ჯასტინ ბიბერი

ჯასტინ დრიუ ბიბერი (ინგლ. Justin Drew Bieber) (IPA: [ˈbiːbər])- (დ. 1 მელახი, 1994) რე კანადარი პოპ/რ’ნ’ბ მობირე. თიში კარიერაქ დიჭყჷ Youtube–ით, მუჟამსჷთ 2007 წანაშე თიქ დიჭყჷ დორხველი ვიდეოეფიშ Youtube-ის გჷმობჟინაფან. თინას მოგვიანაფილო მიოგორუ სკუტერ ბრაუნქ, ნამუქუთ ალაჩამა თხუ აშერს, სოიშახ ბიბერქ ხე მაჭარჷ „Island Records“-წკჷმან. ოგურიშხონარუ რე, ნამუდა ბიბერქ მუშით დიგურუ პიანინოშ, დოლიშ, გიტარაშ დო ოჸეშ მეგამა.

ჯასტინ ბიბერი
ჯასტინ ბიბერი 2015
ბიოგრაფია
თახმი ჯოხო	ჯასტინ დრიუ ბიბერი
დებადჷ	1 მელახი, 1994 (1994-03-01)
ბადებაშ აბანი	სტრეტფორდი, ონტარიო, კანადა
ჟანრ(ეფ)ი	პოპ მუსიკა, ალმახანური რ’ნ’ბ
საქვარუა	მობირე, ბირეფიშ ავტორი, მუსიკოსი
ობირეში ხონარი	{{{ობირეში ხონარი}}}
ინსტრუმენტ(ეფ)ი	ვოკალი, გიტარა, ფორტეპიანო, პერკუსია
აქტიური	2009–ამუდღარშახ
ლეიბლ(ეფ)ი	Island, RBMG
ასოციაციეფი	აშერი
ვებ-ხასჷლა	justinbiebermusic.com

ბიოგრაფია

ჯასტინ ბიბერქ 1994 წანაშ 1 მელახის სტრეტფორდის, კანადაშ პროვინცია ონტარიოს დებადჷ. მუსიკალური მუნაჩემეფქ ჯასტინს მასქერეფშე გჷმაჸუნჷ: მუმა, ჯერემი ბიბერი, გიტარაშ მეგამას აფუდჷ ხვამილაფირი, დო ნანა, პეტი მალეტე, ნამუსჷთ თეშ წოხოლე ჟურნალი „ფლეიბოიქ“ ტარკალე ფოტოსესიაშ მონწყუალაშენ ობაღინაფალო საინტერესო ჰონორარი მიარზუ, ართ ჟამს მენდიშმუმაჩამალ ვოკალისტო იკოროცხუდჷ. რთული დაჯერებელი რე, ნამუდა ბირათ ჯასტინქ გვალო მუზმარენ წანა რე დეინტერესჷნ, თით უმოსო, ნამუდა 2 წანაშე თინა ინტერესის გიმირჩქინუანდჷ შხვადოშხვა მუსიკალურ ინსტრუმენტიშ, გჷშაკერძაფილო – გიოშქუმალარი ინსტრუმენტეფიშ გეზათ. ბაღანობას ჯასტინი მუსიკაშ გოკვათილეფშა გილეშჷ დო თეჟამს თის პროფესიონალურ დონეშა შეულებჷ მეგამა გიოშქუმალარი, სიმეფამ დო კლავიშეფამ ინსტრუმენტეფს. 12 წანერი ჯასტინქ აკათჷ აბანობურ ვოკალური კონკურსის „სტრეტფორდ აიდოლი“ დო, თიშ უმკუჯინუო, ნამუდა თიში კონკურენტეფი კონკურსიშახ სერიოზულო რდეს დაკებული მუსიკათ, დო ჯასტინი ხვალე დიდაშ თოჸუჯიშ თუდო, ჸუდეს იბირდუნ, თიქ მაჟირა აბანიშ დაკება ქუმიხუჯუ. თი ჟამს ახალი გონწყუმილი რდჷ მუსიკალური პორტალი „Youtube“, სოდგათ შხვადოშხვა კატეგორიაშ ვიდეოფაილეფიშ დოდვალა შილებედჷ. წორას თე საიტის ქიგედჷ ჯასტინიშ დიდაქ ჸუდეს გინოღალირი მუსხირენი ომოჸოროფული მუსიკალური რულე. თე რულეეფს ძალამი მალას გურჩქინდჷ პატიშმემაჩამალეფიშ ედომუშამ არმიაქ, ნამუეფჷთ დიო ხოლო 2007 წანას ანტკიცენდეს, ნამუდა ჯასტინ ბიბერი მოსოფელიშ დონეშ მურიცხო გინირთუდჷნ.

