ასფალტი
ასფალტი (ბერძენ. άσφαλτος – გვალაშ ფირსა) — რუმე ფერიშ ფირსაშობური მასა, ნამუშით რზალეფს, შოშეეფს, მოედანეფიშ ჟინპიჯის ფორჷნა.[1] გიშმართჷნა ორთაშობურ დო ხელუანურ ასფალტის. ორთაშობური ასფალტი ნაფთობიშე წჷმოქიმინუ. ქექე ფრაქციეფიშ აორქებაშ დო ჰიპერგენეზისიშ ჟიგოლინათ მონკა ფრაქციეფიშ დოღანჯუაშ შედეგო ნაფთობი დიო ფსქელ, ძალამ ზისქე მასათ გჷნმირთუ, უკული — ჸონიერი, ლექინასმანდღულე ასფალტო. უკულიანი ელაზჷმაფათ ფსქელ ფას (სამანგგ., ასფალტიშ ტობა კოკი ტრინიდადის). ასფალტი დიდი მუდანობათ რე თი ნაფთობამი ქანეფს, ნამუეფით იდვალუაფუ დიხაუჩაშ ჟინპიჯიშ არხოს ვარდა ჟინპიჯშა ეშმურს. ასფალტი ქუაშ, დოლომიტიშ დო შხვა ქანეფს გჷთმაფშანს ზიეფს დო ქოქეფს. საქორთუოს ჩინებული რე ნატანებიშ, ელდარიშ დო შირაქიშ ასფალტის საბადოეფი, გაგრაშ ასფალტამი ქანეფი დო შხვ. ხურგაშგალე შანულამი საბადოეფი რე: ვენესუელას, საფრანგეთის, იორდანიას, კანადას, ისრაელს.
ხელუანური ასფალტი ბიტუმიშ დო რცამულერი მინერალური აკმაფშაფალეფიშ (უმენტაშო კირქუაშ) მიშნახოლაფირი რე. ორთაშობური ასფალტშე გინორთელო, ხელუანური ასფალტი იკათუანს პარაფინიშ დო ნაფთობიშ ზეთეფს. ქვიშაწკჷმა, ხრეშწკჷმა, როჭკწკჷმა ესვარილი ხელუანურ ასფალტის ფართოთ გჷმირინუანა ნაგეფიშ დო ტროტუარიშ დაგაფალო, რზაშ ოფორალო დო შხვ.
ლიტერატურა რედაქტირაფა
- ქორთული სხუნუეფიშ ენციკლოპედია, ტ. 1, ხს. 662-663, ქართი, 1975 წანა.