ჩარლი ჩაპლინი
სერ ჩარლზ სპენსერ ჩაპლინი, უკლ. (ინგლ. Sir Charles Spencer Chaplin Jr.; დ. 16 პირელი, 1889 — ღ. 25 ქირსეთუთა, 1977), უჯგუშო რჩქინელ რე, მუჭოთ ჩარლი ჩაპლინი — ინგლისარი კომედიური არტისტი, ჰოლივუდიშ კინემატოგრაფიაშ ორდოშიან-შკა პერიოდის არძაშე ჯოხოგოლაფირი მასრულებერი, თაშნეშე რეჟისორი. ჩაპლინქ გჷნირთჷ არძაშე რჩქინელ მურიცხეფშე ართ-ართ პოპულარულო მაართა მოსოფელიშ ლჷმაშახ. ჩაპლინი გჷმირინუანდჷ მიმიკურ დო იმპროვიზირებულ არტისტულ ფანდეფს. თაშნეშე თიქ წჷმოძინელო მიშართჷ ხონარამ ფილმეფიშ ეპოქაშა. ჩაპლინიშ არძაშე რჩქინელი პერსონაჟი რე ბეკა, ნამუთ ჩაპლინქ მაართას ასახიერჷ „კისტოუნიშ“ ფილმის „ობაღანე ავტორაჸუა ვენეციას“, 1914 წანას[1]. 1914 წანაშ პირელშე, კუნტამეტრაჟიანი ფილმიშ, „ეჩწუთიანი ჸოროფაშე“, მოჸუნაფილი, ჩარლი ჩაპლინქ მუშით დიჭყჷ ფილმეფშო სცენარიშ ჭარუა, თაშნეშე მუ უკეთენდჷ ფილმის რეჟისორობას, 1916 წანაშე პროდიუსერობა ხოლო იდუდუ, 1918 წანას - თიშ ფილმეფს მუშ აკნაქიმინა კომპოზიციეფქ ხოლო გორჩქინდჷ. 1919 წანას, დაგლას ფერბენკსიშ, მერი პიკფორდიშ დო დევიდ უორკ გრიფიტიშ მოხვარათ ქჷდარსხუ კინოსტუდია United Artists.[2].
| ჩარლი ჩაპლინი | |
 | |
| დაბადებაშ ჯოხო | ჩარლზ სპენსერ ჩაპლინი |
| დაბადებაშ აბანი | უოლვორთი, ლონდონი, ინგლისი |
| დებადჷ | 16 პირელი, 1889 |
| ღურჷ | 25 ქირსეთუთა 1977 (88 წანერი) ვევე,  შვეიცარია
|
| საქვარუა | არტისტი, კინორეჟისორი, კინოპროდიუსერი, სცენარისტი, კომპოზიტორი, მიმი |
| აკოქიმინჯალაშ წანეფი | 1895–1976 |
| ალმასქუ(ეფი) | მილდრედ ჰარისი (1918-1921) ლიტა გრეი (1924-1927) პოლეტ გოდარდი (1936-1942) უნა ო’ნილი (1943-1977) |
| ოფიციალური ვებხასჷლა | charliechaplin.com |
| აკადემიაშ ჯილდოეფი | |
|---|---|
| ოსკარი, | |
ჩაპლინქ ილაჸაფჷ, გინიღჷ, სცენარი ჭარჷ დო მუში მუსიკა ხოლო აკოქიმინჷ მუშ არძა ფილმშო, მუთ ღოზის გუთმულუანს თიშ კრეატიულობას დო მუნჯი კინოშ ეპოქაშ ფილმეფიშ გოლინას. ჩაპლინიშ მოღალობას იგინაფუდჷ ფრანგი მუნჯი ფილმიშ კომიკოსიშ, მაქს ლინდერიშ გოლინა, ნამუსჷთ ჩაპლინქ მუშ მუსხირენ ფილმი მიუძღნუ[3]. თიში მოღალობაშ შარა იკათუანს 75 წანას, ვიქტორიანული დო მიუზიკ-ჰოლიშ სცენეფს გიშულაშე თიშ ღურაშა, გოართოიანაფილ ომაფეს, 88 წანაშ ხანშახ. ჩაპლინიშ რინა მიარეშა ჸოფე სხუნუაშ დო ჭორეფიშ ღანკი.
1999 წანას, ამერიკულ ფილმიშ ინსტიტუტიქ ჩაპლინი რანწკით მავითა არძა ბორჯიშ უუჯგუშაშ ქომოლკოჩ კინოარტისტო ჯოხოგიოდჷ. 2008 წანას, მარტინ სიფი წინგის, „ჩაპლინი: რინა“, ოსხუნუეს ჭარუნდჷ:
|
„ჩაპლინი ვარდჷ უბრალოთ 'დიდი', თინა გიგანტური რდჷ. 1915 წანას თიქ მიშეჭკირჷ ლჷმეფით აკოსოფილჷ მოსოფელშა, ქუმუღჷ კომედია, ღიჯგინი დო ნიგეში, თიმ ბორჯის, მუჟამსჷთ ორენი გჷთმოხორცქდჷ მაართა მოსოფელიშ ლჷმაშ გეშა. გეჸვენჯი 25 წანაშ გოძვენას, დიდი დეპრესიაშ დო ადოლფ ჰიტლერიშ ეჸონაფაშ პერიოდის, თინა კინ აგჷნძორენდჷ მუშ საქვარს. თინა უმოსი დიდი რდჷ, ვინდარო მითინ შხვა. საეჭო რე, მუდგარდია ბორჯის შხვა პიჯეფს ჩაპლინშე უმოსი მეტი დროშ ღალა მოუღალჷდჷკონ, სიჰამა დო ნიგეში თესხი ადამიერშო - თიმ ბორჯის, მუჟამსჷთ თის არძაშე უმოსო ოხვილუდესჷნ..[4]“
|
რესურსეფი ინტერნეტის
რედაქტირაფასქოლიო
რედაქტირაფა- ↑ Blanke, David (2002). The 1910s, illustrated, American popular culture through history, Westport, CT: Greenwood Publishing Group, ხს. 226. ISBN 978-0-313-31251-9.
- ↑ Haupert, Michael (2006). The Entertainment Industry. Westport, CT: Greenwood Publishing Group, ხს. 242. ISBN 978-0-313-32173-3.
- ↑ Kelly, Shawna (2008). Aviators in Early Hollywood, illustrated, Mount Pleasant, SC: Arcadia Publishing, ხს. 16. ISBN 978-0-7385-5902-5.
- ↑ სიფი, მარტინი.Washington Times - წინგეფი 21 ქირსეთუთა 2008
|
თე სტატია პიჯიშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა. |