ისიდორ ისააკ რაბი

ისიდორ ისააკ რაბი (ინგლ. Isidor Isaac Rabi; დ. 29 კვირკვე, 1898, რიმანუვი, გალიციაშ დო ლოდომერიაშ ომაფე, ავსტრია-უნგრეთიშ იმპერია (ასეიან პოლონეთი) — ღ. 11 ღურთუთა, 1988, ნიუ-იორკი, ააშ) — ამერიკალი ფიზიკოსი. გვირზილური ჭაჭმენტური რეზონანსიშ ძირაფაშ დო დოგურაფაშ გეშა გინოჩეს ნობელიშ პრემია ფიზიკაშ დარგის, 1944 წანას. ისიდორ ისააკ რაბი რდჷ ართ-ართი მაართა ამერიკალი მენცარი, ნამუთ გურაფულენდჷ ჭაჭმენტრონიშ სტრუქტურას დო ფუნქციეფს.

ისიდორ ისააკ რაბი
ინგლ. Isidor Isaac Rabi
ისიდორ ისააკ რაბი 1944 წანას
დაბადებაშ თარიღი:	29 კვირკვე, 1898
დაბადებაშ აბანი:	რიმანუვი, გალიციაშ დო ლოდომერიაშ ომაფე, ავსტრია-უნგრეთიშ იმპერია (ასეიან პოლონეთი)
ღურაშ თარიღი:	ღურთუთა 11, 1988 (89 წანერი)
ღურაშ აბანი:	ნიუ-იორკი, ააშ
მენოღალობა:	ააშ
ომენცარე სფერო:	ფიზიკა
სამუშაშ აბანი :	კოლუმბიაშ უნივერსიტეტი მასაჩუსეტსიშ ტექნოლოგიაშ ინსტიტუტი
ალმა-მატერი:	კორნელიშ უნივერსიტეტი (BS) კოლუმბიაშ უნივერსიტეტი (MS, PhD)
ომენცარე ხემანჯღვერი:	ალბერტ პოტერ უილსი
ჯოხოშინელი მოგურაფეეფი:	ჯულიან შვინგერი ნორმან ფოსტერ რამზეი მარტინ ლუის პერლი ჰაროლდ ბრაუნი
ჯილდოეფი დო პრემიეფი:	ნიუკომ კლივლენდიშ პრემია (1939) ელიოტ კრესონიშ მენდალი (1942) ნობელიშ პრემია ფიზიკას (1944) Medal for Merit (1948) Legion of Honour (1956) ბარნარდიშ მენდალი (1960) ნილს ბორიშ ორქოშ მენდალი (1967) Atoms for Peace Award (1967) ერსტედიშ მენდალი (1982) Four Freedoms Award (1985) Public Welfare Medal (1985) ვენივარ ბუშიშ პრემია (1986)
ხეშმოჭარუა:

ბიოგრაფია

ისიდორ ისააკ რაბიქ დებადჷ რიმანუვის, გალიციაშ დო ლოდომერიაშ ომაფეს, ავსტრია-უნგრეთიშ იმპერიას (ასეიან პოლონეთი), პოლონარი ურიეფიშ ფანიას. ისიდორ ისააკი ჭიჭე ბაღანა ჸოფე, თიშ ოჯახის ამერიკაშა გინურთუმჷ ოცხოვრებშან. ისიდორ ისააკ რაბი გურაფულენდჷ კორნელიშ უნივერსიტეტის, ელექტრონულ ინჟინერიას, მარა მალას მიოტუ ელექტრონულ ინჟინერიაშ გურაფა დო დიჭყჷ ქიმიაშ დოგურაფა. უკულ დეინტერესჷ ფიზიკათ ხოლო. კორნელიშ უნივერსიტეტიშ უკულ, გურაფა გაგინძორჷ კოლუმბიაშ უნივერსიტეტის, სოდეთ მიპალუ დიო მენცარობაშ მაგისტრიშ დო უკულ დოქტორიშ ხარისხი. ოდოქტორე დისერტაცია თხილუ შინელი ფიზიკოსიშ ალბერტ პოტერ უილსიშ ხემანჯღვერობათ. 1927 წანას ისიდორ ისააკ რაბიქ ევროპაშა მიდართჷ, სოდეთ თინა მუშენდჷ ბრელ ევროპალ გიშარჩქინელ ფიზიკოსეფწკჷმა. 1929 წანას რაბიქ ამერიკაშა დირთჷ დო ქიდიჭყჷ მუშობა კოლუმბიაშ უნივერსიტეტის. ისიდორ ისააკ რაბიშ ინტერესეფიშ სფერო რდჷ გვირზილური ჭაჭმენტური რეზონანსი, ატომიშ გვირზილი, ჭაჭმენტური მომენტი, რადარეფიშ ტექნოლოგიეფი დო შხვა. მაჟირა მოსოფელიშ ლჷმაშ ბორჯის გურაფლენდჷ რადარეფს, მასაჩუსეტსიშ ტექნოლოგიაშ ინსტიტუტის. რდჷ მანჰეტენიშ პროექტიშ ართ-ართ მაკათური. ლჷმაშ თებაშ უკულ, მუშენდჷ ატომიშ ენერგიაშ კომისიას დო რდჷ თიში დირექტორი 1952-1956 წანეფს. ისიდორ ისააკ რაბი მუშენდჷ ააშ-შ არმიაშ ბალისტიკურ ლაბორატორიას ხოლო დო რდჷ ბრუკჰეივენიშ ერუანული ლაბორატორიაშ ართ-ართ დუმარსხუაფალი 1946 წანას. ისიდორ ისააკ რაბი რდჷ ააშ-შ დელეგატი იუნესკოს. 1964 წანაშე რაბი რდჷ კოლუმბიაშ უნივერსიტეტიშ პროფესორი დო უკულ პროფესორი ემერიტუსი.

პერსონალური რინა

ისიდორ ისააკ რაბიშ ოსური რდჷ ჰელენ ნიუმარკი. ჸუნდეს ჟირი სკუა. ისიდორ ისააკ რაბიქ ღურუ 1988 წანაშ 11 ღურთუთას, კიბოთ. ჰელენ ნიუმარკიქ ღურუ 2005 წანაშ 18 მანგის, 102 წანერქ.

წინგეფი

• Rabi, Isidor Isaac (1960). My Life and Times as a Physicist. Claremont, California: Claremont College.
• Rabi, Isidor Isaac (1970). Science: The Center of Culture. New York: World Publishing Co.
• Rabi, Isidor Isaac; Serber, Robert; Weisskopf, Victor F.; Pais, Abraham; Seaborg, Glenn T. (1969). Oppenheimer: The Story of One of the Most Remarkable Personalities of the 20th Century. Scribner's.

რესურსეფი ინტერნეტის

• Interview with Isidor Isaac Rabi (1986). კითხირიშ თარიღი: March 22, 2016.
• ისიდორ ისააკ რაბი Nobelprize.org-ის
• ისიდორ ისააკ რაბი Mathematics Genealogy Project-ის
• ისიდორ ისააკ რაბი Find a Grave-ს