სარდური II
სარდური II — ურარტუშ მაფა, ჯვ. წ. 764-735 წანეფს. რდჷ არგიშთი I-შ სქუა. სარდურიქ გაფართინუ ურარტუშ ტერიტორია. მანწყუ ლესქერობეფი კოლხაშ, მელიდიშ დო ქუმუხიშ მეხჷ. ურარტული წყუეფი ეთმოჭარუნა სარდურიშ ოურდუმე ექსპედიციას "ბაბილუ"-შ მეხჷ. ნამთინე მენცარეფიშ აზრით ბაბილუ წჷმარინუანდჷ კასიტური რეგიონს, ნამუთ ადრე ბაბილონეთიშ აკოდგინალუაშა მიშმეშჷ.
| სარდური II | |
| ურარტუშ მაფა | |
|---|---|
| პოსტის გერინაშ ბორჯი | |
| ჯვ. წ. 764 წანა – ჯვ. წ. 735 წანა | |
| წიმოხონი | არგიშთი I |
| მონძე | რუსა I |
| მუმა | არგიშთი I |
| ნანა | ბაგენა |
| სქუალეფი | რუსა I |
ჯვ. წ. 743 წანას, ქუმუხის, ასურეთიშ მაფაქ ტიგლათფილესერ III-ქ დამარცხჷ სარდური დო თიში ანტი-ასურული კოალიცია. უკულ ტიგლათფილესერქ გეგნორაჸუ სარდური წყარმალუ ევფრატიშ მელე.
სარდური II-ქ ტუშპას ეიოგჷ კაბეტი კიდა, ნამუშ ართ-ართი მუკნაჭარას ჸათაშ ეთმოჭარუნს მუში დუც: "მორკული მაფა, ნძალიერი მაფა, ოქიანუშ მაფა, ნაირიშ ქიანეფიშ მაფა, მაფა, ნამუშ მანგი ვაარსებენს, სარკო ჭყიში, მაფა, ნამუსჷთ ლჷმაშა ვაშქურჷ, მაფა, ნამუქჷთ დაჩიჩიუ არძა, ნამუეფქჷთ თიში ხეშუულებას ვედემორჩილჷ.".
ართ-ართი მუკნაჭარას, ნამუსჷთ 1912 წანას მიოგორეს ნოღა ვანიშ გოხოლუას, სარდური ჸათაშ ეთმოჭარუნს მუში ოურდუმე კამპანიას: "ქიმეფრთი მანაშ ქიანაშა, გებჭოფი, მობჯალაგე ნოღეფი, გოფრჩვი ოფუტეეფი, დო ქიანაშ მახორუეფი გეგნვოხორე ბიაინაშა. კინ თე წანას, ჩქიმი ჯარეფქ ქიმერთეს ერიაჰინიშა, გეჭოფეს ქიანა, დოჭვეს ნოღეფი დო გორჩვეს ოფუტეეფი".
უკულ მუკნაჭარა ჸათაშ იგინძარებუ: "კინ თე წანას, მასუმაშა, ქიმეფრთი ერიაჰინიშა, გეგნობჭვი ნოღეფი, გოფრჩვი ოფუტეეფი დო მახორუეფი ბიაინაშა გეგნვოხორე. უკულ მა ეუოგჷ ჯიხაზურგეფი ერიაჰინის დო გებჭოფი ქიანა. ღორონთი ხალდის პატი მუვოშინი. ხეშა ქაშეპოთი ტყვეეფი: 6436 კოჩი, 15,553 ოსურკოჩი. ქიანაშე მიდეპონი 21,989 ადამიერი, ნამთინე დოპილი, შხვეფი თელო ობჭოფი. ხეშა ქაშეპოთი 1613 ცხენი, 115 არქემი, 16,529 ორინჯი, 37,685 შხური".