ვიკიპედია

კრიშტიანუ რონალდუ

კრიშტიანუ რონალდუ დუშ სანტუშ ავეირუ (პორტ. Cristiano Ronaldo dos Santos Aveiro; ევროპული პორტუგალიური: [kɾiʃˈtjɐnu ʁoˈnaɫdu] ( მორჩქილა); დ. 5 ფურთუთა 1985, ფუნშალი, პორტუგალია) — პორტუგალიარი მობურთე, პორტუგალიაშ ერუანული ნაკორობაშ გემანთხაფალი, საუდიშ არაბეთიშ ოკუჩხბურთე კლუბი ან-ნასრიშ კაპიტანი. ევროპაშ ჩემპიონი. იკოროცხუ არძა ბორჯიშ ართ-ართი არძაში უჯგუში მობურთეთ[1][2].

კუჩხბურთი
კუჩხბურთი
კრიშტიანუ რონალდუ
Cristiano Ronaldo
დორხველი მუნაჩემეფი
დაბ. თარიღი 5 ფურთუთა, 1985 (1985-02-05) (39 წანერი)
დაბ. აბანი ფუნშალი, პორტუგალია
სიმაღალა 187 სმ.
პოზიცია ფორვარდი
ერუან. ნაკორობა პორტუგალიაშ შილა პორტუგალია (7)
ინფორმაცია კლუბიშ გეშა
კლუბი ან-ნასრი
ნომერი 7
კრიშტიანუ რონალდუ დო ლიონელ მესი

კისეფ-იშ მუნაჩემეფით, კუჩხბურთიშ ისტორიას არძაშე უჯგუში ბომბარდირი დო RSSSF-შ მუნაჩემეფით — მაანთხა(ინგლ.)მარგ., არძაშე შედეგამი მობურთე ნაკორობაშ დონეს[3], თაშნეშე ესპანური კლუბი „რეალ მადრიდიში“. პორტუგალიაშ კუჩხბურთიშ ფედერაციაშით აღიარაფილი რე პორტუგალიაშ ფეხბურთიშ ისტორიაშ საუჯგუშო მობურთეთ[4]. ისტორიას პირველი მობურთე რე, ნამუქჷთ შილებუ ინგლისიშ პრემიერ-ლიგაშ, ესპანური პრიმერაშ დო იტალიაშ სერია A-შ გომორძგუალა. აღიარაფილი რდჷ თე ტურნირეფიშ ირი სეზონიშ საუჯგუშო მოლაჸაფეთ დო ბომბარდირო.

პროფესიული კარიერა დიჭყჷ პორტუგალიურ ოკუჩხბურთე კლუბი „სპორტინგის“, 2003 წანას გინორთჷ ინგლისურ ოკუჩხბურთე კლუბი „მანჩესტერ იუნაიტედიშა“, 2009 წანას — ესპანურ „რეალ მადრიდიშა“ (2013 წანშახ თე ტრანსფერიშ მუდანობა რეკორდული რდჷ კუჩხბურთიშ ისტორიას), 2018 წანას — იტალიურ „იუვენტუსიშა“. ანდაშა დეინალჷ France Football-იშ ორქოშ ბურთი (2008, 2016, 2017), ფიფაშ „ორქოშ ბურთი“ (2013, 2014) დო „ევროპაშ ორქოშ ბუცი“ (2008, 2011, 2014, 2015). კრიშტიანუ რონალდუ რე რეკორდსმენი ევროკლუბეფს მანჯებული მატჩეფიშ მუდანობათ, არძა ბორჯიშ ევროპული ტურნირეფიშ საუჯგუშო ბომბარდირი, უეფაშ ჩემპიონეფიშ ლიგაშ ისტორიას საუჯგუშო ასისტენტი[5] დო რეკორდულო, შკვითშა რდჷ უეფაშ ჩემპიონეფიშ ლიგაშ სეზონიშ საუჯგუშო ბომბარდირი, ნამუეფშე ამშვის — მეჸუნელო: 2008 წანას, თაშნეშე 2013, 2014, 2015, 2016, 2017 დო 2018 წანეფს. მეჸუნაფილო მასუმა ჩემპიონეფიშ ლიგას გომორძგვილი რე „რეალ მადრიდიშ“ აკოდგინალუას დო გჷნირთუ პირველ მოლაჸაფეთ, ნამუქჷთ მიგჷ თე თასი ხუთშან.

პორტუგალიაშ ერუანულ ნაკორობაშ აკოდგინალუას ილაჸაფჷ 200 მატჩის, ნამუთ რე საუჯგუშო შედეგი ნაკორობეფიშ ისტორიას, ილაჸაფჷ 13 ტურნირს დო არძას სახელი ქიძირჷ. 2008 წანაშე რე ნაკორობაშ კაპიტანი, 2014 წანას თიშ საუჯგუშო ბომბარდირო გჷნირთუ, 2016 წანას ნალაჸაფინა მატჩეფიშ მუდანობათ რეკორდი მონწყჷ. ნაკორობაშ აკოდგინალუას გჷნირთუ ევრო 2016-შ დო უეფაშ 2019 წანაშ ერეფიშ ლიგაშ გომორძგვილო. პირველი ევროპალი რე, ნამუქჷთ შილებუ 100 დო უმოსი ბურთიშ მითოღალა ნაკორობაშ აკოდგინალუასჷნ.

მოსოფელს ართ-ართი ჩინებული სპორტსმენი, 2016 დო 2017 წანეფს, ჟურნალი Forbes-იშ მეჯინათ აღიარაფილი რე არძაშე მაღალგინოგაფური სპორტსმენო[6][7]. 2014 წანას, Time-იქ რონალდუ მოსოფელიშ ოში არძაშე გაულამ კათაშ ერკებულს მიშინუ. ჟურნალი Forbes-იშ მეჯინათ, 2010-2019 წწ., გიმიმუშჷ 800 მილიონი დოლარი დო ვითწანურაშ არძაშე მაღალგინოგაფურ სპორტსმენეფიშ რეიტინგის მაჟირა აბანი ეჭოფჷ, ნამუსჷთ ხვალე ფლოიდ მეივეიზერი ორჯგინანდჷ[8]. 2022 წანაშ გერგობათუთას, ისტორიას პირველი ადამიერი რდჷ, ნამუსჷთ 500 მილიონი გიშმაჭარალი ჸუნდუ Instagram-სჷნ[9].