კარიერა

წორას „Youtube-შე“ დეინტერსჷ მენეჯერი სკუტერ ბრაუნქ ჯასტინით დო ინტერნეტიშ მეშქაშალათ ბიბერეფიშ ფანიას ქჷმიარსხუ დო წორომოხანდობა მიარზუ. თიმ წანას ჯასტინქ ბრაუნწკჷმა ართო ატლანტაშა მიდართჷ, სოდგათ ჩინებულ რეპერი დო პროდიუსერი აშერი გეჩინებაფუ. თიშ უმკუჯინუო, ნამუდა ჯასტინი აშერწკჷმა აკოხვალამაშ ჟამს 13 წანერი რდჷნ, მურიცხიქ ქიდეჯერჷ თიში ნიჭი დო ფსუაჩანაფილქ ქუდოსქიდჷ თიში ვოკალური შუულობათ. აშერწკჷმა ართო ჯასტინქ „Island Records-შა“ ქიმერთჷ, სოდგათ თის მურჩქილუეს დო 2008 წანას მაართა ოფიციალური კონტრაქტი გუფორმეს. ინტერესუანი რე, ნამუდა კონტრაქტიშ მეჯინათ, ჯასტინს მუშით ოკო გინუჭყვადუდუკო, მიწკჷმა უსხუნუდჷ წოროხანდუან, – აშერწკჷმა დო ვარი ჯასტინ ტიმბერლეიკწკჷმან. საბოლოთ ჯასტინქ აშერწკჷმა წოროხანდუა ისხუნუ დო მუჭოთ მუსიკალური ექსპერტეფი ჭარუნან, თიქ თინი გიშაგორუა ქიმინჷ. თიმ წანას ჯასტინ ბიბერი ააშ–იშ არძაშე უმოსო მენდიშმუმაჩამალ პოპ-მარსულებერო მირჩქინეს, დო მოსოფლეს თის „Teen Singing Sensation“-ს ვარა „თინეიჯერი მობირე სენსაციას“ უძახჷნა.

2009 წანას ჯასტინ ბიბერქ მაართა სინგლი – „One Time“ გიშაშქჷ, მუქუთ უნელო გინირთჷ მოსოფელიშ დონეშ ჰიტო. თიში ვანორმალური ფანი-ცირეფი ქოთ ჩხუპენდეს მუსიკალური მაღაზიეფს, თიშენ ნამუდა ქუჭიშუაფუდესკონ ართიანშა სინგლიშ ჸიდირი, მუქუთ გჷშაშქუმალაშე დეფიციტურო გინირთუნ. გჷშაშქუმალაშე 2 მარაშა სინგლიქ მა-12 აბანი დეკინჷ „კანადაშ ჩხე პოპ-ოშარს“, დო მაართა ალბომი, ჯოხოდვალათ „My World“, ჯასტინ ბიბერქ 2009 წანაშ დამორჩილს გიშაშქჷ. ალბომქ მალას ქჷმიპალუ პოპულარობა თინეიჯერეფ შქას, დო კლიპეფქ ბირეფშე „One Time“ დო „One Less Lonelygirl“, „ემტივიშ“ ჰიტ-აღლუმეფი ქჷდეკინეს.

