ჰენრი უოლესი
ჰენრი ეგარდ უოლესი (ინგლ. Henry Agard Wallace, დ. 7 გჷმათუთა, 1888 — ღ. 18 გერგობათუთა, 1965) — ამერიკალი პოლიტიკოსი, ჟურნალისტი, ფერმერი დო ბიზნესმენი, ააშ-იშ 33-ა ვიცე-პრეზიდენტი 1941-1945 წანეფს, ფრანკლინ დელანო რუზველტიშ ადმინისტრაციას. უოლესის 1933-1940 წანეფს უკინებუდჷ ოფუტეშ მეურნობაშ მელამოსეშ დო 1945-1946 წანეფს ვაჭარუაშ მელამოსეშ პოსტი.
| ჰენრი უოლესი Henry A. Wallace | ||
.jpeg) ოფიციალური პორტრეტი, 1940 წ. | ||
| ააშ-იშ 33-ა ვიცე-პრეზიდენტი | ||
|---|---|---|
| პოსტის გერინაშ ბორჯი | ||
| 20 ღურთუთა, 1941 – 20 ღურთუთა, 1945 | ||
| პრეზიდენტი | ფრანკლინ დელანო რუზველტი | |
| წიმოხონი | ჯონ გარნერი | |
| მონძე | ჰარი ტრუმენი | |
| პოსტის გერინაშ ბორჯი | ||
| 2 მელახი, 1945 – 20 ეკენია, 1946 | ||
| პრეზიდენტი | ფრანკლინ დელანო რუზველტი ჰარი ტრუმენი | |
| წიმოხონი | ჯესი ჰოლმან ჯონსი | |
| მონძე | უილიამ ავერელ ჰარიმანი | |
| პოსტის გერინაშ ბორჯი | ||
| 4 მელახი, 1933 – 4 ეკენია, 1940 | ||
| პრეზიდენტი | ფრანკლინ დელანო რუზველტი | |
| წიმოხონი | ართურ ჰაიდი | |
| მონძე | კლოდ უიკარდი | |
| დუნაბადი | 7 გჷმათუთა, 1888 ორიენტი, აიოვა, ააშ | |
| ნაღურა | გერგობათუთა 18, 1965 (77 წანერი) დანბერი, კონექტიკუტი, ააშ | |
| მენოღალობა |  ააშ | |
| ერუანობა | ამერიკალი | |
| პოლიტიკური პარტია | რესპუბლიკური პარტია (1909-1936) დემოკრატიული პარტია (1936–1947, 1964–1965) პროგრესული პარტია (1948-1950) | |
| მუმა | ჰენრი კანტველ უოლესი | |
| ნანა | კერი მეი ბროდჰედი | |
| ალმასქუ | ილო ბრაუნი | |
| სქუალეფი | 3 | |
| გონათაფა | აიოვაშ შტატიშ უნივერსიტეტი | |
| საქვარუა | პოლიტიკოსი, ჟურნალისტი, ფერმერი, ბიზნესმენი | |
| ხეშმოჭარუა |  | |
გურაფულენდჷ აიოვაშ უნივერსიტეტის, ნამუთ გათუ 1910 წანას. გურაფაშ თებაშ უკულ რდჷ უოლოსეფიშ ფანიაშ ფერმერული ჟურნალიშ "Wallaces' Farmer"-იშ რედაქტორი. უოლესიქ 1926 წანას დარსხუ წჷმოძინელი კომპანია "Hi-Bred Corn Company", ნამუთ აწარმენდჷ ჰიბრიდული ლაიტის. ოფუტეშ მეურნობაშ მოხ, უოლესი დაინტერესებული რდჷ შხვადოშხვა ოკითხეეფით, სტატისტიკათ, ეკონომიკათ, რელიგიური დო ოშურიელე ჸარაფეფით, გიშაკერზაფილო თეოსოფიათ. მუმაშ ღურაშ უკულ, 1924 წანაშე ჰენრი უოლესიქ დეთხუ რესპუბლიკური პარტიას დო 1932 წანაშ საპრეზიდენტო გიშაგორუეფს ხუჯი დუკინჷ დემოკრატეფიშ კანდიდატის ფრანკლინ დელანო რუზველტის.
რუზველტიშ ადმინისტრაციას, 1932 წანას, უოლესიქ ქიდეკინჷ ოფუტეშ მეურნობაშ მელამოსეშ პოსტი. უოლესიქ ხუჯი დუკინჷ რუზველტიშ ახალი კურსიშ პოლიტიკას დო ატარჷ შანულამი რეფორმეფი ოფუტეშ მეურნობაშ დარგის. 1940 წანაშ დემოკრატეფიშ ერუანული კათუას რუზველტიქ ვიცე-პრეზიდენტობაშ კანდიდატო უოლესი ქჷმწარინუ. რუზველტიქ დო უოლესიქ 1940 წანაშ საპრეზიდენტო გიშაგორუეფს გემორძგვეს. უოლესი ვამოწონდჷ დემოკრატიული პარტიაშ კონსერვატორეფს, ნამუეფიშ გოლინათ 1944 წანაშ დემოკრატეფიშ ერუანული კათუას ვიცე-პრეზიდენტობაშ კანდიდატო წჷმორინაფილქ იჸუ ჰარი ტრუმენქ დო ვართ ჰენრი უოლესიქ. 1945 წანას რუზველტიქ უოლესი ქუდარინუ ვაჭარუაშ მელამოსეთ.
1945 წანაშ პირელს დოღურჷ რუზველტიქ. თინა დოთირუ ტრუმენქ. 1946 წანაშ ეკენიას ტრუმენქ უოლესი პოსტიშე გეგნარინუ, მუშენდა უოლესი სხუნუეთიწკჷმა შერიგაშ პოლიტიკაშ მოხუჯე რდჷ. ჸათეცალი პოლიტიკა ტრუმენს ვამოწონდჷ. უოლესიქ დო თიში მაჸალეეფქ 1948 წანას დარსხუეს მეკვარჩხანე იდეოლოგიაშ პროგრესული პარტია. პროგრესული პარტიაქ მუში საპრეზიდენტო კანდიდატო უოლესი ქჷმწარიმუ. საპრეზიდენტო კამპანიაშ ბორჯის უოლესიშ პლატფორმა რდჷ: ურთიართალაშ გაუჯგუშება სხუნუეთიწკჷმა, რასეფიშ ართმანგობა, გენდერული ართმანგობა, ოჯარალე სკოლეფიშ დესეგრეგაცია დო შხვა. უოლესიქ 1948 წანაშ საპრეზიდენტო გიშაგორუეფს ხონარეფიშ ხვალე 2,4 % მიპალუ. 1950 წანას უოლესიქ დეთხუ პროგრესული პარტიას. რინაშ უკულიანი პერიოდის უოლესიქ ბორჯი დუთმუ ოფოტეშ მეურნობაშ ინოვაციური მეთოდეფს. უოლესიქ ღურუ 1965 წანაშ 18 გერგობათუთას, 77 წანერქ, ალს-თ.