ორდოიანი წანეფი

რედაქტირაფა

დებადჷ 1985 წანაშ 5 ფურთუთას ნოღა ფუნშალს, კოკი მადეირას. გეგესქუა მარია დოლორეშ დუშ სანტუშ ავეირუშ (დ. 1954) დო მებაღე ჟოზე დანიშ ავეირუშ (1954—2005) ფანიას მაანთხა ბაღანა რდჷ. კრიშტიანუს ჸუნს უნჩაში ჯიმა უგო (დ. 1975), დალეფი: ელმა (დ. 1974) დო ლილიანა კატია[es] (დ. 1977). კატია ავეირუ მობირე რე დო პორტუგალიას გიშმურს სასცენო ჯოხოთ Ronalda[10].

ბოშიშა კრიშტიანუშ ჯოხოშ გედვალა მიარზჷ დეიქ[11]. ბადებაშის გედვალირი მაჟირა ჯოხო — რონალდუ — მასქერეფქ რონალდ რეიგანიშ პატიოცემელო გიშაგორეს, ანდანე კრიშტიანუშ მუმას გაკეპებული აფუდჷ თიმ ბორჯიშ ამერიკაშ პრეზიდენტი დო არტისტი[10]. კრიშტიანუქ კუჩხბურთიშ ლაყაფი 2-3 წანაშ ხანს დიჭყჷ. ამშვი წანაშ ხანს აბანობურ დაჭყაფური სკოლაშა მიდართჷ, ოშქაშე კლასეფი სკოლა „ბარეირუშის“ რდჷ, უმენტაშო ჯგირი ლიშანეფი უღუდჷ, უჸორდჷ ორთაშრაგადუაშ მენცარობეფი, მარა ვაუჸორდჷ ინგლისური. 14 წანერი რონალდუ სკოლაშე გარიცხეს, ანდანე დუმაგურაფალს სკამუ ოჸოთჷ[12].

ახალნორდული კარიერა

რედაქტირაფა

ამშვი წანაშ ხანს ოლაჸაფეთ მიჭანუეს „ანდორინიაშა“, სოდე მუამუში მუშენდჷ ოკუჩხბურთე კლუბიშ ფორმაშ კეთებაშის.1993/94 სეზონს, „კამაჩიშ“ მატჩის, მუჟანსჷთ „ანდოროინია“ აგენდჷ ანგარიშით 0:2 მაჟირა ტაიმს მიშეჸონეს კრიშტიანუ, ჟირი გოლი გენთიღჷ დო ქემეხვარჷ კლუბის ანგარიშით 3:2 მუგებუდუკონ. „ანდორინიას“ მიღჷ მეტჯოხო აბელინია (თარგი:Tr-pt), ანდანე მოედანს ირიათო იყარუდჷ[13][14]. მალას კრიშტიანუ მიკვირეს კოკიშ ჟირი ოკუჩხბურთე კლუბიქ: „ნასიონალი“ დო „მარიტიმუ“. რონალდუშ მორდია ნარდიშანდჷ „ნასიონალიშ“ ახალნორდული ბუნას დო მორდუ მობურთეშ ძირაფა ოკოდჷ კლუბის. მარა კრიშტიანუშ მუმას ოკოდჷ „მარიტიმუშა“ გეგნურთუმუდუკონჷ. გინოჭყვიდირელქ იჸუ ჟირხოლო კლუბიშ წჷმმარინაფალეფწკჷმა შეხვამილფაქ „ანდორინიაშ“ პრეზიდენტწკჷმა, მარა „მარიტიმუშ“ ახალნორდული ბუნაშ მაწვართალქ ვამორთჷ. საბოლათ კრიშტიანუქ გეგნოირთჷ „ნასიონალშა“ 20 ბურთიშ დო ახანორდული ფორმაშ კომპლექტიშ მანგიორშა.

მუჟანსჷთ რონალდუქ „ნასიონალს“ აკათჷნ ვითი წანერი რდჷ. „ნასიონალიშ“ მაწვართალქ მიკვირჷ ჭიჭე მობურთეშ ცქირი ანაგი დო კუთიშ მასაშ მაძინალო ურჩიუ უმოსი ოჭკომალიშ ჭკომუა. უკვე ტე ეტაპიშო რონალდუ ოძირანდჷ ჯგირი ტექნიკას, მაღალი ბოწორს, ზუსტი პასეფს დო ბურთიშ ღვენას, მარა კრიშტიანუშ მენტორეფს მობურთეშ მეტიშ მეტი ინდივიდუალიზმიშ დო ყადიჩიშ გეშა პრობლემაქ აშუეს. 1995/96 სეზონს რონალდუქ „ნასიონალწკჷმა“ 10-12 წანერეფს შქას ჩემპიონატის გიმორძგჷ. ახალნორდი მობურთე მიკვირუეს „პორტუქ“ დო „ბოავიშტაქ“. რონალდუშ მორდიაქ მიკართჷ ნანანოღაშ ოკუჩხბურთე კლუბი „სპორტინგიშ“ წჷმმარინაფალეფს. მალას კლუბიქ მუში სკაუტი გოუტუ მობურთეშ გაჯინჷშა.