2010 წანაშ მელახის გიშართჷ ჯასტინ ბიბერიშ მაართა ალბომიშ ედოუშამი ვერსიაქ – „My World 2.0“. ალბომიშ გიშულას წოხოლე ოჯღონდჷ სინგლიშ დო კლიპიშ – „Baby-შ“ გიშულა, ნამუეფქუთ, შილებე ირაგადინასინ, აფეთქჷ მუსიკალური ჰიტ-აღლუმეფი. კლიპიქ თიზჷმაშა პოპულარულო გინირთჷ, ნამუდა ხვალე „Youtube-ის“ თინა 250 მილიონი ადამიერქ ქოძირჷ, მუდგათ საიტიშ რეკორდი ქუდარსხუ დო წოხოლენ რეკორდიშ მაღვენჯი – ლეიდი გაგა გურგაჩამალო ქიკნიტუ უკოხოლე. ოშინალი რე, ნამუდა ჯასტინ ბიბერქ გინირთჷ მაართა პოპ-მარსულებერო, ნამუშ ართჟამო შქვითხოლო ბირაქ ამერიკაშ არძაშე პრესტიჟულ ჩარტის – „ბილბორდ ტოპ 100-ის“ მოხვადჷნ.

ჯასტინი რე არძაშე ჭიჭე მურიცხი, ნამუშ გეშათ ხანტილურ ფილმის გინიღანან. ფილმიშ რეჟისორი, ჯონ ჩუა რე, ნამუთ ავტორი რე პოპულარული ფილმეფიშ „ბიჯგი წოხოლე 2: შოშეეფი“ დო „ბიჯგი წოხოლე 3D“-შ. ფილმიშ გინოღალეფი ჯასტინიშ კონცერტეფიშ ჟამს, კულისეფს დო სცენას მეურსჷ. უზურენა, ნამუდა ფილმი, ჯასტინიშ ალბომეფიშნერო, წჷმოძინელი იჸუაფუ. შხვეფ შქას, ჯასტინიშ ჰობი ფილმეფიშ ჯინა რე დო თიში არძაშე უმოსი მოწონაფილ ფილმეფი რე: „მაბრუო მილი“ დო „მაზაკვალიშ გჷშარაჸუა ემილი როუზიშე“. თეშ მოხ, დუდიშული ჟამს ჯასტინს უჸორს ბურთუაშ, გოლფიშ, ჰოკეიშ ლაჸაფი, სკეიტბორდით სიონტი დო ფანეფწკჷმა კომუნიკაცია „Facebook-იშ“ დო „Twitter-იშ“ მოხვარათ.

მუსიკაშ მოხ, ჯასტინ ბიბერიშ ჯოხო კოსმეტიკური მეშქაშალეფს დო შურამიეფსჷთ ორსხუ. კერძოთ, 2011 წანაშ მელახის გიმაჩამალო გიშმურს ოსურეფიშო მერჩქინელი შურამია მუდგაშ აკოქიმინუას ჯასტინით ოკათუდჷ, ოდო თიმ წანაშ ზარხულსჷნე გიმაჩამალო გიშურს ბირცხეფიშ ლაკი, მუდგასჷთ ჯასტინიშ კომპოზიციეფიშ ჯოხოეფი გიოძჷ.

2011 წანაშ 14 ფურთუთას გიშურს ფილმი ჯასტინიშ კათაფათ ჯასტინ ბიბერი: დღას ვა თქუა დღას. თინა ეთმოხანტჷნს მობირეფიშ რინას, მოღალობას, ჰობის. თაშნეშე ფილმის მაჯინე ძირუნს თიში კონცერტეფიშ ნოჭყვედეფს.

დისკოგრაფია

• My World 2.0 (2010)
• Under the Mistletoe (2011)
• Believe (2012)
• Journals (EP) (2013)
• Purpose (2015)
• Changes (2020)
• Justice (2021)

რესურსეფი ინტერნეტის

ვიკიოწკარუეს^? რე ხასჷლა თემაშენ:

ჯასტინ ბიბერი

• ოფიციალური ვებ-ხასჷლა
• ჯასტინიშ არხი საიტის YouTube
• ჯასტინიშ დღარი საიტის Twitter
• ჯასტინ ბიბერი — კინოფილმეფიშ ინტერნეტ მუნაჩემეფიშ ბაზას (ინგლისური)