მაკრინუსი

მარკუს ოპელიუს მაკრინუსი (ლათ. Marcus Opellius Macrinus; დ. დოხ. 165 — ღ. 218) — რომიშ იმპერატორი 217 წანაშ 11 პირელიშე 218 წანაშ 8 მანგიშახ.

მაკრინუსი ლათ. Macrinus
მაკრინუსიშ ბიუსტი კაპიტოლიუმიშ მუზეუმს
რომიშ იმპერატორი
პოსტის გერინაშ ბორჯი
11 პირელი, 217 – 8 მანგი, 218
წიმოხონი	კარაკალა
მონძე	ჰელიოგაბალუსი
დუნაბადი	დოხ. 165 კესარია, მავრეტანია
ნაღურა	218 (53 წანერი) კაპადოკია
ალმასქუ	ნონია ცელზა
სქუალეფი	დიადუმენიანი
რელიგია	რომაული რელიგია

დებადჷ რომიშ პროვინცია მავრეტანიას, ბერბერეფიშ ფანიას. კარაკალაშ იმპერატორობაშ ბორჯის, მაკრინუსის უკინებუდჷ პრეტორიული პრეფექტიშ პოსტი. სენატორობაშა დღას ვემუჭირინუაფუ. 217 წანას კარაკალა ლჷმეფს აწარმენდჷ პართიალეფიშ მეხჷ. მაკრინუსიქ კარაკალა დაჸვილაფუ დო ხეშულობა მუქ ქაშეჸოთჷ ხეშა. დუდშე, თინა იმპერატორო გეგმაცხადჷ რომიშ ბჟაეიოლი პროვინციეფქ, უკულ მაკრინუსი რომიშ სენატიქ ხოლო დანტკიცჷ. მაკრინუსიშ მართუალაშ დაჭყაფუშე რომს სტაბილური დგომარობა ვარდჷ. იმპერია ოლიმუდჷ პართიას, სომხეთის დო დაკიას. მაკრინუსი რეფორმეფით ოცადუდჷ იმპერიაშ ეკონომიკური დო პოლიტიკური სტაბილიზაციას. მაკრინუსიქ შელებუ თინჩალაშ მეჭირინაფა პართიაწკჷმა, მარა თიში მონეტარული დო ფისკალური რეფორმეფქ წჷმოძინელქ ვეჸუ. რეფორმეფით უკმაყოფილე რდჷ არმია ხოლო. მუშენდა ჯარიშკოჩეფს ხეშქირა დარკუ.

ჸათე სიტუაციათ ქისარგებლჷ სევერუსეფიშ დინასტიაშ წჷმმარინაფალქ იულია მაესაქ. იულია მაესა რდჷ ინტრიგეფიშ დო პოლიტიკური მანევრირაფაშ დიდორსანტი დო ოცადუდჷ მუში ფანიაშ წჷმმარინაფალეფიშა რომიშ ხვისტაშ დორთინაფას. მაესაქ ქიმიგონუ ტყურა დო ანტკიცენდჷ ნამდა მუში 14 წანერი მოთა ბასიანუსი (ჰელიოგაბალუსი) რდჷ კარაკალაშ სქუა.

218 წანას მაკრინუსიშ პოლიტიკათ უკმაყოფილე ლეგიონეფქ ეარყეს დო იმპერატორო გეგმაცხადეს ჰელიოგაბალუსი. თე წანაშ 8 მანგის, ჰელიოგაბალუსიშ მოხუჯეეფქ, ანტიოქიაშ ლჷმას დამარცხეს მაკრინუსი. მაკრინუსიქ ბურჯაფიშე ინტუ დო რომიშა ნტებას ოცადუდუ, მარა ქალკედონს ქეკაჭიშეს, ოჭოფეს, კაპადოკიაშა მიდეჸონეს დო დოჸვილეს. თეიშახ, მაკრინუსიქ მუში სქუა დო წორო-იმპერატორი დიადუმენიანი პართიაშ მაფა არტაბან V-შა გოუტუ. მარა დიადუმენიანი ხოლო ოჭოფეს დო დოჸვილეს. მაკრინუსიშ ღურაშ უკულ რომიშ სენატიქ მაკრინუსი დო დიადუმენიანი რომიშ ნტერეფო გეგმაცხადჷ დო თინეფიშ ჯოხოეფი ოფიციალური დოკუმენტეფიშე გეშალასეს.

ლიტერატურა

• ენციკლოპედია ბრიტანიკა