იულიუს ნეპოტი
იულიუს ნეპოტი (ლათ. Iulius Nepos, ღ. 9 მესი, 480) — ბჟადალი რომიშ იმპერატორი 474 წანაშ 24 მანგიშე 475 წანაშ 28 მარაშინათუთაშახ, ლეონიდეფიშ დინასტიაშ წჷმმარინაფალი. მერჩქინელი რე ბჟადალი რომიშ ეკონია ლეგიტიმური იმპერატორო.
| იულიუს ნეპოტი ლათ. Iulius Nepos | |
 იულიუს ნეპოტიშ სოლიდუსი | |
| ბჟადალი რომიშ იმპერატორი | |
|---|---|
| პოსტის გერინაშ ბორჯი | |
| 24 მანგი, 474 – 28 მარაშინათუთა, 475 | |
| წიმოხონი | გლიცერიუსი |
| მონძე | რომულუს ავგუსტულუსი |
| ნაღურა | 9 მესი, 480 სალონაშ გოხოლუას |
| მუმა | ნეპოციანე |
| ნანა | მარცელინეშ და |
| ალმასქუ | ლეონ I-შ ჯიმასქუა |
| რელიგია | ქალკედონიური ქირსიანობა |
იულიუს ნეპოტი ჯინჯიერო დალმაციაშე რდჷ დო ართი პერიოდის უკინებუდჷ პროვინციაშ მამართალიშ პოსტი. ბჟაეიოლი რომიშ იმპერატორქ ლეონ I-ქ, 473 წანაშ ქირსეთუთას იულიუს ნეპოტი არმიაშ მანჯღვერთარო ქუდარინუ დო თის გლიცერიუსიშ გითორაგვაფა ქუდავალჷ. გლიცერიუსი ბჟადალი რომიშ იმპერატორო გჷმაცხადეს ბურგუნდეფქ 473 წანაშ მელახის. 474 წანას, ნეპოტიქ ნძალიერი არმიათ იტალიაშა გემშეჭკირჷ, გეგთარაგუ გლიცერიუსი დო 474 წანაშ 24 მანგის დუდი ბჟადალი რომიშ იმპერატორო გეგმაცხადჷ. ნეპოტი ლეგიტიმური იმპერატორო ქიჩინჷ ზენონქ.
ნეპოტი ძალამს ოცადუდჷ იმპერიაშ სტაბილიზაციას, მარა სერიოზული წჷმოძინეფიშა ვემუჭირინუაფუ. დამარცხჷ იტალიაშა მიშაჭკირილი ვესტგოთეფი, დადაღარჷ ბურგუნდეფი. თინა თაშნეშე ოცადუდჷ იმპერიაშ ხეშუულებაშ განძალიერაფას გალიას, მარა უშედეგეთ. გალიაშა ვესტგოთეფი ფშხირას მიშმეჭკირუდეს დო იმპერიას ვაუღუდჷ ოხვილური ნძალეფი თინეფიშ სააწმარენჯოთ. 475 წანას უზურპატორი ბასილისკოსიქ გეგთარაგუ ზენონი. ჸათექ ნეპოტიშ პოლიტიკური დგომარება გაუარეს. 475 წანას ნეპოტიშ მეხჷ ეარყჷ არმიაშ მაგისტრიქ ორესტესიქ, ნამუქჷთ იმპერიაშ ნანანოღა რავენაშა გემშეჭკირჷ. ნეპოტის ორესტესიშ არმიაშა ვაწარინჷ დო დალმაციაშა ინტუ. ჟირი თუთაშ უკულ ორესტესიქ მუში ვითა წანერი ქომოლსქუა რომულუს ავგუსტულუსი იმპერატორო გეგმაცხადჷ.
გინორაგვაფაშ უკულ, იულიუს ნეპოტის იმპერატორობაშე ვარია ვაუთქუალჷ. თის ხეშუულება ვაუღუდჷ, მარა ბჟაეიოლი რომიშ იმპერია ლეგიტიმური იმპერატორო იშენით თის ჩინებულენდჷ. 476 წანას ბარბაროსი ოდოაკრიქ დოჸვილჷ ორესტესი, ხვისტაშე გეგთათჷ რომულუს ავგუსტულუსი დო გინირთჷ იტალიაშ მაართა მაფათ.
ნეპოტი ზენონს თხულენდჷ ალარინას დო ოკოდჷ ხეშუულებაშ დორთინაფა, მარა ზენონიშე თის მუთუნნერი მოხვარა ვემუღებჷ. 480 წანაშ 9 მესის, ნეპოტი დოჸვილეს მუში მაჸალეეფქ, ოვიდაქ დო ვიატორქ.