კოლხეთიშ რზენი

კოლხეთიშ რზენი, კოლხეთიშ რზენიშ დაბალი ნორთი, იკათუანს აკუმულაციურ დჷკი-რზენს დო გოხოლუაშ სტრუქტურულ-ეროზიულ გა-სუკეფს ზუღაშ დონეშე 200 მეტრა-შახ. მაართა ეგაფილიე პლეისტოცენური დო ჰოლოცენური ჭუბერონათ, ქვიშეფით დო რეყონათ, მაჟირა — დისლოცირაფილი კაინოზოური ასაკიშ ნოლექეფით. კოლხეთიშ რზენი ონდეთ გეკინელიე უჩა ზუღაშჸურე დო გინოკვათილიე მორჩილი სიტომბაშ ლეხერით. თინა სუმკუნთხულიშ ფორმაშ რე, ნერჩი უჩა ზუღას მიკობიჯჷ დო წვანჯი ნოღა ზესტაფონწკჷმა უღუ. აჭარას დო აფხაზეთის კოლხეთიშ რზენი ონჭირე ზოლო იფაჩუ. კოლხეთიშ რზენს ზუღაშური ლამე სუბტროპიკული ჰავა რე. ღურთუთაშ ოშქაშე ტემპერატურა 3,5-4-შე 6-6,5°C-შახ რე, მარაშინათუთაშ 22-23°C. აბსოლუტური მინიმალური — 8-10°C-შახ რე, აბსოლუტური მაქსიმალური 37-38°C. უჩქჷ ბჟაეიოლიშ დო ბჟადალიშ ბორიეფი. დჷმახასიათაფალი რე ფიონეფი დო ბრიზეფი. აჭარაშ ოძგაშეს წარმოწანას 250 მმ ნოლექი მოურს. ბჟაეიოლჸურე ნოლექეფი იჭიჭარებუ 1200 მმ-შახ.

კოლხეთიშ რზენიშ თარი წყარმალუ რე რიონი (ნადუეფი — ყვირილა, ხანისწყალი, ცხენწყარი, ტეხირი). კოლხეთიშ რზენს ორხველჷ წყარმალუეფიშ ინგირწყარიშ, კოდორიშ, სუფსაშ დო ნატანებიშ თუდონი მალუეფი. წყარმალუეფი ირდუ ჭვიმაშ, თირიშ, დიხაშთუდონ დო უგურყელური წყარით. წყარალა აფუნს უჩქჷ. კოლხეთიშ რზენს გოფაჩილი რე სუბტროპიკული ეწნერი, ალუვიური, ჭყენჭყამი დო ტორფამ-ჭყენჭყამი ნერჩეფი. გა-სუკეფს ჭითადიხეფი დო ყვინთელდიხეფიე. რზენიშ ზუღაპიჯიშ ნართის ჭყენჭყამი ტყალეფი რე, მირყას რე თხუმუ დო ძერწი. უჭყენჭო ნართის კოლხური ტყაშ ნოსქილედეფი რე, ნამუშ თარი ჯიშეფიე: ჭყონი, ცხიმური, წიფური, ჭუბური, ლეფონი, ძერქვა. გოფაჩილი რე იროწვანე ქვეჩეფი დო ლიანეფი.

კოლხეთიშ რზენს ხე ტყარი ღეჯი, ყურდგელი, მელა, სქვერი, გერი, კვინორი, წვინარი, მაფურინჯეეფიშე — კოლხური ქილორი, ტყარი ღორღონჯი, ტყარი კვატა, კვათარა დო შხვა. კოლხეთიშ რზენს რე კოლხიდაშ, აჯამეთიშ, სათაფლიაშ სახენწჷფო ტყაჩირეფი.

კოლხეთიშ რზენშო დჷმახასიათაფალი ლამე სუბტროპიკული ტიპიშ ლანდშაფტი, სოდეთ გჷმირთუ ლანდშაფტიშ გიმენტიპი: ლამე სუბტროპიკული დჷკი-რზენი დო დაბალი სტრუქტურულ-ეროზიული გა-სუკეფი ლიანეფამი კოლხური ტყაშ ნოსქილედეფით დო სუბტროპიკული ენწერი დო დოჭყენჭყაფილი ნერჩეფით. მუშ ჸურეშე ნაშინეფი გიმენტიპი ლანდშაფტიშ მუსხირენი ბუნას აკმაშქვანს. კოლხეთიშ რზენიშ უდიდაში ნორთი მეჭედას რე დოხორინელი დო მაქსიმალურო რე ემუშორაფილი მეურნობაშო.

წყუეფი

• დევდარიანი გ., ქორთული სხუნუეფიშ ენციკლოპედია, ტ. 5, ხს. 595, ქართი, 1980 წანა.
• მარუაშვილი ლ., საქართველოს ფიზიკური გეოგრაფია, ნორ. 1-2, ქართი, 1969-1970;
• სანებლიძე მ., უკლება დ., ჯაყელი ქ., საქართველოს ლანდშაფტური რუკა, ქართი-მ., 1970