ოდიში

ოდიში — ოფუტე საქორთუოს, სამარგალო-ჟიმოლენი შონეშ აკანიშ ზუგდიდიშ მუნიციპალიტეტის, ოდიშიშ რზენს. წყარმალუეფიშ ჯუმიშ დო ინწრაშ ძგალეფს. ზუღაშ დონეშე 130 მეტრა, ზუგდიდიშე 5 კმ, 2014 წანაშ ეჭარუაშ მუნაჩემეფით ოფუტეს ოხორანს 1846 ადამიერი.

ოდიშიშ ნოხორე

ოფუტეშ ბოლოს კორცხელიშ ხურგიწკჷმა, წყარმალუ ჯუმიშ (ინგირწყარიშ კვარჩხანი ნოჸელა) მარძგვანი ძგას, ზუღაშ დონეშე 273 მეტრას გითოგორეს გვიანდელი ნეოლითური ფარანიშ ნოხორე. გითმოგორუნდეს 1936 –1937 წანეფს. ძირაფილი რე მეხოლაფირო 5050 მოღე. ანჯარიშ უმენტაშ თია ღოლამირიე კაჟიშე (პრიზმული, ცეკური დო ფანქარიშმაგვარი ნუკლეუსეფი, ეტკეცილ-ეტახილეფი, მაგანაშ ჩასართეფი დო შხვ.) დო რეყეშ ქუაშე (გოხეხილ–გოხვარკალერი არგუნეფი, ოხეხუეფი, ოკაკალეფი, ხეშ ოქუალეფი, გახვარკალაფარეფი დო შხვ.). ობსიდიანი მორჩილი მუდანობათ რე გჷმორინაფილი. თექინეშეს კილარჩქინდჷ ცილინდრული ბონჯინჯა კერამიკული ჭკუჯიშ ნატახერეფქ, ნამუეფსჷთ უღუ ვერტიკალური ხინტკეფი დო ნაცხაბარეფი. მოღე ეკოროფილიე ჟიდოხურო. უყარაფუ კულტურული ფინა ვარე ნაძირეფი. ოდიშიშ ნოხორე კავკაციას ორდოიან დიხაშმოქმენდალური კულტურაშ ართ–ართი კლასიკური ძეგლი რე.

გითოგორილი მოღე ურთაშ, ანაშიანი II-შ, გურანთაშ დო შხვა გვიანდელი ენეოლითური მოღეშ მეთე რე დო თინეფწკჷმა ართო ბჟადალ მოლენკავკაციაშ კულტურული ქართას აკმიართაფუ. მოღე თხილერიე სიმონ ჯანაშიაშ ჯოხონობაშ საქორთუოშ სახენწჷფო მუზეუმს დო სანქტ-პეტერბურგიშ მიკრო–მაკლაიშ ჯოხონობაშ ეთნოგრაფიულ და ანთროპოგენული მუზეუმეფს.

ლიტერატურა

კალანდაძე ა., მეზოლითურ და ნეოლითურ კულტურათა ნაშთები საქართველოში «ენიმკის მოამბე», 1939, ტ. 4, ნარკ. 3
ნებიერიძე ლ. დასავლეთ ამიერკავკასიის ნეოლითი, თბ. 1972.
საქართველოს არქეოლოგი, თბ. 1959.