოთ "Ostpolitik" (ბჟაეიოლიშ პოლიტიკა). 1970 წანაშ მარაშინათუთას გფრ-ქ დო სხუნუეთიქ ქუდოდვეს ოთინჩალე ხეკულუა, ნამუშ ნძალათ ჟირხოლო აკანი ვარიას ურაგადუდჷ ნძალობური პოლიტიკას დო ჩინებულენდჷ თიხანური ევროპული სანძღოეფს. 1970 წანაშ ქირსეთუთას გფრ-ქ პოლონეთიწკჷმა გაფორმჷ ვა-აგრესიული ხეკულუა დო ქიჩინჷ ოდერი-ნისაშ ღოზი, მუჭოთ პოლონეთიშ ბჟადალი ხურგი. ბრანდტიშ ჸათე პოლიტიკას კრიტიკაქ მაჸუნჷ. კრიტიკოსეფიშ აზრით, ბრანდტიქ პოლონეთის სადღამუშოთ დუთმუ მაჟირა მოსოფელიშ ლჷმაშ უკულ გერმანიაშა მიდაღალირი გერმანული ტერიტორიეფი. ოთინჩალე პოლიტიკაშ გეშა, 1971 წანას ბრანდტის გინოჩეს ნობელიშ პრემია თინჩალაშ დარგის.
ბრანდტი რდჷ გოართოიანაფილი ევროპაშ ადვოკატი. თიში ინიციატივათ დო ცადებეფით, საფრანგეთიქ პოზიცია დითირუ დო ევროპაშ ეკონომიკური წორომაჸალობაშა მიშელეს ბრიტანეთიქ დო ევროპაშ შხვა ქიანეფქ.
1974 წანას, გიმირკვიუ ნამდა ბრანდტიშ მელამოსე გიუნტერ გიიომი ჸოფე შტაზიშ აგენტი. ჸათეშ გეშათ, თე წანაშ მესის ბრანდტიქ კანცლერიშ პოსტიშე გეგნოდირთჷ. მარა თინა იშენ სკიდუდჷ გსდპ-შ დუდმახვენჯო. ჸათე პოსტი თის 1987 წანაშახ უკებუდჷ. 1976-1992 წანეფს ბრანდტი რდჷ სოციალისტური ინტერნაციონალიშ (ერუანული სოციალისტური პარტიეფიშ ასოციაცია) მადუდე. 1979 წანაშე ბრანდტი დუდენდჷ დუდიშული კომისიას (ბრანდტიშ კომისია) ნამუშ ღანკი მოსოფელიშ ეკონომიკური პოლიტიკაშ რკვიება რდჷ.