მავრიკიოსი (ბიზანტია)
ფლავიუს მავრიკიოს ტიბერიუს ავგუსტუსი (ლათ. Flavius Mauricius Tiberius Augustus, ბერძ. Φλάβιος Μαυρίκιος Τιβέριος Αὔγουστος, დ. 539 — ღ. 27 გერგობათუთა, 602) — ბიზანტიაშ იმპერატორი 582-602 წანეფს, იუსტინიანიდეფიშ დინასტიაშ ეკონია წჷმმარინაფალი.
| მავრიკიოსი ლათ. Mauricius ბერძ. Μαυρίκιος | ||
.png) იმპერატორი მავრიკიოსიშ სოლიდუსი | ||
| ბიზანტიაშ იმპერატორი | ||
|---|---|---|
| პოსტის გერინაშ ბორჯი | ||
| 13 მარაშინათუთა, 582 – 27 გერგობათუთა, 602 | ||
| წიმოხონი | ტიბერიუს II | |
| მონძე | ფოკა | |
| დუნაბადი | 539 არაბისუსი, კაპადოკია (ასეიანი აფშინი, ქაჰრამანმარაში, თურქეთი) | |
| ნაღურა | 27 გერგობათუთა, 602 (63 წანერი) კონსტანტინოპოლი, ბიზანტიაშ იმპერია (ასეიანი სტამბოლი, თურქეთი) | |
| მუმა | პავლე | |
| ალმასქუ | კონსტანტინა | |
| სქუალეფი | თეოდოსიუსი, ტიბერიუსი, პეტრე, პავლე, იუსტინე, იუსტინიანე, ანასტასია, თეოკტისტა, კლეოპატრა, მარია (?) | |
| რელიგია | ქალკედონიური ქირსიანობა | |
დუდშე მუშენდჷ ნოტარიუსო. უკულ დიჭყჷ ოურდუმე კარიერა. 578 წანას ქუდარინეს იმპერიაშ ბჟაეიოლი ჯარეფიშ მანჯღვერთარო. ოლიმუდჷ სპარსალეფს დო თინეფიშ მეხჷ მიოჭირინუ შანულამი წჷმოძინეფს. მავრიკიოსიქ მიპალუ კაბეტი პოპულარობა ბიზანტიაშ არმიას. იმპერატორქ ტიბერიუს II-ქ გეგმაცხადჷ მუში მონძეთ დო ცირასქუა კონსტანტინა ქიმიათხუ. 582 წანაშ 13 მარაშინათუთას, მავრიკიოსი იმპერატორო აკურთხეს.
ბჟაეიოლს, მავრიკიოსიქ ბიზანტიაშ გომორძგუათ გასურჷ სპარსეთიწკჷმა ლჷმა, ნამუთ 572 წანაშე იბურჯანდჷ. 589-591 წანეფს სპარსეთის არდგილი უღუდჷ ომენოღალე კონფლიქტის. შაჰი ჰორმიზდ IV-შ მეხჷ ეარყჷ თიში ართი მანჯღვერთარქ ბაჰრამ ჩუბინქ, ნამუქჷთ ჰორმიზდი გეგთარაგუ დო დოჸვილჷ. თიში მონძე ხოსრო II-ქ ბიზანტიაშა ინტუ. მავრიკიოსიშ ალარინათ ხოსროქ ხვისტა დირთინუ. სამანგათ ხოსროქ ბიზანტიას გეგნოჩჷ სომხეთი დო ქართლიშ ბჟადალი ნორთი.
ოორუეს, ბიზანტიაშ იმპერიაშო სერიოზული საფრთხეს წჷმარინუანდეს სლავეფი დო ავარეფი. სპარსეთიწკჷმა თინჩალაშ მეჭირინაფაშ უკულ, მავრიკიოსიქ წიმიჭყჷ ოურდუმე კამპანია თინეფიშ მეხჷ. 599 წანას მავრიკიოსიქ დამარცხჷ დო წყარმალუ დუნაიშ მელე გეგნორაჸუ ავარეფი. ბჟადალს, მავრიკიოსიქ დარსხუ გვერდო-ავტონომიური პროვინციეფი - საეგზარქოსოეფი, ნამუეფსჷთ ეგზარქოსეფი მართუნდეს. 584 წანას გიჭყჷ იტალიაშ საეგზარქოსოქ. თიში გოჭყაფათ იმპერია ოცადუდჷ ლანგობარდეფიშ ექსპანსიაშ გაჩერებას. 591 წანას გიჭყჷ აფრიკაშ საეგზარქოსოქ, ნამუქჷთ განძალიერჷ კონსტანტინოპოლიშ მართუალა ბჟადალი სქირონაშქა ზუღაშპიჯეთის. ეგზარქოსეფს უკინებუდეს მუჭოთ ოურდუმე, თაშნეშე ოჯარალუ ხეშუულება.
მავრიკიოსიშ ოურდუმე კამპანიეფქ გიმიჭანუ ფინანსური პრობლემეფი, გიჩოლჷ იმპერიაშ ხაზინაქ. შედეგო უკმაყოფილებაქ ქიმიძინჷ არმიას დო მავრიკიოსიშ მეხჷ მინწყუ არყებაქ. არჸებულეფს ხემანჯღვერენდჷ ფოკა, ნამუქჷთ 602 წანას იმპერატორი მავრიკიოსი გეგთარაგუ, დოჸვილჷ მავრიკიოსი, თაშნეშე თიში ამშვი ქომოლსქუა დო ხვისტა მუქ ქაშეჸოთჷ ხეშა.