1997 წანაშ პირელს მიდართჷ „სპორტინგიშა“. კლუბიშ მაწვართალეფი სუაჩანაფილეფი რდეს რონალდუშ ლაჸაფით დო ახალნორდი კლუბიშ პრეზიდენტი აურელიუ პერეირუ ქიმიჭანუეს გაჯინშა. 17 პირელს, კრიშტიანუქ საბოლათ იჸუ მოჭანაფილქ „სპორტინგიშა“. „ნასიონსლს“ „სპორტინგიშ“ ვალი უღუდჷ 4,5 მლნ პორტუგალიური ესკუდოშ (22,5 ვითოში ევრო) მუდანობათ ახანორდი მობურთე ფრანკუშ გინულაშენი. რონალდუშ ტრანსფერქ თე ვალი გეგნუფორჷ. მარაშინათუთაშ დალიას, კრიშტიანუქ საბოლათ გეგნიხორჷ ლისაბონშა. მოსვანჯაშ დღალეფს გეთმუმჯშუანდჷ „სპორტინგის“მატჩეფს ბურთეფის მეჭირინაფას. 15 წანაშ ხანს რონალდუს გეგმურჩქინდჷ ტახიკარდიაქ ბადებაშური გურიშ მანკიშ გეშა. ქეგიახვილჷ ქირურგიულ ოპერაციაქ, ნამშ შედეგო კრიშტიანუს ლაზერულო აკუდგინეს გურიშ დაღამაკებული აბანი დო მუსხირენ დრაშა გეგშაჭარეს. ოპერაციაქ მუთუნნერი გაულა ვეღვენუ მობურთეშ სპორტულ მუნაჩემეფშა[15][16]. 16 წანაშ ხანს, კლუბიშ ისტორიას თიქ აკა მობურთეთ გჷნირთუ, ნამუქჷთ ართი სეზონიშ გოძვებას, „სპორტინგიშ“ არძა აკოდგინალუას ილაჸაფჷნ (16, 17, 18 წანერშახიანეფი დო სარეზერვო ნაკორობას)[17]. 2001 წანაშ მარაშინათუთას, რონალდუქ მაჭარჷ მუში პირველი პროფესიონალური კონტრაქტის ოთხი წანაშ ხანით დო თუთას 2000 ევროშ მუდანობაშ ხეშქირათ[16].

კლუბური კარიერა

რედაქტირაფა

სპორტინგი

რედაქტირაფა

2002 წანაშ კვირკვეს, მაწვართალი ლასლო ბელენქ, რონალდუშ დრიბლინგეფით ფსუაჩანაფილქ[18], კრიშტიანუ ქიმიჭანჷ თარი ნაკორობაშ სეზონიშ წჷმიანი სპარინგეფშა. „სპორტინგიქ“ მოუგჷ „რიო-მაიორს“ ანგარიშით 5:0. თე მატჩიშ უკული ბელენქ რონალდუ ოლაჸაფე ვეშ ცენტრიშე ფლანგიშა გეგნიჸონჷ, თიში სიბიწორეშ უჯგუშო გჷმარინაფალო. 3 მარაშინათუთას, „რეალ ბეტისიშ“ სააწმარენჯო საკონტროლო მატჩის კრიშტიანუქ მოლათირეთ გეგშართჷ დო გენთიღჷ გოლი, დო მუში ნაკორობას ქემეხარჷ გომორძგუას ანგარიშით 3:2[19]. თიმ ბორჯის თაშნეშე ლაჸაფენდჷ პორტუგალიაშ ახალნორდულ ნაკორობას 17 წანერშახ ახალნორდული ევროპაშ ოკუჩხბურთე ჩემპიონატის[20]. 14 მარაშინათუთას, „ინტერნაციონალეშ“ სააწმარენჯოთ მანჯებულჷ მატჩის კრიშტიანუშ დებიუტიქ იჸუ ოფიციალური მატჩეფს მუში ნაკორობაშ ჩემპიონეფიშ ლიგაშ საკვალიფიკაციეთ[21].

 
„სპორტინგიშ“ ბორჯიშ რონალდუშ ოშუენე მეკონეფი, თინეფს შქას თიმ ბორჯიანი თიში ოლაჸაფე ოსარე

2002 წანაშ 18 მარაშინათუთას, რონალდუქ მუში პროფესიულ კლუბურ კარიერას მიღჷ პირველი თასი — პორტუგალიაშ სუპერთასი, მარა მატჩიშა ვეშალებჷ კათაფაქ. 7 გჷმათუთას, რონალდუქ დებიუტით გიშართჷ პორტუგალიაშ ჩემპიონატშა „მორეირენსეშ“ სააწმარენჯოთ. კრიშტიანუქ დუბლი მანჯჷ დო ქემეხვარჷ მუში კლუბის მოგებას ანგარიშით 3:0. 17 წანაშ 8 თუთაშ დო 2 დღაშ ხანს „სპორტინგიშ“ ისტორიას პირველი ახალნორდი გოლიშ ავტორო გჷნირთუ[21]. სეზონიშ მანჯებაშის, 17 წანერი რონალდუს თოლი მაკინდჷ „ლივერპულიშ“ თიჟამიანი თარი მაწვართალქ, ჟერარ ულიექ, მარა „მერსისაიდარეფს“ ვეგნაჭყვიდირეს პორტუგალიარწკჷმა კონტრაქტიშ დოდვალაქ, მირჩქინეს, ნამჷ-და კრიშტიანუ დიო ძალამ ახალნორდი რე დო მუში უნარეფიშ ხალიწუაშო ბორჯის ოხჷნილჷნ[22]. თეშნერო გინოჭყიდეს „ინტერსჷთ“. კრიშტიანუთ დეინტერესჷ ლონდონიშ „არსენალიშ“ მაწვართალი არსენ ვენგერქ, ნამუქჷთ პიჯულო მეუჯღონჷ ლონდონშა მოწვია[23]. თაშნეშე რონალდუთ დეინტერესეს ესპანური „ვალენსიაქ“ დო „ატლეტიკო მადრიდიქ“[24], თეწკჷმა იტალიური „პარმაქ“ დო „იუვენტუსიქ“ 10 მილიონ ევროშე უმოსიანი კონტრაქტით მიარზიეს[25]. კრიშტიანუქ სეზონიშ ბოლოს ჩემპიონატიშ 25 მატჩის ილაჸაფჷ, ნამუეფშე 11 — სასტარტო აკოდგინალუას. ლიგას ჟირი გოლი მითიღჷ, სუმი გოლი — პორტუგალიაშ თასის.

