ჯონ გარნერი
ჯონ ნენს გარნერი (ინგლ. John Nance Garner, დ. 22 გერგობათუთა, 1868 — ღ. 7 გერგობათუთა, 1967), შინელი რდჷ მეტჯოხოთ კაქტუსი ჯეკი — ამერიკალი დემოკრატი პოლიტიკოსი დო იურისტი, ააშ-იშ ვიცე-პრეზიდენტი 1933-1941 წანეფს, ფრანკლინ დელანო რუზველტიშ ადმინისტრაციას. გარნერს უკებუდჷ შანულამი როლი რუზველტიშ ახალი კურსიშ პოლიტიკას.
(b).jpg)
გურაფულენდჷ ვანდერბილტიშ უნივერსიტეტის. მუშენდჷ მოსამართალეთ იუვალდიშ ოლქის. 1898-1902 წანეფს ნინალენდჷ ტეხასიშ წჷმმარინაფალეფიშ პალატას. 1902 წანას, გიშაგორუეფს გემორძგუ დო გინირთჷ ააშ-იშ წჷმმარინაფალეფიშ პალატაშ მაკათურო. 1929-1931 წანეფს რდჷ წჷმმარინაფალეფიშ პალატაშ უჭიჭაშობაშ ლიდერი. გარნერი 1931-1933 წანეფს რდჷ წჷმმარინაფალეფიშ პალატაშ სპიკერი.
1932 წანას რუზველტიქ გარნერი წჷმარინუ ვიცე-პრეზიდენტობაშ კანდიდატო. 1932 წანაშ საპრეზიდენტო გიშაგორუეფს რუზველტიქ დამარცხჷ ჰერბერტ ჰუვერი. 1936 წანაშ გიშაგორუეფს რუზველტიქ კინ გემორძგუ. 1937 წანაშე გარნერიშ დო რუზველტიშ პოლიტიკური პოზიციეფქ ართიანს დეთხუ. გარნერს ძალამს ვამოწონდჷ ხეშუულებაშ ცენტრალიზაცია. 1940 წანაშ დემოკრატეფიშ პრაიმერეფს რუზველტიქ გემორძგუ. თიქ 1940 წანაშ დემოკრატეფიშ ერუანული კათუას, ვიცე-პრეზიდენტობაშ ახალი კანდიდატო ჰენრი უოლესი ქჷმწარინუ.
1941 წანას გარნერქ პოლიტიკური კარიერა ქიმიოტუ დო მუში ჸუდეშა, იუვალდიშა დირთჷ, სოდეთ ღურაშახ ცხოვრენდჷ. გარნერს ხოლო ურთიართალა უღუდჷ რუზველტიშ გეჸვენჯი პრეზიდენტი ჰარი ტრუმენიწკჷმა.