მალდივიშ რესპუბლიკა

მალდივიშ კოკეფი (დივეჰურო:ދިވެހިރާއްޖެ), Dhivehi Raa’je), ედომუშამი ჯოხოდვალა მალდივიშ რესპუბლიკა (დივეჰურო ދިވެހިރާއްޖޭގެ ޖުމުހޫރިއްޔާ – დივეხი რადიეგე ჯუმჰურიია) — სახენწჷფო ობჟათე აზიას, იდვალუაფჷ ინდოეთიშ ოკიანეშ ატოლეფიშ ბუნას, ნამუთ იდვალუაფჷ ინდოეთიშ დო შრი-ლანკაშ ობჟათე-ბჟადალშე.

მალდივიშ რესპუბლიკა
შილა	გერბი


ნანანოღა	მალე
უკაბეტაში ნოღა	მალე
ოფიციალური ნინა	დივეჰი
თარობა	ოპრეზიდენტე რესპუბლიკა
პრეზიდენტი	იბრაჰიმ მოჰამედ სოლიჰი
ფართობი	309 კმ²(186-ა)
მახორობა	557,426 ვარ-და 379,270 (178-ო) (2020)
ვალუტა	მალდივური რუფია
ბორჯიში ორტყაფუ	UTC +5:00 სთ.
ოინტერნეტე კოდი	.mv
ოტელეფონე კოდი	+960

გეოგრაფია

მალდივიშ რესპუბლიკა, ინდოეთიშ ოკიანეშ ეკვატორულ წყარეფს მილარე, შრი-ლანკაშე დოხოლაფირო 700 კმ. ობჟათე–ბჟადალშე. მახორობა – დოხოლაფირო 395 ვითოში კოჩი რე. მალდივიში კოკეფი ვართფერ მაღალს რენა ოკიანეშ დონეშე: ჩქონიშ არძაშ უმოს მაღალი კონკა რე — ობჟათე ატოლი ადუს (გვალა სიენუ) — 2,4 მ. ქიანაშ ოსქირონე ტერიტორიაშ ფართობი — 298 კმ². ნანანოღა მალე — ჩქონიშ ხვალახე ართი ნოღა დო ონიშოლი.

კლიმატი

მალდივიშ კოკეფს სუბეკვატორული მუსონური კლიმატი რე. ნთელ წანას ჩხე დო ტიბუ ამინდეფი რე, ჰაერიშ ტემპერატურა +24°–შე 30°–შა რე. ჰაერიშ ტემპრატურა დღას ვედმიკინანს +17 °C–შე თუდო ღურთუთა–ფურთუთას, დო დღას ვეთმიკინანს +32 °C–შე ეშე პირელ–მესის.

წყარიშ რესურსეფი

მალდივიშ კოკეფს ირალი მახჷრჩინჷ წყარეფი (წყარმალუეფი) ვარე.

ისტორია

მალდივიშ კოკი დოხორინელი რდჷ დრავიდეფით ჟირივითოში წანაშ წოხჷლე — ნამუთ ამდღახუ შრი–ლანკაშ დო ინდოეთიშ ტერიტორიაშე გინორთეს. V—VII ოშწანურეფს კოკეფს არაბეფქ დო სპარსელეფქ გენკორჩქინდეს.

2008 წანაშ გჷმათუთას ეშაგორილქ იჸუ მალდივიშ რესპუბლიკაშ მაართა პრეზიდენტიქ, გიშაგორილქ ოკათე ხონარიშ მეჩამათ, მოჰამედ ნაშიდი.

2012 წანაშ 7 ფურთუთაშ ოპროტესტე აქციეფქ ქიანაშ პრეზიდენტი მოჰამედ ნაშიდი გეგნარინუ.

პოლიტიკური პარტიეფი

2009 წანაშ ეშაგორუეფიშ მუნაჩამეფით:

ოკათე პარტია — მარჯგვანცენტრისტული, 28 დეპუტატი
დემოკრატიული პარტია — ცენტრისტული, 26
ოხალხე ალიანსი — 7
პარტია დივეხი მუამეე — 2
რესპუბლიკური პარტია — 1
დუდიშული აბანი — 13 დეპუტატი.