2003 წანაშ ზარხულს, ახალნორდი პორტუგალიარი მობურთეს თოლი მაკინდჷ „მანჩესტერ იუნაიტედიშ“ თარი მაწვართალქ, ალექს ფერგიუსონქ (მუში მოხვარე კარლუშ კეიროშიშ რეკომენდაციათ). 6 მარაშინათუთაშო დოგეგმილი რდჷ „სპორტინგწკჷმა“ მაჸალური მატჩი ლისაბონს ჟოზე ალვალადეშ“ ჯოხოდვალაშ სტადიონიშ გონწყუმაშ პატიოცემელო. მატჩიშახ ართი დღაშ კინოხ მირაგადუეს 12,24 მილიონი გირვანქა ფუნტიანი ტრანსფერშა[26] დო მობურთეს წანმოწანას 2 მილიონი ევრო მიარზუეს. გინულაშენ გჷმოცხადებულქ იჸუ 12 მარაშინათუთას. „სპორტინგწკჷმა“ მატჩის გიმორძგჷ „იუნაიტედიქ“ ანგარიშით 3:1, რონალდუქ საგოლე პასი გინოჩჷ ლუის ფილიპეს[27].

მანჩესტერ იუნაიტედი

რედაქტირაფა

დებიუტი დო პირველი მეჭირინაფეფი (2003—2007)

რედაქტირაფა

2003 წანაშ 13 მარაშინათუთას, რონალდუქ ოფიციალურო წჷმორინაფილქ იჸუ „ოლდ ტრაფორდის“[28]. თიქ „მანჩესტერ იუნაიტედიშ“ ისტორიაშო პირველი პორტუგალიარი მობურთეთ გჷნირთუ[29]. მობურთეთ მუშო მითხჷ ნომერი 28 (მუში ნომერი „სპორტინგის“), ანდანე დუდს ეთმუღანდჷ 7 ნომერწკჷმა მერსხილჷ გეძინელი გენჭირას, ნამუთ კინოხჷ ორხველუდჷ თიჯგურა მოლაჸაფეეფს მუჭოთ რდეს: ჯორჯ მესტი, ბრაიან რობსონი, ერიკ კანტონა დო დევიდ ბექჰემი[30].

თიშ უკული მუთ კლუბშა გინობრთინ, მაწვართალქ შემეკითხჷ, დო ნამუ ნომერით მონებუდუ ლაჸაფინ. უგამჷ, ნამჷ-და 28 ნომერი მონებუდჷნ. მარა ფერგიუსონქ თქჷ: „ვარი, სი გაღვენუ ნომერი 7“. თე ჩინებული ოსარექ ჩქიმო მოტივაციაშ გეძინელი წყუთ გჷნირთუ. თეშ უკული აძვილებური ვორდი გამიმართებუდუკო საღალე ჩქიმდა გინოჩამილი კაბეტი პატიშ ოგამეთ.
კრიშტიანუ რონალდუ “მანჩესტერ იუნაიტედშა“ მუში ტრანსფერიშ გეშა[31][32].

2003 წანაშ 16 მარაშინათუთას, ოლდ ტრაფორდიშ სტადიონს, „მანჩესტერ იუნაიტედის“ რონალდუშ დებიუტიქ იმანჷ „ბოლტონ უონდერერსიშ“ სააწმარენჯო მატჩის. შეხვალამაქ გეთჷ მენძელეფიშ გომორგუათ, ანგარიშით 4:0[33]. დუდშე რონალდუს ვემიარჩქვანინჷ ინგლისის კონტაქტური ლაჸაფიშ სტილშა, სოდე ოშქაშემათხილეეფს უმოსი დუდიშული ქიმინუაშ ნებას არზენდესჷნ, ვინდარო პორტუგალიას[34]. „ჭითეფშო“ პორტულარიარქ მუში პირველი გოლი მითიღჷ 2003 წანაშ 1 მარაშინათუთას „პორსმუთწკჷმა ლაჸაფიშის საჯარიმო გეშქუმალათ, ნამუქჷთ გეთჷ ანგარიშით 3:0[35]. 2004 წანაშ 25 ფურთუთას, ჩემპიონეფიშ ლიგაშა, კრიშტიანუქ პირველაშე გიშართჷ „იუნაიტედიშ“ აკოდგინალუას „პორტუწკჷმა“ მატჩიშის[36]. „მანჩესტერ იუნაიტედიქ“ სეზონი მასუმა აბანით გათჷ. მარა კლუბის იშენით ქუდასქიდჷ მაგებელი შანსიქ  — ინგლისიშ თასიშო. ფინალს „მილუოლიშ“ სააწმარენჯო მატჩის რონალდუქ გენთიღჷ გოლი, საბოლათ თიში ნაკორობაქ გიმორძგჷ ანგარიშით 3:0 დო ქოთ თე ტურნირით გიმორძგჷ[37]. რონალდუქ გათჷ სეზონი, ედომუშამი ტურნირიშ 40 მატჩის 8 გოლიშ მითოღალათ. „იუნაიტედიშ“ გურმემაჭვეეფიშ კალიშრღვაფაშ შედეგეფით, კრიშტიანუქ დეინალჷ სერ მეტ ბასბიშ ჯილდო[38].

მოსოფელიშ ჩემპიონატის უეინ რუნიწკჷმა მოხვალამერი ინციდენტიშ გეშა, რონალდუშ გურმემაჭვეეფქ გეჸვნჯი ბირა მეუნძღვიეს: „ხვალე ართი რონალდო რე.“ 2006 წანაშ გჷმათუთას დო გერგობათუთას მობურთე პრემიერ ლიგაშ თუთაშ საუჯგუშო მოლაჸაფეთ დასახელეს. გეწ-გეწას ჟირშა — თე ჯილდო ხვალე დენის ბერგკამპის დო რობი ფაულერს აფჷდეს მეღებული. მანჩესტერულ კარიერას ჟარნეჩდომავითა გოლი — რონალდუქ „მანჩესტერ სიტის“ მითუღჷ. თიმ წანას — იუნაიტედიქ 4-წანიანი სვანჯიშ უკული პრემიერლიგა მიგჷ.

