რომულუს ავგუსტულუსი
რომულუს ავგუსტუსი (ლათ. Flavius Romulus Augustus, დ. დოხოლაფირო 465 — ღ. 511 წანაშ უკულიანი პერიოდი) — ბჟადალი რომიშ იმპერატორი 475 წანაშ 31 გჷმათუთაშე 476 წანაშ 4 ეკენიაშახ.
| რომულუს ავგუსტულუსი ლათ. Flavius Romulus Augustus | ||
 რომულუს ავგუსტულუსიშ სოლიდუსი | ||
| ბჟადალი რომიშ იმპერატორი (ვაჩინებულენდჷ ბჟაეიოლი რომიშ იმპერია) | ||
|---|---|---|
| პოსტის გერინაშ ბორჯი | ||
| 31 გჷმათუთა, 475 – 4 ეკენია, 476 | ||
| წიმოხონი | იულიუს ნეპოტი | |
| მონძე | გეგთარაგვეს | |
| დუნაბადი | დოხოლაფირო 465 პანონია | |
| ნაღურა | 511 წანაშ უკულიანი პერიოდი | |
| მუმა | ორესტესი | |
| ნანა | ბარბარია | |
| რელიგია | ქალკედონიური ქირსიანობა | |
რომულუსი რდჷ პანონიარი მანჯღვერთარიშ ორესტესიშ სქუა. დუდშე ორესტესი ოინალუდჷ ატილას დო თიში კარს შანულამი გოლინა მიპალუ. 475 წანას რომიშ იმპერატორქ იულიუს ნეპოტიქ ორესტესი ქუდარინუ ოურდუმე მაგისტრო. 475 წანაშ 28 მარაშინათუთას, ორესტესიქ ქიდეკინჷ რავენა, ნამუთ ბჟადალი რომიშ იმპერიაშ დე ფაქტო ნანანოღა რდჷ 402 წანაშე. იულიუს ნეპოტიქ ხეშუულება მიოდინუ დო დალმაციაშა ინტუ. უკულ ორესტესიქ ახალი იმპერატორო გეგმაცხადჷ მუში ვითი წანერი ქომოლსქუა რომულუსი, ავგუსტუსიშ ტიტულით. რახანს რომულუსი ხანით ჭიჭე რდუნ, თის მეტჯოხოთ ქიგიადჷ ავგუსტულუსიქ, ნამუთ "ჭიჭე ავგუსტუსი"-ს შანენს. რომულუს ავგუსტულუსის იმპერატორო ვაჩინებულენდჷ ბჟაეიოლი რომიშ იმპერატორი ზენონი.
476 წანას ფედერატეფქ გერმანალი ოდოაკრიშ ხემანჯღვერობათ, ორესტესის დიხეფი მოთხის იტალიას დახორნალო. მარა თინეფიშ ჸათე მოთხუალა ორესტესიქ ვემიღუ. უკმაყოფილე ფედერატეფქ ოდოაკრიშ მანჯღვერალათ დამარცხეს დო დოჸვილეს ორესტესი დო გეგთარაგვეს რომულუს ავგუსტულუსი. ოდოაკრიქ დუდი იტალიაშ მაფათ გეგმაცხადჷ, კონსტანტინოპოლიშა ქაჯღონჷ საიმპერიო რეგალიეფი დო ზენონი ქიჩინჷ ნომინალური სიუზერენო. ოდოაკრის რომულუს ავგუსტულუსი ვაუჸვილჷ, თის პენსია ქუდუნიშნჷ დო კამპანიაშა გეგნახორუ. რომულუსიშ ცხოვრებაშ უკულიანი პერიოდი რჩქინელი ვარე.
რომულუს ავგუსტულუსი მერჩქინელი რე ბჟადალი რომიშ იმპერიაშ ეკონია იმპერატორო. ისტორიკოსეფიშ აზრით, თიში გითორაგვაფათ ქუდანთხჷ ბჟადალი რომიშ იმპერიაქ, გეთუ ისტორიაშ ჯვეში პერიოდიქ დო დიჭყჷ შქა ოშწანურეფქ.