მედია

მედია (მასმედია) — მასობური კომუნიკაციაშ ობეშტალი ვარ-და ელექტრონული მეშქაშაფეფიშ ართობურალა, მუჭოთ რე ჟურნალ-გაზეთები, რადიო, ტელევიზია, კინო, ინტერნეტი, რეკლამა დო. თ.უ მედიაშ მეშქაშალათ მუთმოხვადჷ ჯარალუაშ რეგულარული ინფორმირაფა მიმალი პროცესეფიშ გეშა. დუდმაართაშე მასობური კომუნიკაციაშ მეშქაშაფეფიშ ანალოგო მირჩქინუაფუდჷ ტერმინი „პრესა“, ნამუთ ბეშტურ მედიას შანენდჷ. თენა ორთაშობური რე, თიშ გეშა, ნამჷ-და ბეშტურ პრესაქ გიჭყჷ XIX ოშწანურად, მუჟანსჷთ შხვა ტიპიშ მედია-მეშქაშაფეფი ვარდჷნ. მედიაშ გეჸვენჯი გოვითარაფა მერსხილი რე ომენცარე-ტექნიკურ პროგრესწკჷმა.

მედიაშ სპეციფიკაშა მიშმურს შხვადოშხვანერ აუდიტორიაშა ართბორჯული ჟიგაულა, თაშნეშე, ინფორმაციაშ გინოჩამაშ სიშხირა დო რეგულარულარა. თეხანურ ეტაპის მედია, მასობური კომუნიკაციაშ ტრადიციულ მეშქაშაფეფწკჷმა ართო, იკათუანს უახალაშ ტექნოლოგიაშ ფართო სპექტრის კომპიუტერეფიშ, ვიდეო მეშქაშაფეფიშ, ელჷმაშარულ ტელევიზიაშ დო ინტერნეტიშამო.

ლიტერატურა

• ზურაბიშვილი, დ., გობრონიძე გ., სამოქალაქო განათლების ლექსიკონი, საიას იურიდ. განათლ. ხელშეწყობის ფონდი, თბ., 2011. ISBN 978-9941-0-3354-4.