2007 წანაშ მელახის, რონალდუშ სამანგიოროთ მადრიდიშ „რეალი“ სარეკორდო ფარას, 80 მლნ. ევროს გინმიგანდჷ. ხეშქირათ სახეთ — მობურთეს 120 000 გირვანქა სტერლინგის ოპირუდჷ, მარა თიმ წანას 13 პირელს, ახალი კონტრაქტიშ მეჯინათ, პორტუგალიარქ პრემიერლიგაშ არძაშე მაღალ გინოგაფურ მოლაჸაფეთ გჷნირთუ.

თიმ სეზონიშ პორტუგალიეარქ ინდივიდუალური ჯილდოეფთ მიპალჷ: თინა დასახელეს ინგლისიშ წანაშ საუჯგუშო ახალნორდი მობურთეთ დო თაშნეშე პრემიერლიგაშ საუჯგუშო მოლაჸაფეთ.

2007–2008 წანეფიშ სეზონი — რონალდუშო უჸვაიჭარეთ დიჭყჷ, ანდანე პირველშე ოფიციალურ მატჩის გეგშააჸათეს „პორტსმუთწკჷმა“ მატჩის. სეზონიშ სადებიუტო გოლი კრიშტიანუქ ჩემპიონეფიშ ლიგას მითიღჷ, კიივიშ დინამოშ სააწმარენჯოთ.

2007 წანას, პორტუგალიარი კაკაშ უკული ორქოშ ბურთიშ ლაურეანტეფს მაჟირა აბანი დეკჷ.

2008 წანაშ 12 ღურთუთას, რონალდუქ მუში მანჩესტერულ კარიერას პირველაშე არსულჷ ჰეთ-თრიკი, თექ „ნიუკასლწკჷმა“ მატჩის მოხვადჷ. ჩემპიონეფიშ ლიგას — თიში ბუნა ირო წჷმი ინჭაფუდჷ, მანჩესტერალეფქ 1/8 ფინალს ფრანგული ლიონიშ „ოლიმპიკი“ დამარცხეს, რონალდუქ გომაჟირელ მატჩის გინმაჭყვიდირალი გოლი მითიღჷ.

2008 წანაშ 19 მელახის, „ბოლტონწკჷმა“ მატჩის კრიშტიანუქ პირველაშე გეუდირთჷ კაპიტანო „მანჩესტერ იუნაიტედის“. მატჩი თიში ბუნაქ მიგჷ ანგარიშით 2–0. ჟირხოლო გოლი მუში ანაგრიშიშა რონალდუქ ქინიჭარჷ. საბოლათ, პორტუგალიარქ წანაშ საუჯგუშო ბომბარდირიშო გიშაკერზებული, ორქოშ ბუცი მიპალჷ, აწულჷ 8 ქულათ მაჟირა აბნაშა გიშულრი დანიელ გისას.

2007–2008 წანეფიშ სეზონიშ ჩემპიონეფიშ ლიგაშ ფინალს, რონალდუქ „ჩელსიშ“ სააწმარენჯოთ, ანგარიშიშ გონწყუმა მიხუჯჷ. საბოლათ — ტიტული თიში ნაკორობაქ დეინალჷ, ალექს ფერგიუსონიშ ნაწვართეფქ მატჩი პენალტეფიშ სერიას მიგეს, ანგარიშით 6–5.

2008 წანაშ ზარხულს, პორტუგალიარი მადრიდიშ „რეალშა“ გინულაშო ძალამ არხოს რდჷ, მარა ტრანსფერიშ მანჯებაშ ალბეთობა მანჩესტერულ ჸურექ ივარუ. მარაშინათუთას — კჷნე მუ მობურთექ დადასურჷ, ნამჷ-და მინიმუმ ართი სეზონით კჷნი მანჩესტერს აპირებს დოსქიდუდჷნ.

რეალ მადრიდი

რედაქტირაფა
 
რონალდუ, აიაქსიშ სააწმარენჯოთ.

2009 წანაშ 26 მანგის ოფიციალურო დედასურჷ ინფორმაციაქ რონალდუშ "რეალ მადრიდშა" ტრანსფერიშ გეშა. მობურთექ ახალ კლუბიწკჷმა 6-წანიან კონტრაქტის მაჭარჷ ხე.[39] 2010-11 წანეფიშ სეზონს მუს სარეკორდო მაძირაფალი უღუდჷ - 40 გოლი ლა ლიგას. დიეგო მარადონაშ არზით, კრიშტიანუ რონალდუ მოსოფელიშ საუჯგუშო მობურთე რე.[40]

კრიშტიანუქ მადრიდიშ რეალიშ რანწკეფს მერეთი მაძირაფალი ოძირჷ 394 მატჩის 406 გოლი, თენა სარეკორდო შედეგი რე.

პერესიქ რონალდუს 96 მილიონი ევრო გინუგჷ დო ართ-ართი საუჯგუშო ნაჸიდირქ აჸუ. 2008 წანაშ საუჯგუშო მობურთექ „რეალს“ მეხვარჷ „ბარსელონაშ“ ჰეგემონიაშ თებას.

„სანტიაგო ბერნაბეუს“ 90 000 ადამიერქ აკიშაყარჷ, ანდანე თიში პრეზენტაციაშო ქუჯინუდესკონ. 4 წანაშ უკული, რონალდუქ ირნერ ლებას უმოსი იქჷ. მითინ ვაფირქენდჷ, ნამჷ-და რონალდუ 209 მატჩის 209 გოლს გენთიღანდჷ დო ომაფე კლუბიშ ისტორიას ართ-ართი საუჯგუშო მობურთეთ გინირთუდჷნ.

რონალდუქ გინმაჭყვიდირე როლი არსულჷ „რეალ მადრიდიშით“. 2014 წანას, ჩემპიონეფიშ ლიგას წჷმოძინას მიოჭირინუნჷ. რონალდუქ ტურნირს 17 გოლი მითიღჷ, თინეფშე ართი ფინალს. 2016 წანას, რონალდოქ კჷნე გიბარჩხალუ ჩემპიონეფიშ ლიგას, გენთიღჷ 16 გოლი, გჷნირთუ ტურნირიშ ბომბარდირო დო თეთ ნჯილოშ თია მიშეღჷ მადრიდიშ რეალიშ მორანწკე, მა-11 ჩემპიონეფიშ თასიშ მოგებაშო. 2016-17 წანაშ სეზონქ ჩემპიონეფიშ ლიგას, ელაზჷმაფათ ინერტულო დიჭყჷ. ლაჸაფიშ დაჭყაფურ ეტაპის შურო ვაჸაფუდჷ გოლი მითნაღელი დო ბომბარდირეფიშ დაკასჷთ შანულამო დათმჷ პოზიციეფი უშქაშე კონკურენტ ლიონელ მესიწკჷმა, ნამუთ ბომბარდირეფიუშ დალას 10 მითნაღელი გოლით ლიდერენდჷ, მარა ჩემპიონატიშ ბოლო სტადიას კარდინალურო დოთირჷ სიტუაცია. ნაანთხაფინალურ ეტაპის, ლიონელ მესიქ დორხველი ბუნაწკჷმა ართო გეგშალჷ ლაჸაფიშე, მადრიდიშ რეალქ — ტრიუმფით გათჷ გიშულა დო შილებუ თინა მუთ აკა კლუბის ვაგშართჷნ, გეწ-გეწას მაჟირათ მიგჷ ჩემპიონეფიშ ლიგა დო ქისქილიდჷ ტიტული, რონალდუქ — ფინალს მითნაღელი დუბლით გიწულჷ უშქაშე კონკურენტის დო 12 მითნაღელი გოლით ბომბარდირალა კჷნე მითინს ვადუთმჷ.

იუვენტუსი

რედაქტირაფა
 
რონალდუ 2019 წანას

2018 წანაშ 10 კვირკვეს ხექ მიჭარინჷ ოთხ წანიან კონტრაქტიშა, თიმ პერიოდიშო იტალიაშ მოქიმინჯე ჩემპიონ „იუვენტუსწკჷმა“, „იუვენტუსიქ“ რონალდუშ გეშა 100 მილიონი ევრო გინიგჷ.[41] რონალდუშ ოფიციალური დებიუტიქ ბუნას იმანჯჷ 2018 წანაშ 18 მარაშინათუთას, სერია ა-შ მატჩის „ჩიევოშ“ საწმარენჯოთ, თე მატჩი „იუვენტუსიქ“ ანგარიშით3-2 მიგჷ .პირველი ოფიციალური გოლი მითიღჷ იტალიური „სასუოლოშ“ სააწმარენჯოთ, „იუვენტუსიქ“ მატჩი ანგარიშით 2-1 მიგჷ. თიში დებიუტი ევროორულაშეს „იუვენტუსიშ“ ოსარეთ იმანჯჷ 2018 წანაშ 19 ეკენიას, ესპანური „ვალენსიაშ“ სააწმარენჯოთ, სოდე იუვენტუსიქ გიმორძგჷ ანგარიშით 2-0.

მანჩესტერ იუნაიტედი

რედაქტირაფა

2021 წანაშ 27 მარაშინათუთას, რონალდუქ „მანჩესტერ იუნაიტედშა“ დირთჷ. „მანჩესტერქ“ თიში ხეახალშო ოჸიდეთ 12,9 მილიონი გირვანქა სტერლინგი გინიგჷ. 11 ეკენიას „ოლდ ტრაფორდის“ რონალდუშ ხემაჟია დებიუტიქ იმანჯჷ „ნიუკასლიშ“ სააწმარენჯო მატჩის, ნამუთ „მანჩესტერქ“ მიგჷ ანგარიშიტ 4-1. რონალდუქ თე მატჩის 2 გოლი გენთიღჷ. ჩემპიონეფიშ ლიგას კრიშტიანუშ ხემაჟია დებიუტიქ „მანჩესტერ იუნაიტედიშ“ ოსარეთ იმანჯჷ „ვილიარეალიშ“ სააწმარენჯო მატჩის, ნამუთ „იუნაიტედიქ“ მიგჷ ანგარიშით 2-1.

2022 წანაშ 22 გერგობათუთას, ინგლისურ ოკუჩხბურთე კლუბიქ კრიშტიანუ რონალდუწკჷმა კონტრაქტი გაუქვუ. თეიშახ რონალდუქ სკანდალური ინტერვიუ მეჩჷ ბრიტანეთიშ ტელევიზიას (პირს მორგანს). თიქ რაგადჷ, მანჷ-და „მანჩესტერ იუნაიტედიშ“ მაწვართალი ერიკ ტენ ჰაგი დო თინა ვა რდეს ართიანშოთ პატჷცემულო ჯგირი გურით მერინელი. თეშ მოხ, თიში ზიტყვეფით, თის აძვილენდეს, ქუდუტებუდუკო ბუნა მაწვართალეფიშ აკოდგინალუაშ თირუაშ ფონს.[42][43]

ან-ნასრი

რედაქტირაფა
 
კრიშტიანუ რონალდუ „ან-ნასრიშ“ აკოდგინალუაშ ნარდიშუას, 2023 წანაშ ეკენია
ჩქიმი გინულა უნიკალური რე დო ვარიო? ქო, თიშ გეშა ნამჷ-და მა უნიკალური მოლაჸაფე ვორექ... არძა რეკორდი მობნწყი ევროპას დო მოკო ნამდგაინ რეკორდი ათაქჷთ.
კრიშტიანუ რონალდუ „ან-ნასრიშა“ გინულაშ გეშა[44].