ადმინისტრაციულ–ტერიტორიული დორთუალა

მალდივიშ კოკეფი — უნიტარული სახენწჷფო რე. ადმინისტრაციულო ქიანა დორთილი რე 19 კოკეფიშ ბუნათ.

ეკონომიკა

ეკონომიკაშ თარი სფერო რე — ტურისტეფიშ მოინალობა დო ჩხომჭოფუა.

ქოქოსი, მალდივიშ კოკიშ ართ-ართი ატოლაშ წყარპიჯის

სიღარიბეშ დონეშ თუდო რე ქიანაშ მახორობაშ 16%(2008 წანას).

ოფოტეშ მეურნობა

მალდივის ოფუტეშ მეურნობა დაღარას რე გოვითარაფილი. ოჭკომალი პროდუქტეფიშ უმენტაშ ნორთი იმპორტიშე მოურს. ქიანაშ თარი აბანჸოფილ კულტურა რე — ქოქოსიშ პალმა, ხოლო მოჸუნა ბანანეფი, ორტვინულობა, ხილეულობა, ბატატი, ქობალიშ ჯა. ორინჯის პრაქტიკულო ვედმიჭყანუანა.

დინოხოლენი ვაჭaრუა

ექსპორტი — 125 მლნ. დოლარი (2008 წანას) — ჩხომი (70 %) დო ოფოსტე მარკეფი.

თარი მაჸიდეეფი — ტაილანდი 34,5 %, დიდი ბრიტანეთი 13,8 %, საფრანგეთი 12,2 %, იტალია 9 %, შრი-ლანკა 8,5 %.

იმპორტი — 1,2 მილიარდი დოლარი (2008 წანას) — ნავთობპროდუქტეფი, ნიშეფი, მუკაქუნალი, ორეწუე დო ოხვარებელი მეკონ-მოკონი.

თარი მუმაჭირინდაფალეფი — სინგაპური 26,6 %, აას 16,5 %, მალაიზია 9,5 %, ინდოეთი 9,2 %, ტაილანდი 4,7 %.

ტრანსპორტი

თარი ოტრანსპორტე საშვალება ერქემი დო მოტორამი ნიშეფი რე. ოღალუეფიშ უმენტაში ნორთი გინმიღალუაფუ ჰიდროფურინჯეფით, ვერტმაფურნჯეფით დო კატერეფით. ომენოღალე ტრანსპორტი მუჭოთ თაში ვა რე. ოავტომობილე ტაქსი (დო რზეფი) ხვალე ნანანოღა მალეს დო კოკა განს რე. კოკეფს შქას გილაფურინუნს აეროტაქსი, მალდივიშ აერო ტაქსი, ფურინჯი.

მახორობა

მალე — მალდივიშ კოკეფიშ ნანანოღა

მახორობაშ მუდანობა — 395 ვითოში კოჩი (2011 წანაშ კვირკვეშ მუნაჩემეფით). მალდივიშ კოკეფიშ უმენტაშობა უდუხორუ რე.

ნინა

ოფიციალური ნინა — დივეჰი, არხოს რე სინჰალურ ნინაწკჷმა, არაბულიშ დო ინგლისურიშ მიშაკათუათ. ჭარალუა — XVII ოშწანურაშე დირსხჷ არაბულ–სპარსულ გრაფიკათ. ქიანაშ მახორობაშ გურაფილ ნორთის არაბული დო ინგლისური ნინეფი უჩქჷნა.

მალდივიური საგესქუო

მალდივიშ კოკეფიშ საგესქუო მერსხილი რე არაბულ დო ინდურ საგესქუოეფწკჷმა. შხირას ზადჷნა შხვადოშხვანერ ჩხომიშ პროდუქტეფს, ორზას, გემუანობეფს, სოუსეფს. მალდივარეფიშ ოჸოროფე ოჭკომალი რე – თინუსი ორზაწკჷმა ართო. დესერტეფი — ქოქოსი არძანერო ზადილი, არეკიშ თხირი, ბრელი ხილეულობა, ხილიშ სალათა, ნამცხვარეფი. პოპულარული ოშუმალი — ჩაი ბჟათ დო ყავა არაბულო.

ფოტოგალერეა

რესურსეფი ინტერნეტის

ათე სტატია მერკე რე.
თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ.