რიჩარდ I ნჯილოშგური
რიჩარდ I ნჯილოშგური (ინგლ. Richard the Lionheart, ფრანგ. Richard Cœur de Lion, დ. 8 ეკენია, 1157 — ღ. 6 პირელი, 1199) — ინგლისიშ მაფა 1189-1199 წანეფს, პლანტაგენეტეფიშ დინასტიაშ წჷმმარინაფალი. თაშნეშე, თიში ტიტულეფი რდჷ: ნორმანდიაშ, აკვიტანიაშ დო გასკონიაშ ჰერცოგი, კვიპროსიშ ლორდი, პუატიეშ, ანჟუშ, მენიშ დო ნანტიშ გრაფი დო ბრეტანიშ ოვერლორდი. რდჷ ჰენრი II-შ დო თიში ალმასქუ ელეონორა აკვიტანიარიშ მასუმა ქომოლსქუა.
| რიჩარდ I ნჯილოშგური ინგლ. Richard the Lionheart ფრანგ. Richard Cœur de Lion | ||
 რიჩარდ I ნჯილოშგურიშ სკულპტურა ფონტევროშ ოაბატეს | ||
 ინგლისიშ მაფა | ||
|---|---|---|
| პოსტის გერინაშ ბორჯი | ||
| 3 ეკენია, 1189 – 6 პირელი, 1199 | ||
| წიმოხონი | ჰენრი II | |
| მონძე | ჯონ უდიხაწყარე | |
| დუნაბადი | 8 ეკენია, 1157 ბომონტი, ოქსფორდი, ინგლისი | |
| ნაღურა | პირელი 6, 1199 (41 წანერი) შალიუ, აკვიტანია | |
| ნთხორუ აბანი | ფონტევროშ ოაბატე, ანჟუ, საფრანგეთი | |
| მუმა | ჰენრი II | |
| ნანა | ელეონორა აკვიტანიარი | |
| ალმასქუ | ბერენგარია ნავარალი | |
| სქუალეფი | ფილიპი | |
| რელიგია | კათოლიციზმი | |
დიამუში ელეონორა აკვიტანიარიშე მონძეობათ მიპალუ აკვიტანია, მარა რეალური ხეშულობა თექ ვაუღუდჷ. ჸათეშ გეშა რიჩარდიქ ეარჸჷ მუამუშიშ ჰენრი II-შ მეხჷ, 1173-1174 წანეფს. უკულ 1189 წანას, მუამუშიშ სააწმარენჯო ოურდუმე კამპანიას, ქელერინუ საფრანგეთიშ მაფა ფილიპ II. ჰენრი მაჟირაშ ღურაშ უკულ, რიჩარდი მაფათ აკურთხეს 1189 წანაშ 3 ეკენიას. მონაწილენდჷ მასუმა ჯვაროსნული ლესქერობას, 1190 წანას. ჸათე ოურდუმე ექსპედიციაშ ბორჯის, ქიდეკინჷ სიცილია დო კვიპროსი. წიმინდე დიხას მიოჭირინუ შანულამი წჷმოძინეფს, მარა იერუსალიმქ ვადართინუ. 1192 წანას ქუდოდვუ ოთინჩალე ხეკულუა სალადინიწკჷმა. უკახალე დორთინაშ ბორჯის, ტყვეთ ხეშა ქაშუოლუ ავსტრიაშ ჰერცოგი ლეოპოლდის, ნამუქჷთ რიჩარდი გეგნოჩჷ იმპერატორი ჰაინრიხ VI-ს. ჰაინრიხიქ, ინგლისარეფიშე დიდი მუდანობათ ფარაშ მეღებაშ უკულ, 1194 წანას, რიჩარდი გადუდიშულჷ. რიჩარდიქ დიო ინგლისიშა დირთჷ, უკულ ნორმანდიაშა. რინაშ ეკონია წანეფს, რიჩარდი ოლიმუდჷ საფრანგეთიშ მაფა ფილიპ II-ს. ჸათე ლჷმას რიჩარდიქ დოღურჷ 1199 წანაშ 6 პირელს.
რიჩარდ I, მუში ბორჯის მერჩქინელი რდჷ ქირსიანობაშო მალიმარი გერგეზო დო უდიდაში მანჯღვერთარო. ჸათეშ გეშათ გიადჷ მეტჯოხოქ ნჯილოშგური.