2022 წანაშ 30 ქირსეთუთას გჷმიცხადუ, ნამჷ-და კრიშტიანუ რონალდუქ საუდიშ არაბული კლუბი „ან-ნასრიწკჷმა“ ხე მაჭარჷ 2,5-ანიან კონტრაქტის[45]. მუჭოთThe Guardian-ქ გუმაცხადჷნ, პორტუგალიარქ ისტორიას არძაშე უმოსი ხეშქირა მიღჷ — 200 მილიონი ევრო წანმოწანას[46][47]; თიშა მიშმეშჷ გარანტირებული ხეშქირა წანმოწანას 90 მილიონი ევროშ მუდანობათ, თაშნეშე კომერციული დო სპონსორული გარიგეფი, ნამუეფქჷთ რონალდუშ წანმოწანური ხეშქირა 200 მილიონი ევროშახ გეკიონჷ. რაგადეფით, თის კონტრაქტიშა ხეშ მოჭარუაშ გეშა ბონუსო 100 მილიონი ევრო გინუგეს[48]. რონალდუქ „სპორტინგ კანზას-სიტიშა“ გინულა გინივარჷ, „ან-ნასრიშა“ გინულაშ სამანჯელით[49].

2024 წანაშ მესის, რონალდუქ დეინალჷ „ორქოშ ბუცი“ მუჭოთ ქიანაშ ჩემპიონატიშ საუჯგუშო ბომბარდირი[50]. თე სეზონს თიქ 35 გოლი მითიღჷ.

მენაჭირინუეფი

რედაქტირაფა
 
რონალდუ ორქოშ ბურთით, 2015 წანას

საკლუბო

რედაქტირაფა
  მანჩესტერ იუნაიტედი (10)[51]
  რეალ მადრიდი (16)[51]
  იუვენტუსი (4)

ონაკორობე

რედაქტირაფა
  პორტუგალია (2)

ინდივიდუალური

რედაქტირაფა
漢>ა
A>ა		 თე სტატია/სექცია მარგალურ ნინაშა თანგუაშ პროცესის რე.
მარგალურ ქოიჩქჷნადა, თქვა ხოლო შეილებჷნა ქიმმეხვარათინ.
  • Bravo Award (1): 2004
  • FIFPro Special Young Player of the Year (2): 2004, 2005
  • წანაშ საუჯგუშო პორტუგალიარი მობურთე (3): 2006–07, 2007–08, 2008–09
  • უეფა-შ წანაშ საუჯგუშო ბუნა (4): 2003–04, 2006–07, 2007–08, 2008–09
  • Sir Matt Busby-შ წანაშ საუჯგუშო მოლაჸაფე (3): 2003-04, 2006–07, 2007–08
  • FIFPro World XI (3): 2006–07, 2007–08, 2008–09
  • Best Portuguese Footballer in Foreign Countries (3): 2006-07, 2007-08, 2008-09
  • PFA-შ წანაშ საუჯგუშო ახალნორდი მობურთე (1): 2006–07
  • PFA Players-შ წანაშ საუჯგუშო მოლაჸაფე (2): 2006–07, 2007-08
  • PFA Fans' წანაშ საუჯგუშო მოლაჸაფე (2): 2006–07, 2007–08
  • PFA-შ პრემიერ ლიგაშ წანაშ საუჯფუშო ბუნა (4): 2005–06, 2006–07, 2008–09
  • FWA-შ წანაშ საუჯგუშო მოლაჸაფე (2): 2006–07, 2007–08
  • Barclays-შ სეზონიშ საუჯგუშო მოლაჸაფე (2): 2006–07, 2007–08
  • პრემიერლიგაშ თუთაშ საუჯგუშო მობურთე (4): გერგობათუთა, 2006, ქირსეთუთა, 2006, ღურთუთა, 2008, მელახი, 2008
  • პრემიერ ლიგაშ ორქოშ ბუცი (1): 2007–08
  • Barclays Merit Award (1): 2007–08
  • უეფა-შ ჩემპიონეფიშ ლიგაშ საუჯგუშო ბომბარდირი (1): 2007-08
  • ევროპაშ ორქოშ ბუცი (1): 2007–08
  • UEFA Club-იშ საუჯგუშო გემანთხაფალი (1): 2007–08
  • UEFA Club-იშ წანაშ საუჯგუშო მოლაჸაფე (1): 2007–08
  • FIFPro-შ წანაშ მობურთე (1): 2007–08
  • FIFA Club World Cup Silver Ball (1): 2008
  • ფიფაშ ორქოშ ბურთი (3): 2008, 2013, 2014
  • ფიფაშ წანაშ მობურთე (1): 2008
  • Onze d'Or (1): 2008
  • World Soccer-იშ წანაშ მობურთე (1): 2008
  • ფიფაშ ფერენც პუშკაშიშ ჯილდო (1): 2009

