იცხაკ შამირი
იცხაკ შამირი (ურ. יצחק שמיר, დაბადებაშ გვარი ეზერნიცკი, დ. 22 გჷმათუთა, 1915 — ღ. 30 მანგი, 2012) — ისრაელარი პოლიტიკოსი, ისრაელიშ პრემიერ-მინისტრი 1983-1984 დო 1986-1992 წანეფს. ისრაელიშ სახენწჷფოშ გოჭყაფაშახ, რდჷ სიონისტური ოურდუმე ბუნა ლეჰიშ მაკათური.
| იცხაკ შამირი יצחק שמיר | ||
 შამირი 1992 წანას | ||
| ისრაელიშ მა-7 პრემიერ-მინისტრი | ||
|---|---|---|
| პოსტის გერინაშ ბორჯი | ||
| 20 გჷმათუთა, 1986 – 13 კვირკვე, 1992 | ||
| პრეზიდენტი | ხაიმ ჰერცოგი | |
| წიმოხონი | შიმონ პერესი | |
| მონძე | იცხაკ რაბინი | |
| პოსტის გერინაშ ბორჯი | ||
| 10 გჷმათუთა, 1983 – 13 ეკენია, 1984 | ||
| პრეზიდენტი | ხაიმ ჰერცოგი | |
| წიმოხონი | მენახემ ბეგინი | |
| მონძე | შიმონ პერესი | |
| პოსტის გერინაშ ბორჯი | ||
| 13 მანგი, 1977 – 10 მელახი, 1980 | ||
| წიმოხონი | ისრაელ იეშაიაჰუ | |
| მონძე | იცხაკ ბერმანი | |
| პოსტის გერინაშ ბორჯი | ||
| 10 მელახი, 1980 – 20 გჷმათუთა, 1986 | ||
| პრემიერ-მინისტრი | მენახემ ბეგინი მუ შიმონ პერესი | |
| წიმოხონი | მენახემ ბეგინი | |
| მონძე | შიმონ პერესი | |
| დუნაბადი | 22 გჷმათუთა, 1915 რუჟანი, გროდნოშ გუბერნია, რუსეთიშ იმპერია | |
| ნაღურა | 30 მანგი, 2012 (96 წანერი) თელ-ავივი, ისრაელი | |
| მენოღალობა |  ისრაელი | |
| პოლიტიკური პარტია | მალჷმარეფიშ ერკებული (1948-1959) ლიკუდი (1970-1998, 2003-2011) ერუანული რსხუ (1999-2003) | |
| ალმასქუ | შულამიტ ლევი | |
| სქუალეფი | 2 | |
| ჯილდოეფი | ისრაელიშ პრემია (2001) | |
| ხეშმოჭარუა |  | |
შამირი ირდუდჷ პოლონეთის. ახალნორდობაშე ქაკათჷ რევიზიონისტურ-სიონისტური ბუნას ბეიტარს. 1935 წანას შამირიქ პოლონეთი ქიდუტუ დო პალესტინაშა მიდართჷ, სოდეთ თინა საბუღალტერო ოფისის მუშენდჷ. უკულ, შამირიქ ქაკათჷ სიონისტური ოურდუმე ბუნას ირგუნს, ნამუშ ლიდერი მენახემ ბეგინი რდჷ. მაჟირა მოსოფელიშ ლჷმაშ მიმალობას, ბუნაქ გირთჷ, მუშენდა ბუნაშ მაკათურეფქ ვემირიგეს მიშა ალურინდესკო. ავრაამ შტერნი დო შამირი ფირქენდეს ნამდა ოხვილური რდჷ ალიანსი ფაშისტური იტალიაწკჷმა დო ნაცისტური გერმანიაწკჷმა. ჸათე ღანკით, შტერნიქ დო შამირიქ გეგშერთეს ირგუნიშე დო ქუდარსხუეს მუნეფიშ ბუნა ლეჰი. ლეჰიშ მაკათურეფს ოკოდეს ურიული სახენწჷფოშ დორსხუაფა ნაცისტეფწკჷმა ალიანსით. შტერნიშ ღურაშ უკულ, ლეჰიშ მაკათურეფი ოცადუდეს სხუნუეთიწკჷმა დახოლებას. პალესტინაშ ლჷმაშ მიმალობას, ლეჰიშ დო ირგუნიშ მაკათურეფქ მანწყუეს პალესტინარეფიშ მასობური ჭყვიდუა დეირ-იასინიშ ოფუტეს. ვართ ბაღანეფი დუნდებუნა დო ვართ ოსურეფი.
ისრაელიშ სახენწჷფოშ გოჭყაფაშ უკულ, შამირიქ მუშობა ქჷდიჭყჷ მოსადის, სოდეთ 1965 წანაშახ მოღალენდჷ. შამირი ხემანჯღვერენდჷ ოპერაცია დამოკლეს 1962 წანას. ოპერაციაქ იმანჯჷ ჸეთი გერმანალი მენცარეფიშ მეხჷ, ნამუეფით მუშენდეს ეგვიპტეშ სარაკეტო პროგრამაშო. ოპერაციაშ თებაშ უკულ, შამირიქ მოსადი ქიდიტუ დო 1969 წანას ქაკათჷ მენახემ ბეგინიშ ჰერუტიშ პარტიას. 1973 წანას, შამირიქ გიშაგორილქ იჸუ ქნესეთიშ მაკათურო. 1970 წანაშე შამირი ლიკუდიშ მაკათური რდჷ. 1977 წანაშ საპარლამენტო გიშაგორუეფს, ლიკუდიშ გომორძგუაშ უკულ, შამირიქ გინირთჷ ქნესეთიშ სპიკერო. 1980 წანას, პრემიერ-მინისტრიქ, მენახემ ბეგინიქ, შამირი ქუდარინუ ისრაელიშ გალენური საქვარეფიშ მინისტრო. ჸათე პოსტი თის 1986 წანაშახ უკებუდჷ.
1983 წანას შამირიქ გინირთჷ ლიკუდიშ ლიდერო დო ქიანაშ პრემიერ-მინისტრო. მარა ართი წანაშ უკულ, 1984 წანაშ გიშაგორუეფს გემორძგუ შიმონ პერესიშ პარტიაქ, მაარახიქ. პერესიქ დო შამირიქ აფორმირეს ოთარობე კოალიცია, სოდეთ პერესიქ ქიდეკინჷ პრემიერ-მინისტრიშ პოსტი დო შამირიქ გიქესკიდჷ გალენური საქვარეფიშ მინისტრიშ პოსტის. 1986 წანას შამირიქ დო პერესიქ პოსტეფი გოთირეს. 1987 წანას ქიდიჭყჷ მაართა ინტიფადაქ. შამირი ოპონირენდჷ ჟირი სახენწჷფოშ განჩინებათ (Two-state solution) პალესტინა-ისრაელიშ კონფლიქტიშ გინოჭყვიდუას. ააშ-იშ დო სხუნუეთიშ ინიციატივათ, შამირიქ წიმიჭყჷ პალესტინაწკჷმა ოთინჩალე მორაგადაფა, ნამუქჷთ უკულ გეგინძორჷ მადრიდიშ 1991 წანაშ კონფერენციათ. 1992 წანაშ გიშაგორუეფს შამირიშ ლიკუდიქ დემარცხჷ იცხაკ რაბინიშ ავოდაწკჷმა. 1993 წანაშე ლიკუდიშ ლიდერო ბინიამინ ნეთანიაჰუქ გინირთჷ.