მენდალეფი

რედაქტირაფა
  • მაფასქირ ანრიშ ორდენი
  • მერიტიშ მედალი

ლიტერატურა

რედაქტირაფა

რესურსეფი ინტერნეტის

რედაქტირაფა

სქოლიო

რედაქტირაფა
  1. ↑ He's got the world at his feet. The Guardian (2008-06-08). კითხირიშ თარიღი: 2020-05-29.
  2. ↑ The 50 greatest footballers of all time. FourFourTwo (2021-01-07). კითხირიშ თარიღი: 2021-04-16.
  3. ↑ Cristiano Ronaldo goal, Portugal vs Morocco World Cup 2018: Real Madrid forward breaks record with header. The Independent (2018-06-20). კითხირიშ თარიღი: 2018-06-20.
  4. ↑ რონალდუ აღიარაფილი რე პორტუგალიაშ ფეხბურთიშ ისტორიაშ საუჯგუშო მობურთეთ (2015-01-17).
  5. ↑ Players — Most assists. უეფა — ოფიციალური ვებ-ხასჷლა. კითხირიშ თარიღი: 2020-10-28.
  6. ↑ The World's Highest-Paid Athletes 2016. Forbes. კითხირიშ თარიღი: 2018-08-27.
  7. ↑ The World's Highest-Paid Athletes 2017. Forbes. კითხირიშ თარიღი: 2018-08-27.
  8. ↑ Badenhausen, Kurt. The Highest-Paid Athletes Of The Decade: Mayweather, Ronaldo And LeBron Dominate. კითხირიშ თარიღი: 2020-01-22.
  9. ↑ Can Erozden (2022-11-21). Ronaldo becomes 1st person to reach 500M followers on Instagram. aa.com.tr. კითხირიშ თარიღი: 2023-04-11.
  10. ↑ 10.0 10.1 Lewis, Tim (2008-06-08). He's got the world at his feet. The Guardian. კითხირიშ თარიღი: 2008-11-05.
  11. ↑ კაიოლი, 2016
  12. ↑ Cristiano Ronaldo: I was expelled from school for throwing a chair at the teacher. Now Magazine (2011-07-06). კითხირიშ თარიღი: 2017-08-22.
  13. ↑ Hayward, Ben (2017-06-23). The 'little bee' who always cried – the story of young Ronaldo's path to greatness in Madeira. goal.com. კითხირიშ თარიღი: 2017-08-23.
  14. ↑ Кайоли, 2016
  15. ↑ Manchester United winger Cristiano Ronaldo needed heart operation to save career. The Telegraph (2009-01-29). კითხირიშ თარიღი: 2017-08-22.
  16. ↑ 16.0 16.1 კაიოლი, 2016
  17. ↑ Clash of the Titans. Manchester Evening News (2010-04-18). კითხირიშ თარიღი: 2014-08-30.
  18. ↑ Boloni își amintește de debutul lui Ronaldo la Sporting: "Nu reușeam să îl opresc să facă driblinguri". DigiSport (2015-01-13). კითხირიშ თარიღი: 2016-02-24.
  19. ↑ კაიოლი, 2016
  20. ↑ Famous players featured in U17 c'ships. uefau17.com.
  21. ↑ 21.0 21.1 კაიოლი, 2016
  22. ↑ Liverpool 'turned down Ronaldo'. Eurosport (2011-12-06). კითხირიშ თარიღი: 2014-08-30.
  23. ↑ Conn, David (2011-01-19). The brightest star in Europe and £1m to a mysterious agent. The Guardian. კითხირიშ თარიღი: 2011-11-11.
  24. ↑ კაიოლი, 2016
  25. ↑ კაიოლი, 2016
  26. ↑ Pilger, Sam (2017-10-06). 'He Was There to Put on a Show': Ronaldo's Legendary Manchester United Audition. Bleacher Report. კითხირიშ თარიღი: 2018-05-27.
  27. ↑ კაიოლი, 2016, ხს. 51—53
  28. ↑ კაიოლი, 2016
  29. ↑ Man Utd sign Ronaldo. BBC Sport (2003-08-12). კითხირიშ თარიღი: 2014-08-27.
  30. ↑ Taylor, Daniel (2003-08-13). Teenager takes Beckham No7 shirt. The Guardian. კითხირიშ თარიღი: 2014-08-27.
  31. ↑ McDonnell, David (2007-09-29). Cristiano Ronaldo exclusive. Daily Mirror. კითხირიშ თარიღი: 2014-08-27.
  32. ↑ I never wanted the No7. The Sun. (2007-04-12). დოარქივაფილი რე ორიგინალშე 2007-08-19-ს.
  33. ↑ Wilson, Paul (2003-08-17). Only one Ronaldo as United find new idol. The Guardian. კითხირიშ თარიღი: 2014-08-27.
  34. ↑ კაიოლი, 2016
  35. ↑ Man Utd see off Pompey. BBC Sport (2003-11-01). კითხირიშ თარიღი: 2014-08-27.
  36. ↑ კაიოლი, 2016
  37. ↑ Man Utd win FA Cup. BBC Sport (2004-05-22). კითხირიშ თარიღი: 2011-01-26.
  38. ↑ კაიოლი, 2016
  39. ↑ რონალდუ ოფიციალურად გამადრიდელდა; გაზეთი "მსოფლიო სპორტი"
  40. ↑ Maradona: Ronaldo is Portugal's only threat. Goal.com. 9 ივნისი 2012
  41. ↑ რონალდუ „იუვენტუსის“ ფეხბურთელია
  42. ↑ “"მანჩესტერ იუნაიტედმა" კონტრაქტი გააუქმა კრიშტიანუ რონალდუსთან“, რადიო თავისუფლება, 23 ნოემბერი, 2022. კითხირიშ თარიღი: 2 მაისი, 2023. (ka) 
  43. ↑ “talkSPORT-ი რონალდუშ ინტერვიუშ გეშა: თენა ონჯღორე რე, თინა ლალაკოჩი რე“, crystalsport.ge, 27 გერგობათუთა, 2022. კითხირიშ თარიღი: 2 მესი, 2023. 
  44. ↑ Роналду: я уникальный игрок, поэтому и переход уникальный. Чемпионат (2023-01-03). კითხირიშ თარიღი: 2023-01-23.
  45. ↑ Криштиану Роналду перешёл в «Аль-Насср». Чемпионат (2022-12-31). კითხირიშ თარიღი: 2022-12-31.
  46. ↑ Romano, Fabrizio (2022-12-30). Cristiano Ronaldo completes deal to join Saudi Arabian club Al Nassr. The Guardian. კითხირიშ თარიღი: 2022-12-30.
  47. ↑ Cristiano Ronaldo joins Saudi Arabian side Al Nassr until 2025. BBC Sport (2022-12-30). კითხირიშ თარიღი: 2022-12-30.
  48. ↑ Brennan, Feargal (2022-12-30). Cristiano Ronaldo considers Al Nassr offer: Salary, contract details as star moves on from Man United. კითხირიშ თარიღი: 2022-12-30.
  49. ↑ Ronaldo video: Fabrizio Romano reveals ONE other club that bid for CR7 (2022-12-31). კითხირიშ თარიღი: 2023-01-05.
  50. ↑ Historic trophy for Cristiano Ronaldo’s collection! Record-breaking Al-Nassr superstar gets his hands on Saudi Pro League Golden Boot in another 50-goal season | Goal.com (2024-05-30). კითხირიშ თარიღი: 2024-05-30.
  51. ↑ 51.0 51.1 Cristiano Ronaldo (CR7). Real Madrid Club de Fútbol. კითხირიშ თარიღი: 21 თებერვალი, 2017.
  თე სტატია პიჯიშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა.


გორილი რე "https://xmf.wikipedia.org/w/index.php?title=კრიშტიანუ_რონალდუ&oldid=230107"-შე